ពេលចេញពីគុក កូនឈិន ឡុង និយាយអ្វីខ្លះ?

2015-02-16 16:11:26
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃសុក្រកូនឈិន ឡុង ឈ្មោះ Jaycee Chan ត្រូវតុលាការចិនដោះលែងវិញ ហើយនៅរសៀលថ្ងៃសៅរ៍ទី១៤ ខែកុម្ភៈ កូនប្រុសតារាក្បាច់គុនរូបនេះ បានធ្វើសន្និសីទកាសែតមួយក្នុងទីក្រុងប៉េកាំង ដើម្បីបកស្រាយ និងសុំទោសចំពោះទង្វើរបស់ខ្លួន។ តើ Jaycee និយាយអ្វីខ្លះ?

សារព័ត៌មានចិនបានស្រង់សម្ដី Jaycee ថា "ហេតុការណ៍នេះបានជះឥទ្ធិពលអាក្រក់ដល់សង្គម ហើយជាអំពើធ្វើឱ្យអ្នកគាំទ្រខ្ញុំ អស់សង្ឃឹម និងប៉ះពាល់ដល់មិត្តរួមការាងារ។ ខ្ញុំគ្មានហេតុផល និងគ្មានអីត្រូវដោះសារទេ...ព្រោះខ្ញុំបានធ្វើខុសមែន"។

តារាសម្ដែងវ័យ៣២ឆ្នាំបានឱ្យដឹងទៀតថា "ក្រោយកើតរឿងនេះ ខ្ញុំបានប្ដូរទស្សនវិស័យរបស់ខ្ញុំ...ពីមុន ខ្ញុំមិនដឹងពីរបៀបស្រលាញ់អ្វីនៅជុំវិញទេ។ ទោះនៅក្នុងពន្ធនាគារ ខ្ញុំទទួលទណ្ឌកម្មពីច្បាប់ តែមិនមានន័យថា ខ្ញុំទទួលបានការអត់ឱនពីសង្គមឡើយ...អ្វីដែលខ្ញុំចង់ធ្វើពេលនេះ គឺសុំទោសដល់សង្គមទាំងមូលចំពោះកំហុសរបស់ខ្ញុំ។ ខ្ញុំពិតជាសុំទោស ហើយខ្ញុំសន្យាថា នឹងធ្វើជាមនុស្សគោរពច្បាប់ចាប់ពីពេលនេះតទៅ"។

ក្នុងសន្និសីទកាសែត ឪពុកម្ដាយរបស់តារាចម្រៀងរូបនេះ គឺអ្នកស្រី Joan Lin Fengjiao និង ឈិន ឡុង មិនបានចូលរួមទេ ដោយឈិន ឡុង ជាប់រវល់ផ្សព្វផ្សាយរឿង "Dragon Blade”។ ឆ្លើយតបសំណួររបស់អ្នកកាសែត ត្រង់ចំណុចនេះ Jaycee ប្រាប់ថា លោកមិនចង់ឱ្យម្ដាយមកឡើយ ព្រោះលោកដឹងថា ម្ដាយរបស់លោកខ្លាចការធ្វើសន្និសីទកាសែត ហើយចំពោះឪពុកលោកវិញ លោកចង់ឱ្យគាត់បញ្ចប់ការងាររួចរាល់សិន។

“ខ្ញុំដឹងថាឪពុកម្ដាយខ្ញុំស្រលាញ់ខ្ញុំខ្លាំង...វាជាកំហុសរបស់ខ្ញុំ ដូច្នេះខ្ញុំត្រូវតែទទួលខុសត្រូវ។ ខ្ញុំសង្ឃឹមថានឹងសុំទោស ហើយប្រារព្ធពិធីចូលឆ្នាំចិន ជាមួយពួកគាត់ទាំងអស់គ្នា"។ លោកបន្ថែមថា ឪពុកម្ដាយរបស់លោកមិនបានបន្ទោសលោកទេ ផ្ទុយទៅវិញពួកគាត់បានជំរុញលោកឱ្យខិតខំ ធ្វើការឱ្យបានល្អ ផ្លាស់ប្ដូរខ្លួន និងមិនឱ្យលោកធ្វើខុសម្ដងទៀតទេ។

ចំណែកការងារសិល្បៈ (ការសម្ដែង) វិញ លោកថាមិនទាន់ច្បាស់នៅឡើយទេថា នឹងមានឱកាសថតរឿងទៀត ឬយ៉ាងណានោះ តែលោកតាំងចិត្តថា នឹងដឹកនាំរឿង ហើយសរសេរបទសម្រៀង ឱ្យបានច្រើននាពេលអនាគត៕