Kim Soo Hyun ល្បីដល់គេសង់រូបសំណាកតាំងនៅហុងកុង

2015-02-13 22:07:16
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងកូរ៉េខាងត្បូង Kim Soo Hyun នឹងមានរូបសំណាកក្រមួនផ្ទាល់ខ្លួន តាំងនៅសារមន្ទីរ Madame Tussauds នៅទីក្រុងហុងកុង នាពេលឆាប់ៗនេះ។ នេះបើតាមការចុះផ្សាយរបស់គេហទំព័រ Soompi កាលពីថ្ងៃទី១២ ខែកុម្ភៈ។

សារមន្ទីរ Madame Tussauds បានបង្ហោះរូបភាពជាច្រើនសន្លឹកដែលតារារូបនេះ កំពុងវាស់វែងមុខមាត់ និងដងខ្លួនដើម្បីធ្វើរូបក្រមួននោះ។ អ្នកតំណាងសារមន្ទីរមួយនេះ បានសរសេរលើបណ្ដាញសង្គម Weibo ថា "តារាសម្ដែងកូរ៉េ Kim Soo Hyun នឹងមានវត្តមានក្នុងសារមន្ទីរ Madame Tussauds ហុងកុង ក្នុងពេលឆាប់ៗនេះ ដូច្នេះអ្នកគាំទ្រនឹងអាចជួបគេកាន់តែស្រួលជាងមុន"។

សារមន្ទីរ Madame Tussauds នៅហុងកុង គឺជាទីកន្លែងតាំងរូបក្រមួនរបស់តារាល្បីៗអន្តរជាតិជាច្រើនរូបរួមមាន Jackie Chan, Donnie Yen, David Beckham, Lee Minho និងតារាល្បីៗជាច្រើនទៀត។

Kim Soo Hyun វ័យ ២៦ឆ្នាំ បានចាប់ផ្ដើមអាជីពជាតារាសម្ដែងកាលពីឆ្នាំ២០០៧ និងចាប់ផ្ដើមមានឈ្មោះល្បីល្បាញបន្ទាប់ពីសម្ដែងរឿងភាគបែបយុវវ័យ "Dream High” ជាមួយតារាចម្រៀងនិងសម្ដែង Suzy នៅឆ្នាំ២០១១។ នៅឆ្នាំ២០១៤ ប្រជាប្រិយភាពរបស់គេបានកើនឡើងកាន់តែខ្លាំង នៅបណ្ដាប្រទេសអាស៊ី ជាពិសេសនៅប្រទេសចិន បន្ទាប់ពីសម្ដែងរឿង "My Love From the Star” ៕