ខេមថា ទោះជាល្បីក៏មិនភ្លេចដើមកំណើតជាអ្នកក្រ

2015-02-16 16:51:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ខេម និយាយថា ទោះជាខ្លួនល្បីឈ្មោះគួរសមនាពេលបច្ចុប្បន្ន ក៏លោកមិនភ្លេចដើមកំណើតចេញពីអ្នកក្រឡើយ។ លោកបានលើកឡើងដូច្នេះ ក្នុងពិធីប្រគំតន្ត្រី គ្រួសារកម្ពុជាយប់មិញនៅទីរួមខេត្តកោះកុង។

និយាយនៅលើវេទិកាតន្ត្រីមានមនុស្សរាប់ពាន់នាក់ចូលរួមទស្សនាតារាចម្រៀងឈានមុខរបស់ផលិតកម្ម Town ខេម លើកឡើងថា៖ "ខ្ញុំជឿថា បងប្អូននៅទីនេះពិតជាមានអ្នកក្រ។ ពីមុនខ្ញុំ និង គ្រួសាររបស់ខ្ញុំក៏ជួបភាពក្រីក្រដូចគ្នា មុននឹងមានថ្ងៃនេះ ហើយខ្ញុំមិនដែលភ្លេចដើមកំណើតនេះទេ"។

ខេម ចូលរួមប្រគំតន្ត្រីនាពេលកន្លងទៅ

តារាចម្រៀងមានប្រភពចេញពីខេត្ត កំពង់ឆ្នាំង បន្តថា ដោយសារតែការគាំទ្រពីទស្សនិកជនទូទាំងប្រទេស ក៏ដូចជាទស្សនិកជននៅទីនេះ រួមនឹងការប្រឹងប្រែងផ្ទាល់ខ្លួនទើបលោកមានកេរ្តិ៍ឈ្មោះល្បីដល់ពេលបច្ចុប្បន្ន។

លោក ប៉ុន សុណារិន ហៅ ខេម អតីតកាល គឺជា អ្នករត់ម៉ូតូឌុប មុននឹងប្រឡងជាប់ក្នុងកម្មវិធី Boy Band របស់ស្ថានីយទូរទស្សន៍ CTN កាលពីឆ្នាំ ២០០៧ ហើយបានក្លាយជាតារាចម្រៀងរហូតដល់បច្ចុប្បន្ន។

តារាចម្រៀងរូបនេះធ្លាប់ហែលឆ្លងការលំបាកគ្រប់បែបយ៉ាងជាមួយម្ដាយ ដោយឪពុកស្លាប់ចោល ជាពិសេសទទួលការមាក់ងាយជាខ្លាំងពីអ្នកភូមិពេលលោកឡើងមកប្រឡងចម្រៀងនៅភ្នំពេញ។ កត្តាដោយជួបភាពជូរចត់រាប់មិនភ្លេចដូច្នេះហើយ ទើបលោកតែងតែនឹកឃើញភាពក្រីក្រ និង មិនដែលភ្លេចពីដើមកំណើតរបស់ខ្លួន។

តារាវ័យ ៣០ ឆ្នាំ ខាងលើបោះជំហានចូលច្រៀងដំបូងឱ្យផលិតកម្ម ថាម ក្រោយពីចប់កុងត្រាជាមួយ CTN។ ក្នុងផលិតកម្មដំបូង ខេម មិនមានទស្សនិកជនស្គាល់មុខទេ ព្រោះមិនមាន VCD ណាមួយចេញលក់លើទីផ្សារ។

នៅក្នុងឆ្នាំ ២០១០ លោកបានបោះជំហានមកកាន់ផលិតកម្ម Town បន្ទាប់ពី ករុណា ពេជ្រ ណែនាំឱ្យចូល។ ក្នុងផលិតកម្មនេះហើយធ្វើឱ្យប្រជាប្រិយភាពរបស់លោកឡើងខ្លាំងតាមរយៈបទចម្រៀងចេញជាហូរហែ។ កត្តាធ្វើឱ្យទស្សនិកជនចាប់អារម្មណ៍ខ្លាំងគឺ សំឡេងស្អកខុសពីតារាចម្រៀងដទៃទៀត៕

អានអត្ថបទបន្ត៖ ពាក្យសំដី ១ ម៉ាត់ ប៉ុន្តែ ធ្វើឱ្យ ប៉ុបពី ឈឺចាប់តស៊ូរហូតមានថ្ងៃ

អានអត្ថបទបន្ត៖ ពេជ្រ សោភា កើតអ្វីចូលពេទ្យសង្គ្រោះបន្ទាន់?

អានអត្ថបទបន្ត៖ ពេលចេញពីគុក កូនឈិន ឡុង និយាយអ្វីខ្លះ?