ជា វុឌ្ឍី និស្សិតខ្មែរក្មេង តែពូកែរៀនជំនាញវេចខ្ចប់អាហារដល់អឺរ៉ុប

2015-02-04 16:01:34
ចំនួនមតិ 0 | ចំនួនចែករំលែក 0

ចន្លោះមិនឃើញ

និស្សិតឆ្នាំទី៣ នៃសាកលវិទ្យាល័យភូមិន្ទកសិកម្ម ជំនាញកសិឧស្សាហកម្ម ជា វុឌ្ឍី វ័យ២៣ឆ្នាំ ជាយុវជនខ្មែរដំបូងគេ បានជាប់អាហារូបករណ៍ទៅសិក្សាស្រាវជ្រាវលើសំបកវេចខ្ចប់ចំណីអាហារ ឬ “Food Packaging” រហូតដល់ប្រទេសអេស្ប៉ាញឯណោះ។

ក្នុង អំឡុងពាក់កណ្ដាលឆ្នាំ២០១៣ វុឌ្ឍី បានដាក់ពាក្យសុំអាហារូបករណ៍ Eramus Mundus តាម Online ដោយជ្រើសរើសយកប្រទេសអេស្ប៉ាញជាជម្រើសទី១ ប្រទេសអូទ្រីសជាជម្រើសទី២ និងប្រទេសបារាំងជាជម្រើសទី៣។ ដោយសារតែនៅសាកលវិទ្យាល័យ Girona ក្នុងប្រទេសអេស្ប៉ាញមានមុខវិជ្ជាដែលស្រដៀងនឹងជំនាញរបស់ខ្លួន កំពុងសិក្សាសព្វថ្ងៃក្នុងប្រទេសកម្ពុជា ទើបយុវជនរូបនេះសង្ឃឹមជាប់ច្រើន។ ក្ដីសង្ឃឹមក៏កើតមានដូចបំណង វុឌ្ឍី បានជាប់អាហារូបករណ៍ទៅសិក្សានៅសាកលវិទ្យាល័យនោះមែន។

នៅ ខែកញ្ញា ពេលទៅដល់ប្រទេសអេស្ប៉ាញ វុឌ្ឍីត្រូវបានសាកលវិទ្យាល័យនោះកំណត់ឲ្យធ្វើការសិក្សាស្រាវជ្រាវ លើប្រធានបទ “សំបកវេចខ្ចប់អាហារ” ឬ “Food Packaging”។ និស្សិតរូបនេះបានឲ្យដឹងថា៖ “ប្រធានបទនោះស្រដៀងនឹងអ្វីដែលខ្ញុំបានរៀន។ ខ្ញុំមិនជំទាស់នឹងការដាក់ប្រធានបទនោះទេ ដោយសារតែមានការជួយណែនាំពីសាស្ត្រាចារ្យនៅសាកលវិទ្យាល័យ Gironaផង និងសាកលវិទ្យាល័យភូមិន្ទកសិកម្ម ដែលជាអ្នកដឹកនាំផង។ ហើយអ្វីដែលពិសេសនោះ មិនទាន់មាននិស្សិតខ្មែរណាម្នាក់ស្រាវជ្រាវពីវានៅឡើយទេ”។

គម្រោង ស្រាវជ្រាវនេះត្រូវធ្វើឡើងរយៈពេល១០ខែ ហើយត្រូវសរសេរជាភាសាអង់គ្លេស។ សម្រាប់ការសិក្សាស្រាវជ្រាវនោះ ផ្ដោតសំខាន់ទៅលើការផលិតសំបកប្លាស្ទិកវេចខ្ចប់អាហារប្រកបដោយគុណ ភាព មិនប៉ះពាល់ដល់សុខភាព និងមិនជ្រាបទឹក។

វុឌ្ឍី បានប្រាប់ឲ្យដឹងទៀតថា៖ “ដោយសារសំបកវេចខ្ចប់ ដែលមាននៅក្នុងទីផ្សារភាគច្រើនត្រូវបានផលិតឡើងដោយប្រើប្រាស់ ប្លាស្ទិកស្ទើរតែ១០០% ទើបខ្ញុំធ្វើការសិក្សាពីវា ដោយកាត់បន្ថយបរិមាណប្លាស្ទិក តាមរយៈការលាយជាមួយកាកសរសៃ Fiber ដែលមានក្នុងដើមរុក្ខជាតិ ហើយធ្វើប្រៀបធៀប ថាតើការប្រើប្រាស់ប្លាស្ទិកសុទ្ធ និងការប្រើប្រាស់ប្លាស្ទិកតិច ដោយលាយជាមួយរុក្ខជាតិសម្រាប់វេចខ្ចប់អាហារ មួយណាល្អ ព្រមទាំងចំណាយលើវត្ថុធាតុដើមតិចជាង”។

យ៉ាងណា មិញ ការសិក្សាស្រាវជ្រាវនេះត្រូវពឹងផ្អែកលើការពិសោធច្រើន ទើបធ្វើឲ្យ វុឌ្ឍី ត្រូវចំណាយពេលនៅមន្ទីរពិសោធស្ទើររាល់ថ្ងៃ ក៏ប៉ុន្តែយុវជនរូបនេះនឹងបន្តការស្រាវជ្រាវនៅតាមរោងចក្រមួយ ចំនួនដែលពាក់ព័ន្ធនឹងការផលិតសំបកវេចខ្ចប់ក្នុងប្រទេសអេស្ប៉ាញ ផងដែរ។ បន្ទាប់ពីធ្វើការសិក្សាស្រាវជ្រាវបានប្រមាណជា៦០% វុឌ្ឍីបានលើកឡើងថា ការផលិតថង់ប្លាស្ទិកគឺគេតម្រូវទៅតាមការប្រើប្រាស់ខុសៗគ្នា។

យុវជន រូបនេះ បន្តទៀតថា៖ “ប្រជាជនខ្មែរមួយចំនួនមានការខ្វះចន្លោះចំពោះរឿងនេះ។ ថង់ប្លាស្ទិកក្រាស់ ឬស្ដើងគឺមានការប្រើប្រាស់ និងគុណភាពខុសគ្នា។ អ្នកខ្លះប្រើថង់ប្លាស្ទិកដែលស្ដើងច្រកទឹកសម្លក្ដៅ វាអាចនឹងប៉ះពាល់ដល់សុខភាព។ ម្យ៉ាងទៀត សំបកវេចខ្ចប់ ឬថង់ប្លាស្ទិកដែលផលិតចេញពីប្លាស្ទិក១០០% វាអាចប៉ះពាល់ដល់បរិស្ថានទៀតផង ព្រោះវាមិនងាយផុយរលួយ”។

បន្ទាប់ ពីបញ្ចប់ការសិក្សាស្រាវជ្រាវនោះ វុឌ្ឍីនឹងឡើងបកស្រាយនៅសាកលវិទ្យាល័យ Girona ហើយគេនឹងត្រឡប់មកប្រទេសកម្ពុជាវិញ ដោយយកស្នាដៃនោះ មកបញ្ចប់ថ្នាក់បរិញ្ញាបត្ររបស់ខ្លួនផង និងទុកជាឯកសារផ្នែកចំណេះដឹងថ្មីមួយផង ដល់អ្នកសិក្សាស្រាវជ្រាវជំនាន់ក្រោយ។

ម្យ៉ាងវិញទៀត រូបគេក៏មានគម្រោងបន្តការសិក្សាថ្នាក់អនុបណ្ឌិត លើការផលិតសំបកវេចខ្ចប់ចំណីអាហារនៅប្រទេសថៃ ឬទ្វីបអឺរ៉ុបបន្តទៀតដែរ។ “ប្រទេសថៃជាគោលដៅទីមួយ ដោយសារតែថៃនៅជាប់នឹងខ្មែរយើង ហើយផលិតផលប្រទេសនេះនាំចូលស្រុកខ្មែរភាគច្រើនជាផលិតផលវេច ខ្ចប់។ ការសិក្សាពីប្រទេសជិតខាង អាចជាការងាយស្រួលម្យ៉ាងដែរ ព្រោះស្ថានភាព ឬវត្ថុធាតុអាចនឹងប្រើប្រាស់ស្រដៀងគ្នា”។ វុឌ្ឍីបញ្ជាក់បន្ថែម។

វុឌ្ឍី ក៏សង្ឃឹមដែរថា ប្រទេសកម្ពុជានឹងមានរោងចក្រសម្រាប់ផលិតសំបកវេចខ្ចប់អាហារ ស្តង់ដារផ្ទាល់ខ្លួននៅថ្ងៃអនាគត។ ជាចុងក្រោយ វុឌ្ឍីក៏បានផ្ដាំផ្ញើដល់យុវជនជំនាន់ក្រោយឲ្យខិតខំសម្រេចនូវ បំណងប្រាថ្នាដែលខ្លួនចង់បាន បើទោះបីជាជួបបរាជ័យនៅដំណាក់កាលដំបូងក៏ដោយ ហើយធ្វើការងារណាដែលល្អៗបម្រើដល់សង្គមជាតិ៕

ថី វីរៈ កូនខ្មែរក្រីក្ររៀននៅបរទេសតាំងពីអាយុ ១៤ ឆ្នាំ ចង់ក្លាយជាស្ថាបត្យករល្បីដូចវណ្ណម៉ូលីវណ្ណ

កញ្ញារូបស្រស់សុខចិត្តចោលការងារក្នុងម៉ាស៊ីនត្រជាក់មកលក់ទឹកសណ្ដែកខ្មែរ

អត្ថបទ៖ ផល្លា សុម៉ាលីណា