ទីបំផុត...ប៊ុត សីហា ជិតចេញលទ្ធផលសម្រាប់អ្នកគាំទ្រហើយ...!!!

2015-02-05 17:07:56
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប៊ុត សីហា ជិតមានដំណឹងហើយពីសមិទ្ធផលរបស់ខ្លួននៅហង្សមាសហើយ បន្ទាប់ពីបានក្លាយជាតារាចម្រៀងអាជីពដោយស្វ័យប្រវត្តិរបស់ផលិតកម្មមួយនេះ ក្រោយជាប់ជយលាភី The Voice Cambodia ឆ្នាំទី១មក។

“ខ្ញុំបាទ ប៊ុត សីហា សូមជូនដំណឹងទៅដល់ ពុកម៉ែបងប្អូន និងមិត្តៗយុវវ័យទាំងអស់ ដែលបានគាំទ្រដល់រូបខ្ញុំបាទ ហើយក៏កំពុងតែរង់ចាំនូវ Album ថ្មីរបស់ខ្ញុំបាទផងដែរ សូមជម្រាបថា ខ្ញុំបាទនឹងចេញជា CD & VCD នៅក្នុងផលិតកម្មរស្មីហង្សមាស នៅដើមខែមេសា ជាមួយនឹងបទ បែបជាចង្វាក់ ប្រពៃណីខ្មែរ ក្នុងពេលចូលឆ្នាំខ្មែរ ឆ្នាំថ្មីខាងមុខនេះ"។ លោក ប៊ុត សីហា សរសេរប្រាប់អ្នកគាំទ្រនៅលើបណ្ដាញសង្គម Facebook។

ម្ចាស់ពាន The Voice Cambodia រូបនេះប្រាប់ Sabay ទៀតថា លោកដាច់ចិត្តសរសេរសារបង្ហោះលើ Facebook ដោយសារមានអ្នកគាំទ្រជាច្រើនចង់ដឹង និងទន្ទឹងពីរឿងនេះ។ "មានច្រើនអ្នកណាស់ ពួកគាត់ Call មកសឹងរាល់ថ្ងៃ ពេលខ្លះរវល់ពេកអត់បានលើកទៀត អីចឹងហើយទើបសរសេរប្រាប់ពួកគាត់អីចឹងទៅ ឲ្យពួកគាត់ដឹង!”។

បទចម្រៀងបើកទំព័រជាតារាចម្រៀងអាជីពរបស់យុវជនមកពីខេត្តកំពង់ស្ពឺរូបនេះ មានចំនួន២បទ សុទ្ធជាបទប្រជាប្រិយសម្រាប់រាំលេងសប្បាយៗក្នុងឱកាសបុណ្យចូលឆ្នាំថ្មីប្រពៃណីជាតិខ្មែរដែលនឹងមកដល់ខែមេសាខាងមុខ។ សីហា ប្រាប់ថា ផលិតកម្មបានផ្ដល់បទមកឲ្យលោករួចរាល់អស់ហើយ នៅតែលោកខ្លួនឯងប៉ុណ្ណោះដែលរវល់ពេក មិនទាន់លៃពេលទៅថតបាន។

រូបភាព៖ FB ប៊ុត សីហា

ទោះយ៉ាងនេះក្ដី លោកថា បទទាំងពីរហ្នឹង គឺអាចចេញពាក់កណ្ដាលខែ៣ ឬដើមខែ៤យ៉ាងយូរ។ ប៉ុន្តែជាមួយគ្នានេះ អតីតតារាចម្រៀងច្រៀងតាមរោងការរូបនេះ សុំមិនបញ្ចេញពីចំណងជើងបទចម្រៀងទាំងពីរដោយយោងទៅលើគោលការណ៍របស់ផលិតកម្ម។

ក្រៅតែពីបទចម្រៀងប្រជាប្រិយខ្មែរទាំងពីរបទទាំងពីរខាងលើ លោក ប៊ុត សីហា នៅបានប្រាប់ Sabay ទៀតថា ផលិតកម្មក៏បានឲ្យដំណឹងលោកពីបទចម្រៀងសម័យសម្រាប់យុវវ័យរួចរាល់ហើយដែរ ប៉ុន្តែលោកសុំមិននិយាយវែងឆ្ងាយក្នុងពេលនេះទេ៕

អត្ថបទ៖ បេក្ខភាព ១០ រូប កំពុងឈរជើងកន្លែងផ្សេងគ្នា ក្រោយធ្លាក់ The Voice Cambodia

អត្ថបទ៖ ទារិកា