ដឹងថាម្ចាស់ក្លិបបាល់ទាត់ណាមានលុយច្រើនជាងគេអត់?

2015-01-28 16:15:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្លិបបាល់ទាត់ដែលមានជាងគេនៅឆ្នាំ២០១៥នេះគឺអ្នកគ្រប់គ្នាបានដឹងហើយថាជា Real Madrid ប៉ុន្តែបើនិយាយពីម្ចាស់ក្លិបបាល់ទាត់ដែលមានជាងគេវិញនោះ ប្រហែលជាមិត្តអ្នកអានគិតមិនដល់នោះទេ ព្រោះអ្នកទាំងនោះមិនមែនជាម្ចាស់ក្លិបបាល់ទាត់ល្បីៗ។ ចង់ដឹងថា១០នាក់ដែលជាម្ចាស់ក្លិបបាល់ទាត់មានជាងគេនៅលើលោកនេះជានរណា សូមមើលខាងក្រោមនេះ៖

១០. លោក Roman Abramovich (Chelsea)

លោក Roman Abramovich គឺជាមហាសេដ្ឋីជនជាតិរុស្ស៊ីដែលមានប្រាក់រហូតដល់ទៅ១០,២ពាន់លានដុល្លារអាមេរិក។ ទន្ទឹមនឹងក្លាយជាម្ចាស់ក្លិប Chelsea នៅឆ្នាំ២០០៣ រូបលោកបានទិញក្លិបមួយនេះក្នុងតម្លៃ២៣៣លានដុល្លារអាមេរិក។ រយៈពេលជាង១០ឆ្នាំមកនេះ បុរសវ័យ៤៨ឆ្នាំរូបនេះ បានចំណាយអស់២,៩៧ពាន់លានដុល្លារទៅហើយទៅលើតោខៀវ Chelsea ។

៩. John Fredriksen (Valerenga)

លោក Jonh Fredriksen ជាមហាសេដ្ឋីប្រេងម្នាក់ដែលកើតនៅប្រទេសន័រវែស និងបច្ចុប្បន្នរូបលោកជាប្រធានសហព័ន្ធកីឡាបាល់ទាត់ Valerenga ដែលមានទីតាំងនៅប្រទេសន័រវែសនេះផងដែរ។ បុរសវ័យ៧០ឆ្នាំរូបនេះមានប្រាក់រហូតដល់ទៅ១១,៥ពាន់លានដុល្លារគិតត្រឹមដើមឆ្នាំ២០១៥នេះ ខណៈដែលក្នុងឆ្នាំ២០១៤ រូបលោករកបានចំណូល២០០លានដុល្លារ។

៨. Paul Allen (Seattle Sounders FC)

លោក Paul Allen ជាឧបការីជនរបស់ក្រុមហ៊ុន Microsoft និងជាម្ចាស់របស់ក្លិប Seattle Sounders FC របស់អាមេរិកផងដែរ។ បុរសវ័យ៦២ឆ្នាំដែលមានសញ្ជាតិអាមេរិករូបនេះមានប្រាក់រហូតដល់ទៅ១៥ពាន់លានដុល្លារអាមេរិក ហើយក្នុងឆ្នាំ២០១៤នេះដែររូបលោកអាចរកបាន៨០០លានដុល្លារអាមេរិក។

៧. Francois Pinault (Stade Rennais )

លោក Francois Pinault ជាមហាសេដ្ឋីប្រាក់វាលលានម្នាក់របស់បារាំងដែលមានប្រាក់រហូតដល់ទៅ១៥ពាន់លានដុល្លារ។ បុរសរូបនេះបានទិញក្លិបបាល់ទាត់មួយសម្រាប់គ្រួសាររបស់លោកផ្ទាល់មានឈ្មោះថា Stade Rennais ដែលមានទីតាំងនៅតំបន់ Brittany ក្នុងប្រទេសបារាំង។

៦. Rinat Akhmetov (FC Shakhtar Donetsk )

លោក Rinat Akhmetov ជាមហាសេដ្ឋីរបស់ប្រទេសអ៊ុយក្រែននិងជាម្ចាស់របស់ក្លិប FC Shakhtar Donetsk ដែលលេងនៅលីកកំពូលអ៊ុយក្រែនផងដែរ។ គិតត្រឹមដើមឆ្នាំ២០១៥នេះ សេដ្ឋីវ័យ៤៨ឆ្នាំរូបនេះមានប្រាក់រហូតដល់ទៅ១៥,៤ពាន់លានដុល្លារអាមេរិក។

៥. Lakshmi Mittal (Queens Park Rangers )

លោក Lakshmi Mittal ជាមហាសេដ្ឋីរបស់ប្រទេសឥណ្ឌាដែលមានប្រាក់រហូតដល់ទៅ១៦,៥លានដុល្លារអាមេរិក និងជាម្ចាស់របស់ក្លិប QPR ដែលលេងនៅអង់គ្លេសផងដែរ ព្រោះរូបលោកមានភាគហ៊ុននៅក្លិបនេះច្រើនជាងគេ៣៣%។

៤. Alisher Usmanov (Arsenal)

លោក Alisher Usmanov ជាមហាសេដ្ឋីរបស់ប្រទេសរុស្ស៊ីដែលមានមុខរបរច្រើនរាប់មិនអស់។ ទន្ទឹមនឹងមានការងារច្រើននេះដែរ បុរសវ័យ៦១ឆ្នាំរូបនេះក៏មិនចោលកីឡាដែរ ពោលគឺរូបលោកបានទិញភាគហ៊ុនរបស់ Arsenal ១៤,៥៨%នៅឆ្នាំ២០០៧។ លោក Alisher Usmanov បច្ចុប្បន្នមានប្រាក់រហូតដល់ទៅ១៧,៦ពាន់លានដុល្លារអាមេរិក។

៣. George Soros (Manchester United)

ប្រិយមិត្តដឹងហើយថា ក្លិបបិសាចក្រហម Manchester United គឺបង្កើតឡើងដោយក្រុមគ្រួសារត្រកូល Glazer ដែលជាមហាសេដ្ឋីអាមេរិកប៉ុន្តែទន្ទឹមនឹងនេះដែរ ភាគហ៊ុនប្រហែលជា៧,៨៥%ត្រូវបានលក់ទៅឱ្យលោក George Soros ទៅហើយនៅឆ្នាំ២០១២។ នេះមានន័យថា លោក George Soros ក៏មានចំណែកមួយជាម្ចាស់នៅក្នុងក្លិបយក្សនៅអង់គ្លេសមួយនេះដែរ។ Soros ជាមហាសេដ្ឋីរបស់អាមេរិកដែលមានប្រាក់រហូតដល់ទៅ១៩,៥ពាន់លានដុល្លារអាមេរិក។

២. Amancio Ortega (Deportivo La Coruna)

លោក Amancio Ortega ជាមហាសេដ្ឋីម្នាក់នៅប្រទេសអេស្ប៉ាញដែលមានប្រាក់៥៧ពាន់លានដុល្លារអាមេរិក។ បុរសវ័យ៧៨ឆ្នាំរូបនេះ ត្រូវបានគេរាយការណ៍ថាជាម្ចាស់ក្លិប Deportivo La Coruna របស់អេស្ប៉ាញ។

១. Carlos Slim Helu (Club Pachuca, Club Leon (របស់ប្រទេសម៉ិកស៊ីកូ) និង Real Oviedo របស់អេស្ប៉ាញ)

លោក Carlos Slim Helu ដែលជាមហាសេដ្ឋីរបស់ប្រទេសម៉ិកស៊ីកូដែលមានប្រាក់រហូតដល់៧៣ពាន់លានដុល្លារអាមេរិក។ ទន្ទឹមនឹងមានលុយច្រើននេះដែរ បុរសវ័យ៧៤ឆ្នាំរូបនេះបានទិញក្លិបបាល់ទាត់រហូតដល់ទៅ៣ឯណោះ គឺនៅឆ្នាំ២០១២ទិញក្លិប២នៅម៉ិកស៊ីកូ (Club Pachuca, Club Leon) ហើយឆ្នាំ២០១៣ទិញក្លិប Real Oviedo នៅប្រទេសអេស្ប៉ាញ ។

យ៉ាងណាមិញនេះ គ្រាន់តែជាការចាត់ថ្នាក់របស់គេហទំព័រ dailyentertainment ប៉ុណ្ណោះមិនមែនជាព័ត៌មានផ្លូវការរបស់ខាង FIFA អីនោះទេ។ យ៉ាងណាមិញ ទិន្នន័យខាងលើនេះទៀតសោតគឺឱ្យតែមហាសេដ្ឋីណាដែលមានភាគហ៊ុននៅក្នុងក្លិបបាល់ទាត់ទោះច្រើនក្ដីឬតិចក្ដីក៏ត្រូវបានគេយកមករាប់បញ្ចូលដែរ មិនមែនយកមហាសេដ្ឋីដែលមានភាគហ៊ុនច្រើនជាងគេនោះទេ ៕

ចុចអាន៖Real ជាប់ជាក្លិបមានជាងគេ១០ឆ្នាំជាប់គ្នា ឯ Man Utd លេខ២

ប្រែសម្រួល៖ មុន្នី រម្យ ប្រភព៖ dailyentertainment