មើលវីដេអូនេះ ទើបដឹងថាការជួបជុំមានតម្លៃយ៉ាងណាសម្រាប់ឪពុកម្តាយ

2015-02-18 19:21:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ដាយឪពុកខំចិញ្ចឹមកូនតាំងពីតូចក្រូចឆ្មារ ស្រលាញ់ថ្នាក់ថ្នមបីបមក្បែរខ្លួនរហូត មិនអាចបាត់សូម្បីមួយនាទី ប៉ុន្តែពេលកូនធំដឹងក្ដីក៏ត្រូវចាកចេញទៅឆ្ងាយ ដើម្បីសិក្សាឬស្វែងរកការងារធ្វើ។ សាកគិតមើល៍ ធ្លាប់នៅជិតរាល់ពេល ធ្វើម្ហូបឲ្យកូនទទួលទានរាល់ថ្ងៃ ពេលបាត់ទៅឆ្ងាយម្ដាយឪពុកឯណាមិននឹករលឹកកូននោះ។ សង្ឃឹមពេលមានការឈប់សម្រាក ឬបុណ្យទានម្ដងៗអាចឃើញមុខកូនជាទីស្រលាញ់ នេះហើយជាពេលវេលាមានន័យបំផុតសម្រាប់ជីវិតអ្នកមានគុណគ្រប់រូប។

វីដេអូខ្លីមួយបង្ហាញពីម្ដាយមេម៉ាយ ខំចិញ្ចឹមកូនម្នាក់ឯងតាំងពីតូច ទោះខ្លួននឿយហត់មិនគិតឡើយ ឲ្យតែសប្បាយចិត្តមានកូននៅក្បែរ។ យ៉ាងណាមិញ ពេលកូនធំពេញរូបពេញរាង ក៏ចាប់ផ្ដើមចង់នៅឃ្លាតពីម្ដាយ សូម្បីអាហារក៏មិនចង់នៅទទួលទានជុំគ្រួសារ ដែលមានតែពីរនាក់ម្ដាយកូន។

ថ្ងៃចូលឆ្នាំថ្មីឈានចូលដល់ ម្ដាយខំរៀបចំអាហារជាច្រើន សង្ឃឹមថាបានញ៉ាំជុំគ្នាជាមួយកូនដោយមានក្ដីសុខ ប៉ុន្តែហៅទូរសព្ទទៅសួរកូន បែរជាឆ្លើយថាកំពុងរវល់ការងារ ធ្វើឲ្យម្ដាយខកចិត្តយ៉ាងខ្លាំង។ យ៉ាងណាក្ដី ក្រោយគិតឡើងវិញពីរឿងអតីត ធ្លាប់ទទួលទានអាហារជុំគ្នាជាមួយម្ដាយ នឹកឃើញពីក្ដីស្រលាញ់របស់ម្ដាយ កូនប្រុសក៏បានប្ដូរចិត្តទៅផ្ទះ ធ្វើឲ្យម្ដាយសប្បាយចិត្តយ៉ាងខ្លាំង...។

ចង់ដឹងកម្សត់យ៉ាងណា សូមទស្សនាវីដេអូ៖

http://youtu.be/dePmC_mE-b4

វីដេអូនេះ មិនមែនចង់បង្ហាញអ្នកថា គួរទៅជួបជុំឪពុកម្ដាយពេលចូលឆ្នាំចិននោះទេ ប៉ុន្តែចង់បង្ហាញថាក្ដីស្រលាញ់របស់ឪពុកម្ដាយ និងការជួបជុំទទួលទានអាហារជុំគ្នា ពិតជាមានន័យបំផុត។ ពេលសម្រាកពីការងារ ក្នុងរដូវបុណ្យភ្ជុំបិណ្ឌ ឬចូលឆ្នាំប្រពៃណីជាតិខ្មែរ គួរឆ្លៀតពេលទៅលេងអ្នកមានគុណ ជួបជុំគ្រួសារឲ្យបានសប្បាយចិត្ត៕

ចុចអាន៖ អាចស្រក់ទឹកភ្នែក! ទឹកចិត្តឪពុកគថ្លង់រើសសំរាម ចិញ្ចឹមកូនស្រី

ដោយ៖ គង់ វិសាល