ទោសទណ្ឌធ្ងន់ធ្ងរ និងតម្លៃផាកពិន័យខ្ពស់បំផុត ក្នុងច្បាប់ចរាចរណ៍ថ្មី

2015-02-02 18:37:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ច្បាប់ចរាចរណ៍ថ្មី ដែលមាន ១២ ជំពូក និង៩២ មាត្រា នឹងត្រូវចូលជាធរមាននៅខែមីនានេះ។ យ៉ាងណាមិញមុនដាក់ឲ្យអនុវត្ត ច្បាប់ថ្មីនេះ សមត្ថកិច្ចនឹងត្រូវផ្សព្វផ្សាយទៅសាធារណៈជនតាមការកំណត់។ នេះបើតាមគេហទំព័រនគរបាលជាតិ ដែលដកស្រង់ប្រសាសន៍ លោក ហ៊ឹម យ៉ាន ប្រធាន នាយកដ្ឋានកណ្តាល នគរបាលសណ្ដាប់ធ្នាប់សាធារណៈ កាលពីសបា្តហ៍មុន។ មានមាត្រាមួយចំនួនបានកំណត់ ទោសខណ្ឌ និងតម្លៃផាកពិន័យច្រើនបំផុត ដែលគ្រប់គ្នាត្រូវតែដឹង៖

មាត្រា ៨៣ ៖ ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោក បណ្តាលឲ្យមានរបួសដល់អ្នកដទៃ ហើយបណ្តាលឲ្យរងគ្រោះអសមត្ថភាព ធ្វើការងារក្នុងរយៈពេលស្មើ ឬលើសពី៨ ថ្ងៃគិតពីថ្ងៃកើតហេតុ ត្រូវផ្ដន្ទាទោសដាក់ពន្ធនាគារពី ៦ ខែ ដល់ ២ ឆ្នាំ និងពិន័យជាប្រាក់ ២លានរៀល ទៅដល់ ១០ លានរៀល និងអាចត្រូវត្រូវផ្ដន្ទាទោស ដោយទោសបន្ថែមមួយ ឬច្រើនដូចមានចែងក្នុងមាត្រា ៥៣ (ប្រភេទនៃទោសបន្ថែម) នៃក្រមព្រហ្មទណ្ឌ។

អំពើល្មើសខាងលើនេះ ត្រូវផ្ដន្ទាទោសដាក់ពន្ធនាគារពី ១ ឆ្នាំ ដល់ ៣ ឆ្នាំ និងពិន័យជាប្រាក់ ៤ លានរៀល ទៅដល់ ១៥ លានរៀល កាលបើអំពើនេះបានប្រព្រឹត្តិ ក្នុងករណីណាមួយដូចខាងក្រោម៖ ក)បើកបរ ដោយគ្មានបណ្ណបើកបរ ឬមានបណ្ណបើកបរតែមិនត្រឹមត្រូវ តាមប្រភេទយានយន្ត។ ខ) ស្ថិតនៅក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ មីលីក្រាមក្នុងមួយលីត្រខ្យល់ ឬចាប់ពី ០,៨០ ក្រាមក្នុងមួយលីត្រឈាមឡើងទៅ។ គ)បណ្តាលឲ្យរបួសច្រើនគ្នា។ ឃ)រត់គេចពីកន្លែងកើតហេតុ ក្នុងគោលបំណងគេចវេសពីការទទួលខុសត្រូវ។

មាត្រា ៨៥ ៖ ជនណាបើកបរដោយធ្វេសប្រហែស ខ្ជីខ្ជា មិនប្រុងប្រយ័ត្ន ឬមិនគោរពកាតព្វកិច្ច ដែលបទប្បញ្ញត្តិស្តីពីចរាចរណ៍ផ្លូវគោក បណ្តាលឲ្យស្លាប់អ្នកដទៃ ត្រូវផ្ដន្ទាទោសដាក់ពន្ធនាគារពី ១ ឆ្នាំ ដល់ ៣ ឆ្នាំ និងពិន័យជាប្រាក់ ៤ លានរៀល ទៅដល់ ១៥ លានរៀល និងអាចត្រូវត្រូវផ្ដន្ទាទោស ដោយទោសបន្ថែមមួយ ឬច្រើនដូចមានចែងក្នុងមាត្រា ៥៣ (ប្រភេទនៃទោសបន្ថែម) នៃក្រមព្រហ្មទណ្ឌ។

អំពើល្មើសខាងលើនេះ ត្រូវផ្ដន្ទាទោសដាក់ពន្ធនាគារពី ២ ឆ្នាំ ដល់ ៥ ឆ្នាំ និងពិន័យជាប្រាក់ ១០ លានរៀល ទៅដល់ ២៥ លានរៀល កាលបើអំពើនេះបានប្រព្រឹត្តិ ក្នុងករណីណាមួយដូចខាងក្រោម៖ ក)បើកបរ ដោយគ្មានបណ្ណបើកបរ ឬមានបណ្ណបើកបរតែមិនត្រឹមត្រូវ តាមប្រភេទយានយន្ត។ ខ) ស្ថិតនៅក្នុងស្ថានភាពស្រវឹង ដោយមានអត្រាជាតិអាល់កុលចាប់ពី ០,៤០ មីលីក្រាមក្នុងមួយលីត្រខ្យល់ ឬចាប់ពី ០,៨០ ក្រាមក្នុងមួយលីត្រឈាមឡើងទៅ។ គ)បណ្តាលឲ្យរបួសច្រើនគ្នា។ ឃ)រត់គេចពីកន្លែងកើតហេតុ ក្នុងគោលបំណងគេចវេសពីការទទួលខុសត្រូវ។

អត្ថបទ៖មៃ សុខលីម