មើលចុះ!...ខេមរៈ សិរីមន្ត ក៏បានជួយ លោក នូ ស៊ឹប និង តា មឿក ដែរ
- 2015-02-02 18:01:06
- ចំនួនមតិ 0 | ចំនួនចែករំលែក 0
មើលចុះ!...ខេមរៈ សិរីមន្ត ក៏បានជួយ លោក នូ ស៊ឹប និង តា មឿក ដែរ
ចន្លោះមិនឃើញ
អ្នកនិពន្ធ ខេមរៈ ភារុន បាននាំយកថវិកាមួយចំនួន ជាទឹកចិត្តសប្បុរសធម៌ពីតារាចម្រៀង ខេមរៈ សិរីមន្ត ជាប្អូនប្រុសបង្កើត ដើម្បីជួយឧបត្ថម្ភដល់សិល្បករជើងចាស់ លោក នូ ស៊ឹប និង លោកតា ផ្លុង មឿក កាលពីម្សិលមិញនេះ។
អ្នកនិពន្ធខាងលើ ប្រាប់ Sabay នៅព្រឹកនេះថា ដោយសារប្អូនប្រុសរបស់លោក កំពុងមមាញឹកច្រៀងតាមខេត្ត ទើបមិនអាចទៅជួបរៀមច្បងសិល្បៈទាំងពីររូបខាងលើបាន។ ប៉ុន្តែតារាចម្រៀងរូបនេះ សម្ដែងការភ្ញាក់ផ្អើលចំពោះព័ត៌មានចុះផ្សាយ ពេលឃើញតារាចម្រៀងជើងចាស់ម្នាក់ ដែលមានកេរ្តិ៍ឈ្មោះល្បីសុះសាយស្ទើរពាសពេញផ្ទៃប្រទេស កំពុងរស់នៅក្នុងភាពលំបាក។
ខេមរៈ ភារុន និយាយថា៖ "ខ្ញុំទូសព្ទប្រាប់រឿងនេះ ទៅប្អូនប្រុសរបស់ខ្ញុំ ហើយគេបានសម្រេចចិត្តភ្លាមៗ ឲ្យយកថវិកាជួយដល់ពូកគាត់បណ្ដោះអាសន្នសិន"។ លោកបន្តថា រៀមច្បងសិល្បករខាងលើបានទទួលថវិកាក្នុងម្នាក់ ៤០០. ០០០ (សែសិបម៉ឺន) រៀល ដើម្បីសម្រួលដល់ការលំបាកក្នុងគ្រានេះ។
លោកបានអះអាងថា ខេមរៈ សិរីមន្ត មានគម្រោងទៅដល់ផ្ទះរបស់លោកតា ផ្លុង មឿក ក្នុងបុរីសន្តិភាព ២ និង បន្ទប់ជួលរបស់លោក នូ ស៊ឹប នៅម្ដុំភូមិចំរើនផល ខាងមុខមន្ទីរពេទ្យរុស្សី បន្ទាប់ពីរួចដៃចម្រៀងតាមខេត្ត។ តារាចម្រៀងល្បីរូបនេះ អាចស្វែងយល់ពីទុក្ខលំបាករបស់សិល្បកររៀមច្បង និង លៃលកជួយតាមលទ្ធភាពបន្ត ដូចពេលកន្លងទៅ រូបគេតែងឈឺឆ្អាលជួយដល់ស្ដេចចាប៉ីលោកតា ប្រាជ្ញ ឈួន និងលោកយាយ ខ្លី (យាយខ្លីកាលនៅមានជីវិត) ក៏ដូចជាចាស់ជរាផ្សេងទៀតផងដែរ។
លោកបន្តថា៖ “ខ្ញុំគិតថា នេះជាសន្តានចិត្តដ៏ល្អរបស់ប្អូនប្រុសខ្ញុំ ខេមរៈ សិរីមន្ត តែងតែមានចិត្តសប្បុរសធម៌ជួយដល់សិល្បករចាស់ៗកន្លងមកដែលជួបបញ្ហាជីវភាព ដោយសារជំងឺ ឬគ្រោះថ្នាក់ផ្សេងៗជាដើម"។
អ្នកនិពន្ធរូបនេះ អះអាងថា រូបលោក និង ខេមរៈ សិរីមន្ត មានគម្រោងបង្កើតជាសមាគមមួយនាពេលអនាគត ដើម្បីជួយសិល្បៈទីទ័ល ប្រសិនបើមានលទ្ធភាពគ្រប់គ្រាន់។ នេះជាការសាបព្រោះវប្បធម៌ នៃការចែករំលែកជួយគ្នាទៅវិញទៅមក នៅក្នុងសង្គមសិល្បៈ ព្រោះអ្នកសិល្បៈមិនមានប្រាក់ខែ រស់បានអាស្រ័យប្រជាប្រិយភាព៕
អានអត្ថបទ៖ រឿងដើមទ្រូង អូន ម៉ី រងការរិះគន់ខ្លាំង ពីសាច់ញាតិ
អានអត្ថបទ៖ តារាមានវ័យកាន់តែជ្រេ តែមិនទាន់នឹកនារឿងគូស្រករ