​ចំណង​ដៃ​ថ្មី​ពី​ផលិតកម្ម Rock ស្វាគមន៍​ដើម២០១៥ និង​ត្រៀម​សម្រាប់​ថ្ងៃ​នៃ​ក្ដី​ស្រឡាញ់​រឿង "អូន​ជា​ការ​ចងចាំ​បង" ឬ "You' re My Memory” ត្រូវ​បាន​បើក​សម្ពោធ​រួច​ហើយ​នា​យប់​មិញ​នៅ​រោងភាពយន្ត Platinum Cineplex។

"You' re My Memory” គឺ​ជា​រសជាតិ​ថ្មី​មួយ​ទៀត​ក្នុង​វិស័យ​ភាពយន្ត​ខ្មែរ​និយាយ​ពី​ចំណង​ស្នេហ៍​ដ៏​ផ្អែមល្ហែម និង​រ៉ូមែនទិក​មួយ​របស់​យុវវ័យ​ពីរ​គូ​សុទ្ធ​តែ​វ័យ​ក្មេង និង​ស្អាត​ៗ។ គូ​ទី​១ គឺ​កញ្ញា នៅ ម៉ារីសា និង​លោក ខាត់ វ៉ៃហាំង គូ​ទី​២ គឺ​អតីត​ស្រី​ស្អាត​លេខ​១ឆ្នាំ ២០១៣ កញ្ញា ស៊ិន យូបិន និង​លោក ជា លាង​ឈែ។

មិន​ត្រឹម​តែ​ឆ្លុះ​បង្ហាញ​ស្នេហា​យុវវ័យ ប៉ុន្តែ​ភាពយន្ត​ដែល​និពន្ធ​ដោយ​យុវវ័យ​មួយ​នេះ នៅ​មាន​ពិពណ៌នា​ពី​សកម្មភាព​នានា​ដែល​ពាក់​ព័ន្ធ​នឹង​យុវវ័យ បង្កប់​ការ​អប់​រំ​ថែម​ទៀត។ លោក យឹម សុសត្យា នាយក​គ្រប់​គ្រង​ការ​ផលិត​នៃ​ផលិតកម្ម Rock ថ្លែង​ថា នេះ​គឺ​ជា​បេសកកម្ម​ដ៏​សំខាន់​មួយ​របស់​ផលិតកម្ម Rock ដោយ​មិន​ត្រឹម​ការ​កម្សាន្ត តែ​នៅ​ផ្ដល់​ការ​អប់រំ​ទៀត ព្រោះ​ថា ការ​អប់រំ គឺ​នៅ​ជាប់​នឹង​ជីវិត​រស់​នៅ​ប្រចាំ​ថ្ងៃ​របស់​យើង​គ្រប់​គ្នា។

“ហើយ​នេះ​គឺ​ជា​រសជាតិ​ដ៏​ប្លែក​មួយ ផលិតកម្ម Rock គឺ​នឹង​ផ្ដល់​ជូន​ប្រិយមិត្ត​គ្រប់​រសជាតិ​ទាំង​អស់ រឿង​កំប្លែង​សើច​សប្បាយ​ក៏​យើង​ធ្លាប់​ធ្វើ បាញ់​ប្រហារ​ក៏​ធ្វើ ឥឡូវ​រឿង​ឈាន​មក​រឿង​មនោសញ្ចេតនា​លន្លង់លន្លោច​ទៀត។ រឿង​សើច​សប្បាយ​ក៏​យើង​នៅ​តែ​ធ្វើ​ដែរ ប៉ុន្តែ​យើង​ចង់​ផ្ដល់​ឲ្យ​ប្រិយមិត្ត​ទទួល​បាន​គ្រប់​រសជាតិ​សិន"។ លោក បន្ថែម។

លោក យឹម សុសត្យា (រូប​កណ្ដាល) នាយក​គ្រប់​គ្រង​ការ​ផលិត​របស់​ផលិតកម្ម Rock

បន្ទាប់​ពី​រឿង​នេះ Rock ត្រៀម​នឹង​បញ្ចេញ​ផលិតផល​ភាពយន្ត​ជា​ច្រើន​ទៀត មាន​ទាំង​រឿង​ដុំ រឿង​ភាគ និង​រឿង​ខ្នាត​ធំ។ លោក សត្យា បញ្ជាក់​ថា ចំពោះ​ខ្នាត​ធំ​ផលិតកម្ម Rock បាន​បែង​ចែក​ជា​ពីរ​ទៀត គឺ​ខ្នាត​ធំ​សម្រាប់​ទីផ្សារ​ក្នុង​ស្រុក និង​ភាពយន្ត​ធំ​សម្រាប់​ក្នុង​ស្រុក​ផង និង​ក្រៅ​ស្រុក​ផង ហើយ​ទាំង​អស់​នេះ នឹង​បង្ហាញ​ខ្លួន​បន្ត​បន្ទាប់។

“You' re My Memory” គឺ​ជា​ភាពយន្ត​ប្រភេទ​មួយ​រឿង​ចប់​ទី​១​របស់​ផលិតកម្ម Rock និយាយ​ពី​ស្នេហា​ដ៏​រ៉ូមែនទិក​របស់​យុវវ័យ។ ប៉ុន្តែ​ក៏​ជា​ភាពយន្ត​ស្នាដៃ​ទី​១​របស់​អ្នក​និពន្ធ​វ័យ​ក្មេង​ដ៏​ស្រស់​ស្អាត​មួយ​រូប​ដែរ គឺ​កញ្ញា ស៊ា រស្មី។

កញ្ញា ថ្លែង​ថា ដោយ​សារ​ជា​ស្នាដៃ​ដំបូង អាច​នឹង​មិន​ល្អ​ឥត​ខ្ចោះ​នោះ​ទេ ប៉ុន្តែ​ស្នើ​ឲ្យ​ប្រិយមិត្ត​ចូល​រួម​ទស្សនា និង​វាយ​តម្លៃ​ទាំង​អស់​គ្នា។ កញ្ញា បន្ត​ថា ការ​គាំទ្រ​របស់​ប្រិយមិត្ត គឺ​ការ​បណ្ដុះ​ថាមពល​គំនិត និង​ស្មារតី​ក្នុង​ការ​បន្ត​កិច្ចការ​ផ្ដល់​ការ​កម្សាន្ត​នេះ​ត​ទៅ​ទៀត។

http://youtu.be/eAjZyFcKKmk

បន្ទាប់​បើក​សម្ពោធ​យប់​មិញ​នេះ​យ៉ាង​គគ្រឹកគគ្រេង "អូន​ជា​ការ​ចង​ចាំ​​បង" ឬ "You' re My Memory” នឹង​ដាក់​បញ្ចាំង​ផ្លូវ​ការ​ចាប់​ពី​ថ្ងៃ​ទី ០៦ កុម្ភៈ​ត​ទៅ។ ប្រិយមិត្ត​អាច​ស្វែង​រក​ការ​ទស្សនា​បាន​នៅ​រោង​ភាពយន្ត​នានា​មាន Major Cineplex By Cellcard, Platinum Cineplex និង Legend គ្រប់​សាខា...៕

អត្ថបទ៖ ថ្មី…!ភាពយន្ត​ខ្មែរ “You Are My Memory” ត្រៀម​សម្រាប់​បុណ្យ​នៃ​សេចក្ដី​ស្រឡាញ់

(រាប់​ពី​ឆ្វេង)លោក ខាត់ វ៉ៃ​ហាំង កញ្ញា ស៊ិន យូប៊ិន លោក ជា លាង​ឈែ និង​លោក អេឡិច ហ្សូរ៉ា

អត្ថបទ៖ ទារិកា