៩ចំណុចទៅលេងស្រុកកំណើតដោយសុវត្ថិភាពពេលបុណ្យចូលឆ្នាំចិនខាងមុខ!
- 2015-02-11 17:25:16
- ចំនួនមតិ 0 | ចំនួនចែករំលែក 0
៩ចំណុចទៅលេងស្រុកកំណើតដោយសុវត្ថិភាពពេលបុណ្យចូលឆ្នាំចិនខាងមុខ!
ចន្លោះមិនឃើញ
ដើម្បីចូលរួមទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក នាឱកាសបុណ្យចូលឆ្នាំប្រពៃណីចិន ដែលនឹងចូលមកដល់ក្នុងពេលខាងមុខនេះ គណៈធម្មាធិការជាតិសុវត្ថិភាពចរាចរណ៍ផ្លូវគោកបានអំពាវនាវ យ៉ាងទទូចដល់បងប្អូនប្រជាពលរដ្ឋខ្មែរទាំងអស់ សូមឲ្យយកចិត្តទុកដាក់ និងប្រុងប្រយ័ត្នខ្ពស់ ចំពោះឥរិយាបទនៃការបើកបរ ជៀសវាងឲ្យបាន នូវគ្រោះថ្នាក់នានា លើដងផ្លូវ ពេលធ្វើដំណើរទៅមកស្រុកកំណើត។
ចំណុចទាំង៩ នោះមាន៖
១- មុនចាប់ផ្ដើមបើកបរយានជំនិះ អ្នកបើកបរត្រូវ ប្រកាន់ទម្លាប់ជាស្វ័យប្រវត្តិត្រួតពិនិត្យលក្ខណបច្ចេកទេសយានជំនិះ និងលើកកម្ពស់ស្មារតីប្រុងប្រយ័ត្នជានិច្ច ចំពោះគ្រោះថ្នាក់ចរាចរណ៍ដែលអាចកើតមានជាយថាហេតុនៅលើផ្លូវថ្នល់។
២-អ្នកបើកបររថយន្ត និងអ្នករួមដំណើរជាមួយទាំងអស់ សូមពាក់ខ្សែក្រវាត់សុវត្ថិភាពឲ្យបានគ្រប់ៗគ្នា។
៣-អ្នកបើកបរម៉ូតូ និងអ្នករួមដំណើរទាំងអស់ សូមពាក់មួកសុវត្ថិភាពគ្រប់ៗគ្នា ពេលធ្វើដំណើរជិត ឬឆ្ងាយ និងគ្រប់ពេលវេលា។ ត្រូវចាំជានិច្ចថា "មួកសុវត្ថិភាពមួយ ការពារជីវិតបានម្នាក់"។
៤-ត្រូវបើកបរគោរពទៅតាមល្បឿនដែលច្បាប់កំណត់ គឺរថយន្តបើកបរក្នុងល្បឿនត្រឹមតែ ៨០គីឡូម៉ែត្រក្នុង១ម៉ោង នៅក្រៅទីប្រជុំជន ៤០ គីឡូម៉ែត្រក្នុង១ម៉ោង។ ចំពោះម៉ូតូ ក្នុងទីប្រជុំជន សូមបន្ថយល្បឿនឲ្យមកត្រឹមតែ ៣០ គីឡូម៉ែត្រក្នុង ១ម៉ោង។
៥-អ្នកបើកបរមុននឹងជែង ត្រូវដឹងច្បាស់ថា ផ្លូវខាងមុនទំនេរ អាចជែងបានដោយសុវត្ថិភាព ជៀសវាងការជែងដោយប្រថុយប្រថាន ដែលអាចបង្កឲ្យមានគ្រោះថ្នាក់ជាយថាហេតុ។
៦-អ្នកបើកបរសូមគោរពសិទ្ធិអាទិភាពនៅត្រង់ផ្លូវប្រសព្វ ដោយត្រូវបើកបរបន្ថយល្បឿន នៅពេលជិតដល់ផ្លូវប្រសព្វ និងត្រូវទុកសិទ្ធិឲ្យអ្នកបើកបរដែលធ្វើចរាចរនៅលើផ្លូវមានសិទ្ធិទៅមុន។
៧-សូមចងចាំជានិច្ចនូវពាក្យស្លោកដែលពោលថា "បើពិសាគ្រឿងស្រវឹង សូមកុំបើកបរ"។ ពាក្យស្លោកនេះមានសារៈសំខាន់ចំពោះអាយុជីវិត ព្រោះបើស្រវឹង អ្នកបើកបរនឹងបាត់ម្ចាស់ការ អាចរេចង្កូតចុះឡើង ភ្នែកស្រវាំង បន្ថែមល្បឿនកាន់តែលឿង ធ្វើឲ្យលទ្ធភាពគ្រោះថ្នាក់ដល់ស្លាប់។
៨-ចំពោះរថយន្តដឹកអ្នកដំណើរ ឬរថយន្តដឹកទំនិញ សូមកុំផ្ទុកមនុស្ស ឬទំនិញលើសច្បាស់កំណត់ ជាពិសេសរថយន្តដឹកអ្នកដំណើរ មិនត្រូវផ្ទុកមនុស្សនៅលើដំបូលឡើយ។
៩-នៅពេលបើកបរ ត្រូវប្រកាន់ខ្ជាប់នូវសុជីវធម៌ និងការអធ្យាស្រ័យគ្នាទៅវិញទៅមក។
គួររំលឹកដែរថា គ្រោះថ្នាក់ចរាចរណ៍លើដងផ្លូវ គិតជាមធ្យម បានឆកយកអាយុជីវិតអ្នកធ្វើដំណើរ ៦នាក់ ស្លាប់ក្នុងមួយថ្ងៃ ជាហេតុធ្វើឲ្យប្រទេសកម្ពុជាខាតបង់ថវិកាក្នុងមួយឆ្នាំៗ រាប់រយលានដុល្លារ ដោយសារតែឃាតករឈាមត្រជាក់មួយនេះ។
សូមជូនពរឲ្យបងប្អូនប្រជាពលរដ្ឋខ្មែរ ធ្វើដំណើរទៅមកប្រកបដោយសុវត្ថិភាពទាំងអស់គ្នា!
អត្ថបទ៖ យិន សំបូរ