និស្សិតរូបស្រស់ ស្ម័គ្រចិត្តរៀបការជាមួយបុរសពិការស្គាល់តាម WeChat

2015-02-11 21:08:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ការស្រលាញ់គ្នារវាងមនុស្សពីរនាក់ បង្កើតចេញជាចំណងស្នេហាមិនអាចកាត់ផ្ដាច់បាន រហូតឈានជើងចូលរោងការកសាងអនាគតរួមគ្នា។ ទោះបីក្រខ្សត់ខ្វះទ្រព្យធន ទោះបីពិការ រូបរាងមិនស្អាត ក៏មានសិទ្ធិអាចទទួលយកការស្រលាញ់ពីមនុស្សគ្រប់គ្នាដែរ។ នេះហើយគឺជាច្បាប់ធម្មជាតិ ដែលមនុស្សគ្រប់រូបត្រូវទទួលយក និងមិនអាចគិតទុកជាមុនបាន។ តួយ៉ាង និស្សិតស្រីដ៏ស្រស់ស្អាតម្នាក់ បានសម្រេចចិត្តឈប់រៀន និងរកមុខរបរផ្ទាល់ខ្លួន ដើម្បីអាចមើលថែអនាគតស្វាមីពិការរបស់នាង។

នារីរូបស្រស់ដែលហ៊ានលះបង់ដើម្បីស្នេហាស្មោះ មានឈ្មោះ Xiao Dan ពេលនេះមានវ័យ ២២ឆ្នាំហើយ។ នាងបានចាប់ផ្ដើមផ្ញើសារឆ្លងឆ្លើយជាមួយបុរសពិការវ័យ ២៣ឆ្នាំឈ្មោះ Kong Chuang តាមរយៈកម្មវិធី WeChat។ ៣ថ្ងៃក្រោយមក នាងក៏បានសម្រេចចិត្តរៀបការជាមួយបុរសពិការនោះ ដោយទឹកចិត្តស្រលាញ់ស្មោះពិត និងមើលឃើញពីភាពព្យាយាមរបស់គេ។

នាងបានរៀបរាប់ថា "និយាយជាមួយគាត់ មិនដូចនិយាយជាមួយអ្នកផ្សេងតាមអនឡាញទេ... គាត់មើលទៅដូចជាមនុស្សអស្ចារ្យម្នាក់ ហើយយើងបានឆាតជាមួយគ្នារហូតដល់ដាច់យប់"។ និស្សិតស្រីនេះ បានបន្តទៀតថា "ថ្ងៃបន្ទាប់ យើងឆាតជាមួយគ្នាម្ដងទៀត ហើយខ្ញុំក៏សម្រេចចិត្តទៅជួបគាត់ បើទោះខករៀនក៏ដោយ... ខ្ញុំមិនដឹងទាល់តែសោះថាគាត់ពិការ ប៉ុន្តែពេលឃើញភ្លាម មានអារម្មណ៍ថាភ្ញាក់ផ្អើល"។

នារីរូបស្រស់ ចាប់ផ្ដើមនិយាយជាមួយបុរសពិការដោយការពេញចិត្ត ព្រោះរូបគេអាចលេងព្យាណូបានយ៉ាងស្ទាត់ជំនាញ ហើយរូបថតទៀតសោត មើលទៅដូចជាតារាសម្ដែងដ៏ល្បីរបស់តៃវ៉ាន់ Jay Chou ដែលទើបរៀបអាពាហ៍ពិពាហ៍ថ្មីៗនេះ។ អំឡុងពេលនិយាយគ្នានោះ នាងមានការភ្ញាក់ផ្អើលយ៉ាងខ្លាំង ដោយសារបុរសពិការមានភាពសុទិដ្ឋិនិយមក្នុងការសម្លឹងឆ្ពោះទៅមុខ ហើយនាងមានអារម្មណ៍ថាបុរសម្នាក់នេះបានលើកទឹកចិត្តនាងយ៉ាងខ្លាំង។ ក្រោយមក នាងបាននិយាយតាមទូរសព្ទជាមួយឪពុកម្ដាយ ដោយបញ្ជាក់ប្រាប់ថានាងឈប់រៀន និងមានគម្រោងរៀបការផងដែរ។

គូស្នេហ៍ស្មោះស្ម័គ្រទាំងពីរនាក់នេះ កំពុងរស់នៅជាមួយគ្រួសារបុរសពិការ នៅក្រុងក្វាងចូវ ខេត្តក្វាងទុង ភាគខាងត្បូងប្រទេសចិន។ នារីរូបស្រស់ បានបញ្ជាក់ថា នាងចង់មានមុខរបរផ្ទាល់ខ្លួន និងរើទៅនៅកន្លែងណាមួយតែពីរនាក់ ដែលនាងអាចមើលថែបុរសជាមនុស្សពិការបាន។

ចំណែកឯបុរសពិការវិញ បាននិយាយដោយក្ដីរីករាយថា "ខ្ញុំមិនអាចរៀបរាប់ពីភាពសុទិដ្ឋិនិយមរបស់ខ្ញុំទេ គ្រាន់តែដឹងថាខ្លួនឯងចង់ធ្វើអី ហើយប្រឹងប្រែងដើម្បីសម្រេចរឿងនោះ"។ លោកបានបន្តទៀតថា ខ្លួនឯងពិតជាមានសំណាងខ្លាំងណាស់ដែលនារីរូបស្រស់ជ្រើសរើសជាគូអនាគត។ បុរសកំពូលសំណាងក៏បានបញ្ជាក់ផងដែរថា មិនអាចសន្យាធ្វើអ្វីគ្រប់យ៉ាងដើម្បីនាងទេ ប៉ុន្តែនឹងព្យាយាមធ្វើគ្រប់យ៉ាងដែលខ្លួនអាចធ្វើបាន ដើម្បីឲ្យគូស្នេហ៍សប្បាយចិត្ត៕

ចុចអាន៖ ស្នេហាខុសវ័យស្ទើរដូចឪពុកកូនព្រោះប្រាក់ កំពុងក្លាយជាប្រធានបទក្ដៅ

ប្រែសម្រួល៖ គង់ វិសាល ប្រភព៖ Mirror