ក្រោយបាន១០០ដុល្លារ ជនអនាថាធ្វើអំពើសប្បុរសមិនគួរឲ្យជឿ
- 2015-01-31 17:28:48
- ចំនួនមតិ 0 | ចំនួនចែករំលែក 0
ក្រោយបាន១០០ដុល្លារ ជនអនាថាធ្វើអំពើសប្បុរសមិនគួរឲ្យជឿ
ចន្លោះមិនឃើញ
បុរសអនាថាឈ្មោះ Thomas បានបោះបង់ការងារ ដើម្បីមើលថែម្ដាយឪពុកមានជំងឺជាប់ខ្លួន ប៉ុន្តែជាអកុសលនៅតែពុំអាចជួយពួកគេឲ្យនៅរស់រានមានជីវិតបន្តទៀតបាន។ អ្នកមានគុណទាំងពីរបានបាត់បង់ជីវិតកាលពីប៉ុន្មានខែមុននេះ ដោយសាររោគមហារីក និងខូចក្រលៀន។
ក្រោយមនុស្សជាទីស្រលាញ់របស់ខ្លួនស្លាប់ចោល លោកថែមទាំងបាត់បង់ខុនដូដែលធ្លាប់នៅទៀត រហូតធ្លាក់ខ្លួនគ្មានការងារធ្វើ និងត្រាច់ចរអនាថាស្នាក់នៅតាមដងផ្លូវ។ បើទោះជាគ្មានអ្វីជាប់ខ្លួនក្ដី ក៏បុរសកំព្រាម្នាក់នេះនៅតែជួយអ្នកដទៃជានិច្ច។
កន្លងទៅថ្មីៗនេះ ម្ចាស់គណនីយូធូបដ៏ធំមួយឈ្មោះ Josh Paler Lin បានសាកចិត្តបុរសអនាថានេះ ដោយផ្ដល់លុយឲ្យ ១០០ដុល្លារ រួចចាំលួចថតសកម្មភាព ដើម្បីឲ្យដឹងថាគេយកលុយនោះទៅធ្វើអ្វីខ្លះ។ ក្រោយទទួលបានលុយរួច Thomas បានដើរចូលទៅក្នុងហាងទំនិញមួយ ដោយទិញរបស់ខ្លះដាក់ជាប់ខ្លួនមកវិញ។ បន្ទាប់មកគេបានយកចំណីអាហារមួយចំនួនទៅចែកឲ្យជនអនាថាផ្សេងទៀត គួរឲ្យភ្ញាក់ផ្អើលយ៉ាងខ្លាំង។
ទន្ទឹមនឹងគ្នានោះ ម្ចាស់លុយបានបង្ហាញខ្លួននៅមុខ Thomas និងសួរគេថា មានស្គាល់មនុស្សទាំងអស់ដែលផ្ដល់អាហារឲ្យ ឬអត់? Thomas បានឆ្លើយថា មិនស្គាល់ទេ ហើយរូបគេគ្រាន់តែចង់ជួយមនុស្សដែលគ្មានអាហារទទួលទានដូចគ្នាប៉ុណ្ណោះ។ សកម្មភាពសប្បុរសធម៌នេះ បានធ្វើឲ្យម្ចាស់គណនីយូធូបរំភើបចិត្តយ៉ាងខ្លាំង រហូតផ្ដល់លុយថែមមួយចំនួនទៀត ព្រមទាំងបង្កើតមូលនិធិរៃអង្គាសជួយរកកន្លែងស្នាក់នៅដល់បុរសអនាថាចិត្តធម៌ផងដែរ។
http://youtu.be/AUBTAdI7zuY
វីដេអូសកម្មភាពបុរសអនាថានេះ បានទាក់ទាញចំណាប់អារម្មណ៍មនុស្សជាច្រើន ដោយគ្រាន់តែជាង ១ខែប៉ុណ្ណោះ មានអ្នកចូលទស្សនាជិត ៤៤លានដង៕
ចុចអាន៖ អូនតូចសុខចិត្តអត់ញ៉ាំ ដើម្បីទិញឆ្នោត យកប្រាក់ព្យាបាលឪពុក
ដោយ៖ គង់ វិសាល