សិល្បករជាង ២០០ នាក់ត្រៀមសម្ដែងក្នុងសន្និសីទពិភពលោកស្ដីពីទេសចរណ៍ និង វប្បធម៌ យប់នេះ

2015-02-04 21:38:22
ចំនួនមតិ 0 | ចំនួនចែករំលែក 0

ចន្លោះមិនឃើញ

មានសិល្បករ-សិល្បការិនី ប្រមាណជាង ២០០ នាក់ កំពុងហាត់សម ដើម្បីត្រៀមសម្ដែងជាផ្លូវការ នៅក្នុងសន្និសីទពិភពលោក ស្ដីពីទេសចរណ៍ និង វប្បធម៌នៅយប់នេះ ធ្វើឡើងក្នុងបរិវេណលានជល់ដំរី នៃប្រាសាទអង្គរធំ។

ឯកឧត្ដម ហាប់ ទូច អគ្គនាយកបច្ចេកទេស នៃក្រសួងវប្បធម៌បានឲ្យ Sabay ដឹងមុននេះថា សន្និសីទក៏មានការចូលរួមជាអធិបតីភាពពីលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និង ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ ព្រមទាំងថ្នាក់ដឹកនាំតំណាងគណៈកម្មការអន្តរក្រសួង។ ក្នុងឱកាសនោះ ក៏មានការសម្ដែងទស្សនីយភាពសិល្បៈចំនួន ២ ម៉ោងជាប់គ្នា ដែលទាមទារឲ្យមានការចូលរួមពីសិល្បករ-សិល្បការិនី ជាច្រើននាក់ និង គ្រប់ទម្រង់ដូច្នេះ។

ឯកឧត្ដមបន្តថា សន្និសីទខាងលើរៀបចំឡើងនៅរាត្រីថ្ងៃទី ៤ និង ទី ៥ ខែ កុម្ភៈនេះ ក្នុងគោលបំណងរួមគ្នា គឺកសាងភាពជាដៃគូរវាងវិស័យវប្បធម៌ និង វិស័យទេសចរណ៍នៅកម្ពុជា ឲ្យកាន់តែមានភាពល្អប្រសើរបន្ថែមទៀត។ ឯកឧត្ដមបន្តថា វិស័យទាំងពីរនេះ មិនអាចកាត់ផ្ដាច់គ្នាបានទេ ត្រូវពឹងផ្អែកគ្នាទៅវិញទៅមក។

អគ្គនាយកបច្ចេកទេសរូបនេះបន្តទៀតថា អន្តរក្រសួងមានទិសដៅចង់ឲ្យមានការប្រើប្រាស់វិស័យទេសចរណ៍ និង វប្បធម៌ប្រកបដោយនិរន្តរភាព និង កៀរគរឲ្យមានការមកទស្សនាប្រទេសកម្ពុជាកាន់តែច្រើន ដែលឱកាសនោះជាការស្វែងយល់ពីវប្បធម៌ផងដែរ៕