លោក មូន ម៉ារ៉ា តារា​ចម្រៀង​ដ៏​ល្បី​ឈ្មោះ​ម្នាក់​ជំនាន់​លោក ព្រាប សុវត្ថិ និង​លោក​សាន ផានិត ដែល​បាត់​មុខ​យូរ​ហើយ​នោះ ពេល​នេះ​បាន​វិល​ចូល​សិល្បៈ​វិញ​ហើយ។ នេះ​បើ​តាម​សាមី​ខ្លួន​ប្រាប់ Sabay ផ្ទាល់។

ដំណើរ​វិល​ត្រឡប់​ចូល​សិល្បៈ​លើក​នេះ លោក មូន ម៉ារ៉ា បាន​ចូល​រួម​ជាមួយ​ផលិតកម្ម​រស្មី​ហង្សមាស។ អតីត​តារា​ចម្រៀង​ផលិតកម្ម KH រូប​នេះ ប្រាប់​ថា លោក​ទើប​តែ​បាន​ចូល​ធ្វើ​ការ​ថ្មី​ៗ​នេះ​ដែរ​ទេ ប៉ុន្តែ​មិន​ជា​តារា​ចម្រៀង​ដូច​មុន​ឡើយ គឺ​លោក​មាន​តួនាទី​ជា​អ្នក​ផលិតកម្ម​វិធី និង​ដឹក​នាំ​ថត​ស្ប៉ត​ពាណិជ្ជកម្ម​នានា​ ដោយ​បច្ចុប្បន្ន​លោក​កំពុង​ផលិត និង​ថត​ស្ប៉ត​មួយ​ចំនួន។

 លោក មូន ម៉ារ៉ា ចូល​រួម​មង្គលការ ពេជ្រ សោភា

លោក អ៊ិន ទីតូ បុគ្គលិក​ថ្នាក់​​ខ្ពស់​មួយ​រូប​របស់​ផលិតកម្ម​រស្មី​ហង្សមាស ក៏​បាន​បញ្ជាក់​ពី​បញ្ហា​នេះ​ដែរ។ លោក​ថា ម្ចាស់​បទ "កាដូ​គ្មាន​​ន័យ" រូប​នេះ​ពិត​ជា​បាន​ចូល​រួម​ជា​មួយ​ផលិតកម្ម​របស់​លោក​មែន ប៉ុន្តែ​លោក ក៏​មិន​សូវ​ដឹង​ច្បាស់​ដែរ​ពី​ការងារ​ពាក់​ព័ន្ធ​នឹង​អតីត​តារា​ចម្រៀង​រូប​នេះ ព្រោះ​មិន​សូវ​បាន​ចូល​ផលិត​កម្ម រវល់​ច្រើន​តែ​ជា​មួយ​ទូរទស្សន៍។ "បាទ...គាត់​ចូល​មែន គឺ​ដឹក​នាំ ផលិត​កម្មវិធី​អី​ហ្នឹង​ណា...ខ្ញុំ​អត់​សូវ​ច្បាស់​ដែរ ដោយ​អត់​សូវ​បាន​ចូល​ផលិតកម្ម រវល់​តែ​ជា​មួយ​ទូរទស្សន៍"។

លោក មូន ម៉ារ៉ា ធ្លាប់​បាន​សាង​កេរ្តិ៍​ឈ្មោះ​តាម​រយៈ​បទ​ចម្រៀង​ជា​ច្រើន​មាន​ដូច​ជា "សូលីដា" “អូន​ទៅ​ភ្នំពេញ" “កាដូ​ឥត​ន័យ" “ខ្វេះ​ភ្នែក​បង​ទៅ" "បង​ជា​បន្លា​ក្នុង​ទ្រូង​អូន" ជា​ដើម។ បន្ទាប់​ពី​ដក​ខ្លួន​ប្រមាណ​១០​ឆ្នាំ អតីត​តារា​ចម្រៀង​ប្រាប់​ថា​លោក បាន​ប្រកប​ការងារ​ផ្ទាល់​ខ្លួន គឺ​ប្រភេទ​ការងារ​ដូច​នឹង​ការងារ​ដែល​លោក​ទើប​ចូល​ធ្វើ​ឲ្យ​ហង្សមាស​នា​ពេល​នេះ​ដែរ។

លោក ម៉ារ៉ា មិន​បាន​និយាយ​អ្វី​វែង​ឆ្ងាយ​ទេ ដោយ​សារ​ពេល​វេលា​ខ្លី ដោយ​ស្នើ​ឲ្យ​ចាំ​ជួប​តាម​ទូរសព្ទ​វិញ។ ប៉ុន្តែ​ព្រឹក​នេះ Sabay បាន​ហៅ​ទូរសព្ទ​ទៅ លោក​ទទួល និង​បាន​ប្រាប់​ថា​កំពុង​ជាប់​ថត​ស្ប៉ត​ពាណិជ្ជកម្ម មិន​អាច​និយាយ​ទូរសព្ទ​បាន។

  លោក មូន ម៉ារ៉ា និង​គូដណ្ដឹង

បង្ហាញ​ខ្លួន​យប់​មិញ ម្ចាស់​បទ "ឆ្ងល់​ដែរ" រូប​នេះ មាន​រូបរាង​ធាត់​ជាង​មុន។ កាន់​តែ​គួរ​ឲ្យ​ចាប់​អារម្មណ៍​នោះ លោក​មាន​បណ្ដើរ​នារី​វ័យ​ក្មេង​ម្នាក់​មក​ពិសា​អាហារ​ក្នុង​ពិធី​ជប់​លៀង​អាពាហ៍ពិពាហ៍​របស់​អ្នក​នាង ពេជ្រ សោភា។ នារី​រូប​នោះ ត្រូវ​បាន​លោក ប្រាប់​ភ្លាម​ថា​ជា​គូ​ដណ្ដឹង​របស់​លោក ត្រៀម​រៀប​ការ​ក្លាយ​ជា​គូស្វាមី​ភរិយា​នឹង​គ្នា​ក្នុង​ពេល​ឆាប់​ៗ​នេះ៕

អត្ថបទ៖អស់​ទាស់…ពេជ្រ សោភា ចាប់​លើក​រ៉ូប​កូន​ក្រមុំ​រាំ​ញាក់​រង្គើ​ឆាកយប់​មិញ!!!

អត្ថបទ៖យ៉ា​ទី​ថា ឃើញ​មួយ​ប៉ុស្ដិ៍​នេះ បុរសៗ​កុំ​យល់​ច្រឡំ​

​លោក ម៉ារ៉ា ចូល​សិល្បៈ​វិញ​ហើយ​តែ​មិន​ច្រៀង​ ឥឡូវ​រំលឺក​បទ​ល្បី​ៗ​របស់​លោក​តិច​មើល៍...ហើយ​ចាំ​ប្រាប់​ចូល​ចិត្ត​បទ​ណា​ជាង​គេ!

http://youtu.be/PkgdA31iEd0

http://youtu.be/R26_aqBdMO4

http://youtu.be/vlfO1TBa94s

http://youtu.be/q2w4uaiNuXM

http://youtu.be/4heyC0p3H8I

http://youtu.be/EVcvy5S4Bms

អត្ថបទ៖ ទារិកា