វីរបុរសបាល់ទាត់អាស៊ីទាំង១០ មានអាស៊ីអាគ្នេយ៍ម្នាក់ដែរតើ!

2014-10-04 15:32:48
ចំនួនមតិ 0 | ចំនួនចែករំលែក 0

ចន្លោះមិនឃើញ

Lionel Messi និង Cristiano Ronaldo ត្រូវបានគេចាត់ទុកថាជាកីឡាករល្អបំផុតនៅលើលោកនេះ។ ចុះបើគិតតែនៅអាស៊ីវិញ តើនរណាខ្លះជាប់ឈ្មោះជាកីឡាករល្អបំផុត (Best Player all the time)? Sabay សូមនាំអារម្មណ៍ប្រិយមិត្តឱ្យស្គាល់កីឡាករ១០នាក់នោះដូចខាងក្រោម៖

១. ខ្សែប្រយុទ្ធ Ali Daei (អ៊ីរ៉ង់)

កីឡាករ Ali Daei ត្រូវបានគេចាត់ទុកជាកីឡាករល្អបំផុតនៅទ្វីបអាស៊ីកាលពីឆ្នាំ២០០៩។ លើសពីនេះទៅទៀត ការរកបាន១០៩គ្រាប់សម្រាប់ក្រុមជម្រើសជាតិអ៊ីរ៉ង់ក៏បានធ្វើឱ្យគេក្លាយជាអ្នករកគ្រាប់បាល់ឱ្យជម្រើសជាតិបានច្រើនជាងគេដែរនៅលើលោកនេះ។ បុរសវ័យ៤៥ឆ្នាំនេះបានចំណាយពេល៥ឆ្នាំលេងនៅក្លិប៣ក្នុងប្រទេសអាល្លឺម៉ង់ពោលគឺ Armenia Bielefeld, Bayern Munichនិង Hertha Berlin។

២. ខ្សែបម្រើ Park Ji-Sung (កូរ៉េខាងត្បូង)

Park Ji-Sung ជាខ្សែបម្រើម្នាក់ដែលអាចលេងបានគ្រប់ទីតាំងនៅតំបន់បម្រើ ពោលគឺអាចលេងជា បម្រើស្លាប បម្រើកណ្ដាល បម្រើការពារ អ្នកចែកបាល់ និងសូម្បីតែបម្រើប្រយុទ្ធ។ កីឡាករវ័យ៣៣ឆ្នាំនេះប្រើពេលជាមួយក្លិប Manchester United អស់៧ឆ្នាំ និងជួយក្លិបបិសាចក្រហមឈ្នះពានលំដាប់ធំៗដូចជា Premier League ៤ដង និង UEFA Champions League ១ដង។

៣. ខ្សែបម្រើ Hidetoshi Nakata (ជប៉ុន)

Nakata ជាខ្សែបម្រើជាប់ជម្រើសជាតិជប៉ុនតាំងពី U17 រហូតមកដល់ឆ្នាំ២០០៦ទើបរូបគេលាឈប់ពីជម្រើសជាតិជប៉ុន។ កីឡាករវ័យ៣៧ឆ្នាំរូបនេះក៏បានលេងនៅអឺរ៉ុបផងដែរ ដូចជានៅក្លិប Roma ជាដើម។ កាលនៅ Roma បុរសម្នាក់នេះបានជួយក្លិបនេះឱ្យបានចូលលេងនៅលីកកំពូល Serie A របស់អ៊ីតាលីផងដែរ។

៤. ខ្សែបម្រើ Shinji Kagawa (ជប៉ុន)

Kagawa ជាប់ឈ្មោះក្នុងបញ្ជីនេះ ដោយសារតែកាលគេលេងនៅ Borussia Dortmund ដំបូង អាចជួយក្លិបនៅអាល្លឺម៉ង់មួយនេះឈ្នះពាន Bundesliga ២ដងជាប់ៗគ្នា។ មួយវិញទៀតនោះគឺពេលខ្សែបម្រើរូបនេះផ្លាស់មកលេងនៅក្លិប Man Utd ក៏បានជួយក្លិបនេះឈ្នះពានរង្វាន់ Barclays Premier League ម្ដងផងដែរ។

៥. ខ្សែប្រយុទ្ធ Sami Aljaber (អារ៉ាប៊ីសាអ៊ូឌីត)

Sami Aljaber ជាកីឡាករដ៏អស្ចារ្យម្នាក់ពេលចំណាយពេល២០ឆ្នាំជាមួយក្លិប Al Hilal និងរកបាន១៤៣គ្រាប់ក្នុង៣០៥ប្រកួត។ សម្រាប់ជម្រើសជាតិវិញខ្សែប្រយុទ្ធរូបនេះបានជួយប្រទេស អារ៉ាប៊ីសាអ៊ូឌីតអាចឈានដល់វគ្គជម្រុះតាមទ្វីបលើកទី២នៅ World Cup ឆ្នាំ១៩៩៤។ សព្វថ្ងៃបុរសវ័យ៤១ឆ្នាំនេះមានតួនាទីជាអ្នកចាត់ការនៅក្លិប Al-Arabi។

៦. ខ្សែបម្រើការពារ Mehdi Mahdavikia (អ៊ីរ៉ាក់)

Mehdi Mahdavikia ត្រូវបានជាប់ឈ្មោះជាកីឡាករល្អបំផុតនៅអាស៊ីនៅឆ្នាំ២០០៣។ បុរសវ័យ៣៧ឆ្នាំនេះចំណាយពេល៨ឆ្នាំជាមួយក្លិប Hamburger SV របស់អាល្លឺម៉ង់។ កីឡាករជាប់ជម្រើសជាតិអ៊ីរ៉ាក់តាំងពី U20 រូបនេះ អាចលេងទាំងការពារស្ដាំ បម្រើកណ្ដាល និងបម្រើស្លាប។

៧. ខ្សែបម្រើ Shunsuke Nakamura (ជប៉ុន)

Nakamura ជាខ្សែបម្រើដែលមានឈ្មោះល្បីខាងទាត់បាល់ (Free Kick) ។ ការជោគជ័យធំបំផុតរបស់ខ្សែបម្រើវ័យ៣៦ឆ្នាំនេះគឺពេលគេលេងនៅក្លិប Glasgow Celtic របស់ប្រទេសស្កុតឡែនចន្លោះឆ្នាំ២០០៥-២០០៩។ រយៈពេល៤ឆ្នាំនៅទឹកដីស្កុតឡែន Nakamura បានជួយក្រុមឈ្នះពានរង្វាន់ Scottish League បាន៣ដង។

៨. ខ្សែការពារ Hong Myung-Bo (កូរ៉េខាងត្បូង)

Hong Myung-Bo ជាកំពូលខ្សែការពាររបស់ជម្រើសជាតិកូរ៉េខាងត្បូងរយៈពេល១២ឆ្នាំ ហើយកាលពី World Cup ២០០២ រូបលោកក៏បានជួយក្រុមឱ្យឡើងដល់វគ្គពាក់កណ្ដាលព្រ័ត្រ និងទទួលបានចំណាត់ថ្នាក់លេខ៤ផងដែរ។

៩. ខ្សែប្រយុទ្ធ Paulino Alcantara (ហ្វីលីពីន)

Alcantara ជាកីឡាករម្នាក់គត់របស់អាស៊ីអាគ្នេយ៍ដែលអាចជាប់ក្នុងបញ្ជីឈ្មោះកីឡាករល្អបំផុតរបស់អាស៊ីនេះ។ ខ្សែប្រយុទ្ធរូបនេះបានចូលលេងនៅ Barcelona តាំងពីអាយុ១៥ឆ្នាំ និងចំណាយពេល១៥ឆ្នាំនៅក្លិបនេះ។ សព្វថ្ងៃបុរសរូបនេះបានស្លាប់បាត់ទៅហើយក្នុង ទីក្រុង Barcelona ទឹកដីរបស់ប្រទេសអេស្ប៉ាញ។ (ព័ត៌មានលម្អិតទាក់ទងនឹងប្រវត្តិរូបរបស់ Alcantara, Sabay នឹងផ្សាយជូននាពេលបន្ទាប់)

១០. ខ្សែប្រយុទ្ធ Kazuyoshi Miura (ជប៉ុន)

Kazuyoshi ត្រូវបានគេស្គាល់ថាជាវីរបុរសរបស់ប្រទេសជប៉ុនដោយបានជួយជម្រើសជាតិជប៉ុនឈ្នះពានរង្វាន់ Asian Cup នៅឆ្នាំ១៩៩២។ ការបង្ហាញខ្លួនឱ្យជម្រើសជាតិ៨៩ដង ខ្សែប្រយុទ្ធវ័យ៤៧ឆ្នាំនេះអាចរកគ្រាប់បាល់បាន៥៥គ្រាប់។

ចំណែកប្រិយមិត្តវិញ គិតថាកីឡាករអាស៊ីណាខ្លះទៀតដែលសមនឹងចូលក្នុងបញ្ជីខាងលើ?

*ចុចអានព័ត៌មានកីឡាបាល់ទាត់អាស៊ីជាច្រើនទៀត

អត្ថបទ៖ សុខ មុន្នីរម្យ

ប្រភព៖ andrzejpavlov