ជាអ្នកសុំទាន តែមានលុយជិត ១ពាន់ដុល្លារជាប់ខ្លួន

2015-01-28 16:03:16
ចំនួនមតិ 0 | ចំនួនចែករំលែក 0

ចន្លោះមិនឃើញ

មន្ត្រីមានសមត្ថកិច្ចនៅប្រទេសថៃ បានឃាត់ខ្លួនអ្នកសុំទានជនជាតិចិនម្នាក់នៅភាគកណ្ដាលខេត្ត Chai Nat កាលពីថ្ងៃអង្គារ។ បន្ទាប់ពីធ្វើការឆែកឆេរ គេបានរកឃើញថានៅក្នុងខ្លួនអ្នកសុំទាននោះមានប្រាក់ជាង ២ម៉ឺនបាត គិតជាប្រាក់ដុល្លារប្រមាណជិត ១ពាន់ដុល្លារ។

ការឃាត់ខ្លួននេះ ក្រោយមានប្រតិបត្តិការចុះបង្ក្រាបសកម្មភាពសុំទានតាមទីសាធារណៈ នៅផ្សារមួយតាមបណ្ដោយផ្លូវ hong Tham កាលពីថ្ងៃអង្គារកន្លងទៅនេះ។ ប៉ូលិសបានប្រទះឃើញអ្នកសុំទានវ័យ ៣៩ឆ្នាំម្នាក់ឈ្មោះ Xu Baosong មានពិការម្រាមដៃមួយចំនួន រួចធ្វើការឃាត់ខ្លួនដើម្បីសួរនាំ។ អ្នកសុំទានដែលត្រូវឃាត់ខ្លួននេះ មកពីខេត្តហឺណាន ប្រទេសចិន។ ប៉ូលិសព្យាយាមពន្យល់ថាការសុំទានគឺជាអំពើខុសច្បាប់នៅថៃ ប៉ុន្តែអ្នកសុំទានពុំចេះភាសាថៃ ឬអង់គ្លេសនោះទេ។

មុនដំបូង គេបានឆែកឃើញកាក់ដែលមានតម្លៃ ៤៨០បាត (១៨ដុល្លារ) ប៉ុន្តែក្រោយមកក៏រកឃើញលុយសុទ្ធចំនួន ២១៥៤០បាត (៨២៧ដុល្លារ)ទៀត នៅក្នុងកាបូបស្ពាយរបស់ជនជាតិចិននោះ។ មន្ត្រីម្នាក់បានលាន់មាត់ថា “អ្នកសុំទាននេះមានលុយកាន់ច្រើនជាងប្រាក់ខែខ្ញុំទៀត”។

បន្ទាប់ពីសាកសួរ គេបានរកឃើញថា លោក Xu ស្នាក់នៅសណ្ឋាគារមួយកណ្ដាលខេត្ត Chai Nat នៅជិតកន្លែងអង្គុយសុំទាន។ ប៉ូលិសបានរកឃើញកាក់លុយជាច្រើនទៀតនៅក្នុងបន្ទប់ដែលអ្នកសុំទានស្នាក់នៅ។ បន្ទាប់ពីសាកសួររួច ប៉ូលិសបានបញ្ជូនខ្លួនជនជាតិចិននេះ ទៅការិយាល័យអន្តោប្រវេសន៍៕

ចុចអាន៖ បុរសអត់ការងារធ្វើរើសបានជាង ២ម៉ឺនដុល្លារ ៣ថ្ងៃក្រោយប្រគល់ឲ្យប៉ូលិស

ប្រែសម្រួល៖ គង់ វិសាល ប្រភព៖ bangkokpost