ប្រធានប្រតិភូដាក់នាមម្ចាស់មេដាយមាស ស៊ន សៀវម៉ី ជាវីរនារីកម្ពុជា

2014-10-04 00:30:11
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយកីឡាការិនីតេក្វាន់ដូ ស៊ន សៀវម៉ី របស់កម្ពុជាឈ្នះមេដាយមាស នៅក្នុងព្រឹត្តិការណ៍កីឡាធំប្រចាំទ្វីបអាស៊ី Asian Games លើប្រភេទទម្ងន់ក្រោម ៧៣ គីឡូក្រាមនារសៀលនេះ ដែលកំពុងតែរៀបចំនៅឯប្រទេសកូរ៉េខាងត្បូង លោក ញ៉ាណ សុខវិសាល ប្រធានប្រតិភូក្រុមកីឡាកម្ពុជា បានចាត់ទុកនាងជាវីរនារីរបស់កម្ពុជា។

សៀវម៉ី លើកទង់ជាតិក្រោយឈ្នះមេដាយ

លោកបានសង្កត់ធ្ងន់ថា៖ «ក្នុងនាមខ្ញុំជាប្រធានប្រតិភូនាយបេសកកម្ម ខ្ញុំសូមប្រសិទ្ធនាម នាងថាជាវិរៈនារីរបស់កម្ពុជា»។ លោកបន្តថា «កីឡាការិនី រូបនេះហើយដែលធ្វើអោយភ្លេងនគររាជ (ភ្លេងជាតិខ្មែរ) បន្លឺសំឡេងនៅលើឆាកអន្តរជាតិ មានប្រទេសចំនួន ៤៥ ក្រោកឈរគោរពភ្លេងជាតិយើង... អស់រយះកាល ៤៤ ឆ្នាំហើយដែលកម្ពុជាពុំធ្លាប់បានមេដាយក្នុងការប្រកួតថ្នាក់ទ្វីប (Asian Games) ទាល់តែសោះ»។

កម្ពុជា បានបញ្ជូនអត្តពលិកចំនួន ២១ នាក់ទៅចូលរួមប្រកួតកីឡា Asian Games 2014 នេះក្នុងចំណោមកីឡា ៧ ប្រភេទ ប៉ុន្ដែមានតែម្នាក់ប៉ុណ្ណោះដែលឈ្នះមេដាយ ខណៈអ្នកផ្សេងត្រូវហាលអាវអស់ហើយ។ កម្មវិធីនេះមានអត្តពលិកជិត ១ ម៉ឺននាក់មកពី ៤៤ ប្រទេសប្រចាំទ្វីបអាស៊ីចូលរួមប្រកួតប្រជែងលើកីឡាចំនួន ៣៦ ប្រភេទ និង ៤៣៩ វិញ្ញាសាកីឡា រៀបចំនៅទីក្រុង Incheon ចាប់ពីថ្ងៃទី ១៩ កញ្ញា រហូតដល់ ៤ តុលា ឆ្នាំ ២០១៤៕

អត្ថបទពាក់ព័ន្ធ៖ យូ ជិនហុង វីរបុរសនាំមេដាយពី Asian Games ជូនកម្ពុជាមុនគេ តាំងពីឆ្នាំ ១៩៦២

អត្ថបទ៖ ម៉ឺន រស្មី