យុវជនមួយចំនួនប្រែក្លាយថ្ងៃ ១៤ កុម្ភៈ ទៅជាសកម្មភាពដ៏មានប្រយោជន៍បំផុតសម្រាប់សង្គម

2015-02-14 18:27:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ទិវានៃក្តីស្រលាញ់បានមកដល់នៅថ្ងៃនេះ យុវជនមួយចំនួនបានឆ្លៀតយកឱកាសដ៏វិសេសវិសាលនេះបង្ហាញសេចក្តីស្រលាញ់ចំពោះលោកគ្រូ-អ្នកគ្រូ កិច្ចការងារសង្គម និងផ្នែកមនុស្សធម៌។ ខាងក្រោមនេះគឺជាសកម្មភាពបី ដែលយុវជន បង្ហាញព្រមគ្នានៅថ្ងៃនេះ៖

យុវជនយ៉ាងច្រើនកុះករ បានចូលរួមការបរិច្ចាគឈាមកាលពីព្រឹកមិញ នៅទីលានប្រជាធិបតេយ្យ។ កម្មវិធីនេះរៀបចំឡើងដោយមជ្ឈមណ្ឌលជាតិផ្តល់ឈាម ដោយចាប់ផ្តើមតាំងពីម៉ោង ៨ ព្រឹក រហូតដល់ម៉ោង ៤ រសៀល។ មជ្ឈមណ្ឌលជាតិផ្តល់ឈាមបានឲ្យដឹង ក្នុងសេចក្តីផ្សព្វផ្សាយរបស់ខ្លួនថា ការអញ្ជើញចូលរួមបរិច្ចាគឈាមក្នុងថ្ងៃពិសេសនេះ គឺជាពេលវេលា ដ៏ល្អឥតខ្ចោះ ដើម្បីបង្ហាញពី សេចក្ដីស្រលាញ់ របស់អ្នកចំពោះ មនុស្សជាទីស្រលាញ់ និងជនរងគ្រោះ។ ជាការពិតណាស់ ការផ្តល់ឈាម គឺជាកាយវិការមនុស្សធម៌ ដែលសាមញ្ញបំផុត ដើម្បីជួយជនរងគ្រោះ។ អ្នកគ្រាន់តែចំណាយពេល តិចជាង មួយម៉ោង និងមិនចំណាយអ្វីទាំងអស់ហើយ ក្រោយមក អ្នកនឹងរីករាយជាមួយបទពិសោធន៍ ដែលមិនអាចបំភ្លេចបាន ជាមួយនឹងមិត្តភក្ដិរបស់អ្នក និង ទទួលបានអាហារ ភេសជ្ជៈ និង ការដូរអនុស្សាវរីយ៍ ដូចជាផ្កាកុលាប និងអាវយឺតមួយ។

-និស្សិតសាកលវិទ្យាល័យភូមិន្ទភ្នំពេញ បានបង្កើតកម្មវិធីសប្បុរសធម៌របស់ខ្លួននៅព្រឹកមិញនេះ ដោយមាននិស្សិត និងសាស្ត្រាចារ្យ ចូលរួមប្រមាណ ១ម៉ឺននាក់។ លោក ងន់ ម័រ អនុប្រធានមជ្ឈមណ្ឌលបច្ចេកវិទ្យាព័ត៌មាន នៃសាកលវិទ្យាល័យភូមិន្ទភ្នំពេញបានប្រាប់ Sabay ថា នេះគឺជាសកម្មភាពមនុស្សធម៌លើកទី៦ ដែលសាកលវិទ្យាល័យរៀបចំឡើង ដោយមានរៀបចំស្តង់លក់វត្ថុអនុស្សាវរីយ៍ចំនួន ២០០ និងសកម្មភាពដាំដើមឈើដោយក្រុមនិស្សិត។

លោកបានបន្ថែមថា សាកលវិទ្យាល័យនឹងយកថវិកា ដែលទទួលបានពីការលក់វត្ថុអនុស្សាវរីយ៍ ការចូលរួមពីសប្បុរសធម៌ជន ព្រមទាំងការលក់អាវយឺត ទៅជួយទៅមន្ទីរពេទ្យ និងអង្គការមនុស្សធម៌មួយចំនួន។

-ចាប់តាំងពីម្សិលមិញមកនិស្សិត និងសាស្ដាចារ្យសាកលវិទ្យាល័យបញ្ញាសាស្រ្ត បានចូលរួមចែករំលែកសេចក្តី ស្រលាញ់របស់ខ្លួន ទៅកាន់លោកគ្រូ-អ្នកគ្រូ និងការផ្សព្វផ្សាយសិល្បៈ វប្បធម៌ខ្មែរ។ នេះបើតាមយុវជន ម៉េង ពុទ្ធី អនុប្រធានសភានិស្សិតប្រចាំនៅសាកលវិទ្យាល័យ។ ពុទ្ធី បានរៀបរាប់ថា កម្មវិធីម្សិលមិញមានការបង្ហាញរបាំ និងសិល្បៈខ្មែរ ដោយមានការចូលរួមពីនិស្សិតយ៉ាងច្រើនកុះករ ហើយនៅថ្ងៃទី១៤ នេះ សាកលវិទ្យាល័យក៏មានចំកម្មវិធីសប្បុរសធម៌ ដើម្បីយកថវិកាជូនដល់មន្ទីរពេទ្យគន្ធបុប្ផាផងដែរ នៅពេលរសៀលនេះ៕

អត្ថបទ៖មៃ សុខលីម