ប្រើហេតុផល ៧យ៉ាងនេះដើម្បីរៀបការ អាចមានវិប្បដិសារីទៅអនាគត

2015-01-26 22:45:13
ចំនួនមតិ 0 | ចំនួនចែករំលែក 0

ចន្លោះមិនឃើញ

អាពាហ៍ពិពាហ៍ដ៏មានន័យបំផុត មានតែម្ដងគត់ក្នុងជីវិត ដូចនេះហើយទើបមនុស្សម្នាក់ៗព្យាយាមគិតគូរយ៉ាងល្អិតល្អន់មុនសម្រេចចិត្តទទួលយក។ ការស្រលាញ់គ្នារវាងមនុស្សពីរនាក់ បង្កើតចេញជាចំណងស្នេហាមិនអាចកាត់ផ្ដាច់បាន រហូតឈានជើងចូលរោងការកសាងអនាគតរួមគ្នា។ នេះគឺជាមូលហេតុសាមញ្ញបំផុត បង្កើតជាអាពាហ៍ពិពាហ៍ប្រកបដោយភាពផ្អែមល្ហែមមិនចេះរីងស្ងួតទៅថ្ងៃមុខ ព្រោះម្នាក់ៗសុទ្ធតែមានចិត្តលើគ្នា។ យ៉ាងណាមិញ មនុស្សមួយចំនួនទៀត មិនទាន់បានស្គាល់ស្នេហាច្បាស់ផង ក៏ចាប់ផ្ដើមប្រលូកក្នុងជីវិតអាពាហ៍ពិពាហ៍ ដោយហេតុផលផ្សេងៗ ហើយក្រោយមកក៏កើតចិត្តស្ដាយក្រោយ។

ខាងក្រោមនេះ គឺជាហេតុផល ៧យ៉ាង ធ្វើឲ្យអ្នកសម្រេចចិត្តរៀបការ ប៉ុន្តែអាចមានវិប្បដិសារីទៅអនាគត៖

១. រៀបការព្រោះអាយុច្រើន

ព្រោះភ័យព្រួយថាខ្លួនអាយុច្រើន អ្នកក៏ចាប់ផ្ដើមគិតពីរឿងអាពាហ៍ពិពាហ៍ ទាំងមិនដឹងថាគូអនាគតនៅទីណា ទាំងមិនដឹងថាក្ដីស្រលាញ់ជាអ្វីឲ្យប្រាកដ។ ទស្សនៈបែបនេះអាចនាំឲ្យអ្នកចូលរោងការទាំងស្រពេចស្រពិលក្នុងចិត្ត ហើយមិនបានគិតវែងឆ្ងាយក្នុងការរៀបចំគោលដៅជីវិត។ អាពាហ៍ពិពាហ៍បែបនេះ ប្រៀបដូចជាការបង្ខំចិត្តដើរលើផ្លូវដែលខ្លួនមិនស្គាល់បែបនោះដែរ។ ពេលខ្លះបើគ្មានឧបសគ្គ អ្នកនៅតែបន្តដំណើរទៅមុខទៀតទាំងមិនស្គាល់ ប៉ុន្តែបើជួបបញ្ហាវិញ ច្បាស់ជាបន្ទោសលើព្រហ្មលិខិតជាក់ជាមិនខាន។

២. រៀបការបំពេញបំណងឪពុកម្ដាយ

ឪពុកម្ដាយឯណាដែលមិនស្រលាញ់កូន មិនបារម្ភពីកូន មិនចង់ឃើញកូនខ្លួនឯងមានក្ដីសុខរស់នៅលើគំនរទ្រព្យសម្បត្តិនោះ។ យ៉ាងណាមិញ ពេលខ្លះក្ដីស្រលាញ់ដ៏ជ្រាលជ្រៅ បានធ្វើឲ្យអ្នកមានគុណទាំងពីរបង្ខំកូនរៀបការជាមួយមនុស្សម្នាក់នៅក្នុងក្រសែភ្នែកខ្លួន ទាំងមិនគិតថាកូនស្រលាញ់ពេញចិត្តឬអត់។ ក្នុងនាមជាកូនស្ដាប់បង្គាប់ អ្នកអាចទទួលយកអាពាហ៍ពិពាហ៍នោះ ទាំងមិនគិតពីខ្លួនឯង។ ប្រសិនអនាគតចុះសម្រុងគ្នា ប្រហែលជាគ្មានបញ្ហាទេ ប៉ុន្តែបើមានការរកាំរកូសតែបន្តិច អ្នកប្រាកដជាគិតភ្លាមថាមកពីឪពុកម្ដាយបង្ខំ។ ចំណងអាពាហ៍ពិពាហ៍ ដែលមិនកើតចេញពីឆន្ទៈខ្លួនឯងបែបនេះ ច្រើនតែខ្វះការតស៊ូជាមួយគ្នា និងឆាប់បែកគ្នាលឿនពេលឈ្លោះគ្នា នាំឲ្យមានវិប្បដិសារីរៀងៗខ្លួន។

៣. រៀបការដើម្បីរំដោះខ្លួនពីភាពឯកា

មនុស្សមួយចំនួន តែងគិតថាខ្លួនឯងឯកា ក៏ចាប់ផ្ដើមចង់រកមនុស្សម្នាក់មកកំដរជីវិត និងគិតចង់រៀបការមានគូអនាគតដូចគេ។ គំនិតបែបនេះគឺអាត្មានិយមពេកហើយ ព្រោះស្នេហាមិនមែនជាការផ្ដល់អ្វីមួយឲ្យគ្នាទៅវិញទៅមកនោះទេ។ អ្នកគិតពីខ្លួនឯង ចង់ឲ្យគេកំដរ ចង់ឲ្យគេមានពេលវេលាសម្រាប់ខ្លួន ហើយគេវិញក៏ចង់ឲ្យអ្នកធ្វើបែបនេះដូចគ្នា។ យូរៗទៅ បរិយាកាសបែបនេះ បែរជានាំឲ្យមានការធុញទ្រាន់គ្នាទៅវិញទៅមក ឯចំណងស្នេហាក៏គ្មានពិតប្រាកដ។ ពេលនោះ អ្នកនឹងស្ដាយក្រោយ គិតថាបើដឹងបែបនេះ ប្រហែលជាមិនទាន់រៀបការទេ សុខចិត្តនៅទំនេរគ្មានអ្នករំខាន។

៤. រៀបការដើម្បីបំពេញចំណង់ផ្លូវភេទ

ពិតណាស់ថាមនុស្សគ្រប់រូបសុទ្ធតែអាចឆ្លងកាត់ទំនាក់ទំនងផ្លូវភេទ និងត្រូវការវាដើម្បីបំពេញរសជាតិជីវិត ប៉ុន្តែរៀបការដើម្បីបំពេញចន្លោះខ្វះខាតក្នុងរឿងនេះ ហាក់ដូចជាមិនមែនជម្រើសត្រឹមត្រូវឡើយ។ ការស្រលាញ់គ្មានដែនកំណត់ ឯចំណង់ផ្លូវភេទមិនស្ថិតស្ថេរយូរអង្វែងទេ។ ប្រាថ្នាចង់បាន ពេលបានហើយក៏អស់ចិត្ត។ ចុះបើពេលរៀបការរួច អ្នកត្រូវការតែពេលសប្បាយមួយភ្លែត ដល់ពេលអស់ចំណង់ក៏លែងចង់ឃើញមុខ តើភាគីម្ខាងទៀតមានអារម្មណ៍យ៉ាងណា? ចំណែកអ្នកវិញ មិនស្រលាញ់គេ យូរៗរឹតតែធុញ អនាគតនឹងទៅជាបែបណា? មានតែការស្ដាយក្រោយប៉ុណ្ណោះ។

៥. រៀបការព្រោះមិត្តភ័ក្ដិមានប្ដីប្រពន្ធអស់

មនុស្សមួយចំនួន អាចមិនទាន់មានគម្រោងអនាគតច្បាស់លាស់ទេ ហើយក៏ពុំទាន់មានបំណងថាចង់ទទួលយកចំណងអាពាហ៍ពិពាហ៍ដែរ ប៉ុន្តែពេលឃើញមិត្តភ័ក្ដិស្រករខ្លួនមានប្ដីប្រពន្ធអស់ ក៏ចាប់ផ្ដើមមានអារម្មណ៍ខ្មាសគេ។ ពេលនោះ អ្នកចាប់ផ្ដើមគិតចង់បានគូអនាគតដូចគេ ទាំងខ្លួនឯងរីករាយជាមួយសេរីភាពខ្លួនមួយមិនទាន់អស់ចិត្តផង។ ពេលមានដៃគូដែលតឹងតែងខ្លាំងពេក អ្នកក៏ចាប់ផ្ដើមមានអារម្មណ៍ថាស្ដាយក្រោយ នឹកស្រណោះដល់ពេលនៅម្នាក់ឯងវិញ។ អារម្មណ៍បែបនេះ អាចនឹងពិបាកទ្រាំ រហូតដល់ពេលខ្លះបែកគ្នាទាំងគ្មានបញ្ហាក៏ថាបាន។ ៦. រៀបការព្រោះខាងស្រីមានផ្ទៃពោះ

ស្នេហ៍ស្មោះពិត មិនប្រាថ្នាអ្វីទាំងអស់ ក្រៅពីចង់ឃើញគេមានក្ដីសុខ និងស្នាមញញឹម ក៏អស់ចិត្តហើយ។ ចំណែកឯការចង់បាន និងលះបង់ខ្លួនប្រាណ គឺជាចំណង់ មិនមែនស្នេហាពិតឡើយ។ យ៉ាងណាមិញ មានមនុស្សមួយចំនួនបានជ្រុលជ្រួសរហូតមានផ្ទៃពោះទាំងមិនចង់បាន។ ដើម្បីកុំឲ្យមានភាពអាម៉ាស់ ក៏ទទួលយកអាពាហ៍ពិពាហ៍ទាំងបង្ខំ។ ស្នេហាបែបនេះ គ្មានសុភមង្គលឡើយ មានតែការធុញទ្រាន់ និងពាក្យនិន្ទាពីអ្នកដទៃ។ ច្បាស់ទេ ថាអ្នកស្រលាញ់ស្មោះ ឬក៏ព្រោះដើម្បីកូនក្នុងផ្ទៃ និងខ្លាចខ្មាសគេ? ត្រូវគិតឲ្យបានល្អិតល្អន់ មុនសម្រេចចិត្តទទួលយកអាពាហ៍ពិពាហ៍មួយ។ បើមិនរៀបការអាចពិបាកខ្មាសគេ ប៉ុន្តែបើរៀបការហើយបែរជាមិនស្រលាញ់គ្នា វាមិនខុសអីពីរស់នៅក្នុងគុកឡើយ។ នេះមិនមែនមានន័យថា មិនទទួលខុសត្រូវទេ ប៉ុន្តែត្រូវមានជម្រើសដ៏ល្អមួយ ដើម្បីកុំឲ្យមានវិប្បដិសារីទៅអនាគត។

៧. រៀបការដើម្បីបង្កើនទ្រព្យ

ដោយសារគេជាអ្នកមានទ្រព្យ ក៏បង្ខំចិត្តព្រមរៀបការទាំងដឹងថាខ្លួនមិនទាន់ស្រលាញ់គេ មិនទាន់ត្រៀមចិត្តទទួលយកគេ និងពេលខ្លះមិនទាន់ទាំងដឹងថាគេនោះជាមនុស្សបែបណាផង។ ចំណងអាពាហ៍ពិពាហ៍កើតចេញពីទឹកប្រាក់ ភាគច្រើនមិនមែនជាស្នេហាពិតឡើយ។ អ្នកមានទ្រព្យច្រើនមើលឃើញសម្រស់ ឯអ្នកមានទ្រព្យតិចមើលឃើញលាភសក្ការៈ។ ពេលភាគីណាម្ខាងបាត់បង់របស់ដែលខ្លួនមាននេះ ភាគីម្ខាងទៀតក៏ចាប់ផ្ដើមប្រែចិត្ត ព្រោះអ្វីដែលខ្លួនមើលឃើញតាំងពីដំបូងបានរបូតបាត់ទៅហើយ។ ទោះបែបនេះក្ដី ស្នេហាមិនប្រកាន់វណ្ណៈឡើយ ហើយពេលខ្លះគេអាចមានស្នេហាពិតមិនគិតទៅលើទ្រព្យសម្បត្តិ។

ត្រូវទទួលយកចំណងអាពាហ៍ពិពាហ៍ពេលជួបមនុស្សដែលស្រលាញ់ពិត បង្កើតស្នេហាចេញពីចិត្ត អាចដើរផ្លូវរួមគ្នាទៅអនាគត។ មុនសម្រេចចិត្តរៀបការ ត្រូវគិតឲ្យបានគ្រប់ជ្រុងជ្រោយ ចំណុចល្អរបស់ខ្លួនឯង ចំណុចអាក្រក់របស់ខ្លួនឯង អ្វីដែលខ្លួនមានគេអាចទទួលបាន ឬទេ។ ចំណែកចំណុចអាក្រក់របស់គេវិញ អ្នកអាចទទួលបានឬអត់។ ថ្ងៃក្រោយ ពេលឈ្លោះគ្នា អ្នកអាចអត់ទ្រាំបានកម្រិតណា។ សេដ្ឋកិច្ចអ្នកទាំងពីរ អាចល្មមគ្រប់គ្រាន់សម្រាប់បង្កើតគ្រួសារមួយហើយឬនៅ។ ត្រូវបង្កើតការស្រលាញ់ចេញពីចិត្ត អាណិត មេត្តា អធ្យាស្រ័យ យោគយល់ នោះចំណងអាពាហ៍ពិពាហ៍អ្នក នឹងប្រកបទៅដោយភាពផ្អែមល្ហែម គ្មានអ្វីអាចមកបំបែកបានឡើយ។

យ៉ាងណាក៏ដោយ ស្នេហាពេលខ្លះមិនអាចកំណត់បាន គ្មានព្រំដែន និងមើលមិនឃើញ។ មនុស្សមួយចំនួន ប្រើហេតុផលណាមួយក្នុងចំណោមហេតុផលទាំង៧ ខាងលើ ដើម្បីរៀបការ បន្ទាប់មកការស្រលាញ់ក៏កើតមានឡើងតាមក្រោយ និងមានក្ដីសុខរហូតរៀងទៅ។ អ្វីដែលបង្ហាញខាងលើ គ្រាន់តែទុកជាការគិតគូរឲ្យបានល្អិតល្អន់មុនពេលរៀបការតែប៉ុណ្ណោះ៕

ដោយ៖ គង់ វិសាល ប្រភព៖ Yourtango