ក្ដីស្រលាញ់ឪពុកចំពោះកូនមានពិត ទោះស្លាប់ខ្លួនមិនប្រែ
- 2015-02-04 17:48:05
- ចំនួនមតិ 0 | ចំនួនចែករំលែក 0
ក្ដីស្រលាញ់ឪពុកចំពោះកូនមានពិត ទោះស្លាប់ខ្លួនមិនប្រែ
ចន្លោះមិនឃើញ
ក្ដីស្រលាញ់របស់ឪពុកម្ដាយសុទ្ធតែធំធេងមិនអាចកាត់ថ្លៃបាន និងមិនអាចសងរួចបើទោះប្រើវិធីបែបណាក៏ដោយ។ ម្ដាយជាអ្នកបង្កើត ចិញ្ចឹមបីបាច់ថែរក្សាឲ្យកូនធំដឹងក្ដី ចំណែកឪពុកវិញមានតួនាទីបញ្ចេញពលកម្មរកស៊ីផ្គត់ផ្គង់គ្រួសារទាំងមូល។ ទោះបែបនេះក្ដី ពេលខ្លះអត់ពីម្ដាយទៅ ឪពុកត្រូវដើរតួនាទីពីរតែឯង ទាំងចិញ្ចឹមបីបាច់ថែរក្សា ទាំងបញ្ចេញញើសឈាមប្ដូរប្រាក់បន្តជីវិតរស់ទៅមុខ។
វីដេអូខ្សែរឿងខ្លីមួយ បានបង្ហាញពីឪពុកដែលគ្មានចំណេះដឹងប្រឹងរកស៊ីចិញ្ចឹមកូនតែម្នាក់ឯង ក្នុងនាមជាអ្នកនេសាទត្រី។ ដោយសារការនឿយហត់ក្នុងការងារ លោកមិនដែលបានបង្ហាញក្ដីស្រលាញ់ចេញជាសកម្មភាពណាមួយឲ្យកូនពេញចិត្តឡើយ។ ក្នុងកែវភ្នែកកូនប្រុសវិញ មើលឃើញឪពុកខ្លួនឯងដោយស្ថានភាពតឹងតែង មិនដែលឃើញស្នាមញញឹម ព្រមទាំងខ្វះភាពកក់ក្ដៅ។
ទោះជាមិនបានបង្ហាញចេញមកក្រៅក្ដី ក៏យើងអាចដឹងថា ឪពុកម្នាក់នេះពិតជាស្រលាញ់កូនខ្លួនឯងខ្លាំងណាស់។ ថ្ងៃមួយ ដោយភាពក្រខ្សត់ កូនប្រុសជាទីស្រលាញ់បានទៅលួចលុយគេ ធ្វើឲ្យលោកឪពុកខឹងយ៉ាងខ្លាំងរហូតវាយកូនទាំងឈឺចិត្តខ្លួនឯង។ ក្នុងនាមជាឪពុកម្នាក់ ធ្វើម្ដេចនឹងទ្រាំមើលស្នាមជាំពេញខ្លួនកូនដោយភាពឈឺចាប់បាន មានតែដាច់ចិត្តរកអ្វីមកលាបឲ្យកូនទាំងក្ដីបារម្ភ។
ការប្រឹងប្រែងរបស់លោកឪពុក បានសម្រេចក្ដីស្រមៃទិញផ្ទះនៅដោយខ្លួនឯង ឈប់ជួលគេដូចមុន ហើយវាជាក្ដីរំភើបសម្រាប់គ្រួសារដែលមានតែពីរនាក់ក្រោមដំបូលតែមួយ។ កូនកាន់តែធំពេញរូបពេញរាង គួរណាស់តែបានសោយសុខជាមួយគ្នា ប៉ុន្តែជាអកុសលឪពុកបានធ្លាក់ខ្លួនឈឺនៅវ័យ ៥៨ឆ្នាំ រហូតវង្វេងបាត់ការចងចាំ ពេលខ្លះរហូតភ្លេចទាំងកូនប្រុសខ្លួនឯង។ ដោយសារពិបាកក្នុងការមើលថែពេក កូនបានយកឪពុកខ្លួន ទៅផ្ញើនៅមណ្ឌលថែរក្សាមនុស្សចាស់។
ថ្ងៃមួយកូនបានទៅទាន់ ពេលឪពុកខ្លួនត្រូវគេធ្វើបាប និងប្រមាថយ៉ាងខ្លាំង បង្កើតជាភាពស្ដាយក្រោយ។ ទោះឪពុកវង្វេងក្ដី ក៏នៅពេលចងចាំឡើងវិញម្តងៗ បានឆ្លៀតសរសេរសំបុត្រមួយច្បាប់ទុកឲ្យកូនភ្ជាប់ជាមួយរូបថត បូករួមទាំងមូលប្បទានប័ត្រលុយមួយចំនួន ដែលលោកខំសន្សំទុកពាក់កណ្ដាលជីវិតមកហើយ។ ក្នុងសំបុត្រមានអត្ថន័យថា "សូមទោស! មកពីប៉ាឈឺ ធ្វើឲ្យរំខានដល់កូនយ៉ាងខ្លាំង... ប៉ាមិនចង់ភ្លេចកូនទេ ប៉ាព្យាយាមខ្លាំងណាស់ទម្រាំអាចចាំកូនបាន... កូនត្រូវចេះមើលថែខ្លួនឯង...”។
http://youtu.be/qdoKz2l-UOc
ទោះបីគ្រាន់តែជាសាច់រឿងពិតមែន ប៉ុន្តែវាបានបង្ហាញពីក្ដីស្រលាញ់របស់ឪពុក ពេលអត់ពីម្ដាយ និងការមើលថែប្រកបដោយភាពយកចិត្តទុកដាក់។ ឪពុកដាច់ចិត្តវាយឈឺរាងកាយកូន ប៉ុន្តែចិត្តខ្លួនឈឺចាប់ជាងនេះរាប់រយដង...។
ចុចអាន៖ អាចស្រក់ទឹកភ្នែក! ទឹកចិត្តឪពុកគថ្លង់រើសសំរាម ចិញ្ចឹមកូនស្រី
ដោយ៖ គង់ វិសាល