ក្រុមមនុស្សកើតតាំងពីសតវត្សទី១៩ ចែករំលែកអាថ៌កំបាំងអាយុវែង

2015-02-16 22:32:08
ចំនួនមតិ 0 | ចំនួនចែករំលែក 0

ចន្លោះមិនឃើញ

បច្ចុប្បន្ននេះ កម្រមានមនុស្សដែលអាចរស់នៅបានដល់អាយុ ១០០ឆ្នាំណាស់ យ៉ាងច្រើនបំផុតត្រឹមអាយុ ៩០ឆ្នាំ ក៏ចាប់ផ្ដើមជរាពិការទៅហើយ។ យ៉ាងណាមិញ លោកយាយបួននាក់ ដែលសុទ្ធតែកើតតាំងពីមុនឆ្នាំ១៩០០ បានបង្ហើបពីអាថ៌កំបាំងអាយុវែង ប្រាប់ដល់កូនចៅជំនាន់ក្រោយ ដើម្បីអាចរស់នៅបានយូរដូចខ្លួន។

១. លោកយាយ Misao Okawo (អាយុ ១១៦ឆ្នាំ)

លោកយាយ Misao Okawo គឺជាជនជាតិជប៉ុន និងជាមនុស្សចំណាស់ជាងគេបំផុតលើលោក ដែលទទួលស្គាល់ដោយស្ថាប័ន Guinness កាលពីខែមិនា ឆ្នាំ២០១៤ កន្លងទៅ។ លោកយាយកើតនៅថ្ងៃទី៥ ខែមិនា ឆ្នាំ១៨៩៨ ហើយនៅសល់ ១៧ថ្ងៃទៀតប៉ុណ្ណោះ លោកយាយនឹងប្រារព្ធខួបកំណើតលើកទី១១៧។

លោកយាយម្ចាស់កំណត់ត្រាចាស់ជាងគេរូបនេះ បានរៀបអាពាហ៍ពិពាហ៍នៅក្នុងឆ្នាំ១៩១៩ មានកូនបីនាក់ ចៅបួននាក់ និងចៅទួត ៦នាក់ ចំណែកស្វាមីលោកយាយស្លាប់ចោលតាំងពីឆ្នាំ១៩៣១។

លោកយាយ Okawo បានបញ្ជាក់ថា រូបមន្តដែលធើឲ្យខ្លួនអាយុវែង គឺការទទួលទានអាហារប្រពៃណីជប៉ុនស៊ូស៊ី គេងឲ្យបាន ៨ម៉ោងក្នុងមួយយប់ និងសម្រាកលំហែឲ្យបានច្រើន។

២. លោកយាយ Gertrude Weaver (អាយុ ១១៦ឆ្នាំ)

លោកយាយ Gertrude Weaver គឺជាជនជាតិអាមេរិក និងជាមនុស្សចំណាស់ជាងគេបំផុតនៅក្នុងសហរដ្ឋអាមេរិក។ លោកយាយកើតនៅថ្ងៃទី៤ ខែកក្កដា ឆ្នាំ១៨៩៨ និងរៀបអាពាហ៍ពិពាហ៍នៅក្នុងឆ្នាំ១៩១៥ ព្រមទាំងមានកូន ៤នាក់។

លោកយាយ Weaver បានប្រាប់ទស្សនាវដ្ដី Time magazine ថា អាថ៌កំបាំងដែលធ្វើឲ្យលោកយាយអាយុវែង គឺ "ចិត្តសប្បុរស"។ លោកយាយបាននិយាយថា "ជួយមនុស្សឲ្យបានត្រឹមត្រូវ និងចិត្តល្អដាក់គេ ដូចអ្នកចង់ឲ្យគេធ្វើលើអ្នកវិញដែរ"។

៣. លោកយាយ Jeralean Talley (អាយុ ១១៥ឆ្នាំ)

លោកយាយJeralean Talley គឺជាជនជាតិអាមេរិក ដែលកើតនៅថ្ងៃទី២៣ ខែឧសភា ឆ្នាំ១៨៩៩។ បច្ចុប្បន្នលោកយាយកំពុងរស់នៅជាមួយកូនស្រីវ័យ ៧៦ឆ្នាំ នៅរដ្ឋ Michigan។

លោកយាយ បានប្រាប់សារព័ត៌មាន Detroit Free Press ថា អាថ៌កំបាំងអាយុវែងថា "អ្វីៗទាំងអស់ស្ថិតនៅក្នុងដៃដ៏អស្ចារ្យដែលអាទិទេពប្រទាននេះ... គ្មានអ្វីដែលខ្ញុំមិនអាចធ្វើបាននោះទេ"។

៤. លោកយាយ Susannah Mushatt Jones (អាយុ ១១៥ឆ្នាំ)

លោកយាយ Susannah Mushatt Jones កើតនៅថ្ងៃទី៦ ខែកក្កដា ឆ្នាំ១៨៩៩ ក្នុងសហរដ្ឋអាមេរិក។ លោកយាយបានបញ្ជាក់ថាគ្មានអាថ៌កំបាំងអ្វីច្រើនទេ ប៉ុន្តែលោកយាយមិនផឹកគ្រឿងស្រវឹង មិនជក់បារី និងទទួលទានដំណេកឲ្យបានគ្រប់គ្រាន់។

មនុស្សម្នាក់ទៀត ដែលកើតនៅមុនសតវត្សទី១៩ ដែរនោះ គឺលោកយាយ Emma Morano-Martinuzzi អាយុ ១១៥ឆ្នាំ ដែលជាជនជាតិអ៊ីតាលី។ ចំណែកមនុស្សធ្លាប់រស់បានយូរជាងគេបំផុតលើលោក នៅតែជាលោកយាយ Jeanne Calment ជនជាតិបារាំង ដែលស្លាប់នៅឆ្នាំ១៩៩៧ ក្នុងអាយុ ១២២ឆ្នាំ៕

ចុចអាន៖ គូស្នេហ៍១០៤ឆ្នាំ បង្ហើបអាថ៌កំបាំងស្នេហាអមតថ្ងៃ Valentine

ប្រែសម្រួល៖ គង់ វិសាល ប្រភព៖ Mirror