ស៊ុន ណារីម៉ូនីកា មកស្រុកខ្មែរស្ងាត់ៗ

2015-02-14 16:05:16
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកនាង ស៊ុន ណារីម៉ូនីកា បានស្កាត់មកលេងស្រុកខ្មែរស្ងាត់ៗ ដើម្បីជួបឪពុកម្ដាយបងប្អូន និង ឆ្លៀតបង្ហាញមុខក្នុងកម្មវិធីសិល្បៈមួយចំនួន កាលពីពេលថ្មីនេះ។

អ្នកនាង និយាយថា៖ "គ្មានអ្វីសប្បាយជាងបានជួបបងប្អូនបង្កើត និង បងប្អូនអ្នករួមអាជីពក្នុងស្រុកខ្មែរទេ ព្រោះបែកគ្នាយូរហើយ"។ តារាចម្រៀងរូបនេះនិយាយថា បានស្កាត់មកកម្ពុជាប្រមាណជាង ១០ ថ្ងៃមកហើយ ក៏បានចូលរួមក្នុងកម្មវិធីសិល្បៈមួយចំនួនផងដែរ រួមមានតាមប៉ុស្តិ៍ទូរទស្សន៍ជាដើម ដោយពួកគេបានសម្ភាសន៍ពីការរស់នៅមួយចំនួននៅស្រុកបារាំង។

តារារូបនេះបន្ថែមទៀតថា ដំបូងឡើយមានបំណងមកស្រុកកំណើត ១ ខែ ប៉ុណ្ណោះ។ ប៉ុន្តែដោយសារតែការគាំទ្រ នៅតែមានដូចពីមុន និង មានការអញ្ជើញឱ្យចូលរួមក្នុងកម្មវិធីនានា ទើប ម៉ូនីកា សម្រេចស្នាក់នៅប្រទេសកម្ពុជារហូតដល់ ៣ ខែ ទើបត្រឡប់ទៅរស់នៅស្រុកបារាំងវិញ។ អ្នកនាងបញ្ជាក់ថា រវាងស្រុកកំណើត និង ប្រទេសទី២ងាយស្រួលរស់នៅដូចគ្នា។

ស៊ុន ណារីម៉ូនីកា ឲ្យដឹងទៀតថា៖" គ្រាន់តែថា នៅស្រុកគេអាចរកលុយបានច្រើនជាងស្រុកយើងប៉ុណ្ណោះ"។ អតីតតារាកំប្លែងក្រមិចក្រមើមរូបនេះ បានបន្តថា ជីវិតរស់នៅក្នុងប្រទេសបារាំងនៅពេលនេះហាក់ដូចជាកណ្ដោចកណ្ដែង ព្រោះមានតែខ្លួនមួយក្នុងនាមជាស្រ្តីមេម៉ាយដដែល ដោយមិនមាននរណាជាទីពឹងនោះទេ ក្រៅអំពីខ្លួនឯង។ ការវិលមកលេងស្រុកខ្មែរ ទោះបីជារយៈពេលយូរជាងនេះ ក៏គ្មានបញ្ហាចោទដែរ។ ម៉ូនីកា និយាយ។

អតីតអ្នកកំប្លែងរួមក្រុមជាមួយនាយ កុយ រូបនេះបានចាកចេញពីប្រទេសកម្ពុជាអំឡុងឆ្នាំ ២០០៨ ដើម្បីរស់នៅប្រទេសបារាំង។ អ្នកនាងត្រូវធ្វើការងារគ្រប់បែបយ៉ាងនៅទីនោះ រួមទាំងការងារពាក់ព័ន្ធទៅនឹងសិល្បៈផងដែរ ដោយច្រៀងតាមភោជនីយដ្ឋានមួយចំនួននៅទីនោះ។ ប៉ុន្តែអ្នកនាងឆ្លៀតចេញចូលស្រុកខ្មែរជារឿយៗ ព្រោះស្រុកកំណើតធ្លាប់កម្សត់ តស៊ូក្នុងអាជីពសិល្បៈទម្រាំមាន ឈ្មោះល្បី។ ដូច្នេះមិនអាចបំភ្លេចចោលបានទេ នាងនៅតែស្រលាញ់ និង នឹករលឹកស្រុកកំណើតជានិច្ច៕

អានអត្ថបទ៖ វ៉ាង ស្រីណូ ត្អូញថា ហត់ក្រោយវិលវិញ

អានអត្ថបទ៖ ដល់ពេលតារាប្រុសពីរដួង ធារ៉ាត់ និង ចេក ចាប់ដៃគ្នា

អានអត្ថបទ៖ តារាសម្ដែង នៅ ណាវីន ក្រឡាប់ឡាន ម្សិលមិញ

អត្ថបទ៖ សំ ជំនាញ