ស្រីស្អាត សំបូរ ជានិច្ច លាសិល្បៈមែនទែនហើយ!

2015-02-10 16:23:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយប្រឡូកក្នុងវិស័យសិល្បៈមិនបានប៉ុន្មានផង ស្រាប់តែពេលនេះ ស្រីស្អាត កញ្ញា សំបូរ ជានិច្ច ប្រាប់ Sabay ថា បានដកខ្លួនមែនទែនហើយ ដោយងាកទៅបន្តការសិក្សាជំនាញគិលានុបដ្ឋាយិកាវិញ ដើម្បីបំពេញចិត្តឪពុកម្ដាយផង និង ជាការស្ម័គ្រចិត្តផង។

អតីតតារាម៉ូដែលរូបនេះ បានរំឭកថា កញ្ញា បានប្រឡូកក្នុងវិស័យសិល្បៈមួយរយៈខ្លីប៉ុណ្ណោះ ស្ទើរតែមិនមានអ្នកចាប់អារម្មណ៍ ឬ ស្គាល់នោះទេ។ ប៉ុន្តែនាងមានសកម្មភាពសិល្បៈច្រើនគ្រាន់បើដែរ ដូចជាទទួលបានឱកាសចូលរួមដើរបង្ហាញម៉ូដ, ថតឱ្យទស្សនាវដ្ដី និង ត្រូវបានម្ចាស់ផលិតកម្មមួយចំនួនហៅទៅថតកុនទៀតផង។ ជួនកាលស្រីស្អាតរូបនេះ បដិសេធសំណើនោះ ព្រោះមមាញឹកក្នុងការសិក្សា។

កន្លងមកនាងបានបង្ហាញជំហររឹងមាំថា មិនចូលចិត្តចំពោះការលួងលោមដោះដូរខ្លួនប្រាណជាថ្នូរទៅនឹងភាពល្បីល្បាញក្នុងនាមជាតារា។ ម្យ៉ាងទៀត ឪពុក-ម្ដាយរបស់នាង មិនសប្បាយចិត្តចំពោះការងារនេះទេ ហើយជារឿយៗតែងដាស់តឿនកូនស្រី ឱ្យដកខ្លួនចេញពីវិស័យសិល្បៈ ព្រោះអ្នកទាំងពីរខ្លាចមានបញ្ហាផ្សេងៗ។

ទោះបីជាយ៉ាងណា ការចាកចេញពីសិល្បៈនៅពេលនេះ សំបូរ ជានិច្ច មិនមានគម្រោងត្រឡប់វិញនោះទេ ព្រោះក្រោយបញ្ចប់ការសិក្សា នាងត្រូវស្វែងរកការងារធ្វើតាមមន្ទីរពេទ្យនានា ក្នុងនាមជាគិលានុបដ្ឋាយិកាម្នាក់ ឬអាចទៅបម្រើការងារជាមួយឪពុក ដែលជាគ្រូពេទ្យស្រាប់ក៏ថាបាន។ អតីតតារាម៉ូដែលរូបនេះ អះអាងថា បានយល់ខ្លះពីសង្គមសិល្បៈ ទោះមិនបាននៅយូរយ៉ាងណាក្ដី៕