រៀបការរួច ពេជ្រ សោភា ពោលសរសើរប្ដី

2015-02-12 23:09:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយរៀបការប៉ុន្មានថ្ងៃ ពេជ្រ សោភា បានពោលសរសើរប្ដីថា ជាបុរសមានលក្ខណៈល្អគ្រប់យ៉ាង ដែលធ្វើឲ្យការរង់ចាំរបស់នាង ៣០ ឆ្នាំ កន្លងមកនេះ មិនខកបំណងឡើយ។

សោភា បានប្រាប់ Sabay រសៀលនេះថា ក្រៅពីមានសន្ដានចិត្តល្អ និង ការងារត្រឹមត្រូវហើយនោះ បុរសម្នាក់នេះ ជាមនុស្សផ្ដល់តម្លៃឲ្យនាងណាស់ ហើយមានការគោរពចំពោះការសម្រេចចិត្តរៀងខ្លួនទៀតផង និង ប្រកបដោយការយោគយល់គ្នា។ តារាចម្រៀងរូបនេះអះអាងថា សូម្បីម្ដាយក្មេករបស់អ្នកនាង កំពុងរស់នៅអាមេរិក ក៏ជាមនុស្សគួរឲ្យគោរពណាស់ដែរ ទើប សោភា ចាត់ទុកខ្លួនឯងជាមនុស្សមានសំណាង។

អ្នកនាង និយាយថា៖ "ខ្ញុំត្រូវតែសប្បាយចិត្ត ព្រោះមានប្ដីល្អ និង ម្ដាយក្មេកល្អ ហើយអាចរួមរស់នៅជាមួយគ្នាបានដោយសុភមង្គល។ ប្ដីប្រពន្ធយើងទាំងពីរតែងរក្សាភាពថ្លៃថ្នូរទៅវិញទៅមក"។ តារារូបនេះបន្តថា សូម្បីតែរូបភាពស្និទ្ធស្នាលជាមួយគ្នា ខុសបែបបទប្រពៃណី ក៏ពួកគេមិនដែលមាន ឬ បង្ហោះលើបណ្ដាញសង្គមឲ្យនរណាម្នាក់បានឃើញឡើយ។

ទោះបីជាយ៉ាងណាក៏ដោយ ថ្មីៗនេះ តារាចម្រៀង ពេជ្រ សោភា បានធ្វើការឆ្លើយតបចំពោះការរិះគន់មួយចំនួនផងដែរ ពាក់ព័ន្ធទៅនឹងសកម្មភាពច្រៀងរាំរបស់នាងជាមួយស្វាមីក្នុងថ្ងៃរៀបការ។ អ្នករិះគន់ខ្លះបានលើកឡើងថា សកម្មភាពរាំរែកនៅលើឆាកនោះ គឺមិនមែនជាស្ត្រីខ្មែរនោះទេ។ សោភា និយាយថា៖ "មិនមែនកូនខ្មែរយ៉ាងម៉េច បើឪពុកខ្ញុំអ្នកកំពង់ស្ពឺ ម្ដាយខ្ញុំជាអ្នកព្រៃវែងហ្នឹង។ ខ្ញុំសប្បាយលាពាក្យកញ្ញាមកជាអ្នកនាងតើ! ខុសដែរ?”។

តារារូបនេះបានរៀបរាប់ថា បើស្លៀកហូលផាមួងខ្មែរហើយរាំញាក់នោះ គឺពិតជាមិនសមមែនហើយ។ ប៉ុន្តែនាងស្លៀករ៉ូបបែបអឺរ៉ុបប៉ុណ្ណោះ និង បន្ទាប់ពីកម្មវិធីនានា ក្នុងបែបបទប្រពៃណីខ្មែរបានបញ្ចប់ទៅ និង ត្រឹមត្រូវតាមទម្រង់ដើម ១០០% ទៀតផង។ តារារូបនេះបន្ថែមចុងក្រោយថា នៅពេលណាអ្នករិះគន់នោះ បានរៀបការដែរ ទើបដឹងថា ពិធីរៀបអាពាហ៍ពិពាហ៍មានតម្លៃប៉ុណ្ណាសម្រាប់ស្ត្រីខ្មែរ៕