ទិនហ្វី ចាប់ដៃជាមួយផលិតករវៀតណាមថតរឿងថ្មីក្នុងឆ្នាំនេះ

2015-02-19 16:29:34
ចំនួនមតិ 0 | ចំនួនចែករំលែក 0

ចន្លោះមិនឃើញ

Stephen Chow (ទិនហ្វី) ត្រូវគេរាយការណ៍ថា កំពុងពិភាក្សាអំពីការសហការជាមួយផលិតករវៀតណាម លោក Tsui Hark ដើម្បីផលិតភាគបន្តនៃរឿង “Journey to the West: Conquering the Demons” ហើយភាពយន្តនេះ នឹងចាប់ផ្ដើមថតនៅខែសីហា ឆ្នាំ២០១៥នេះ។

កាលពីដើមឆ្នាំ២០១៣ ភាពយន្ត "Journey to the West: Conquering the Demons” របស់អ្នកដឹកនាំរឿង ទិនហ្វី រកចំណូលក្នុងស្រុកបាន ២១៥លានដុល្លារអាមេរិក និងក្លាយជារឿងចិនដែលរកចំណូលបានខ្ពស់លំដាប់ទី២នៅលើពិភពលោក។ ក្រោយទទួលបានការគាំទ្រច្រើនពីទស្សនិកជន ទិនហ្វី គ្រោងថតរឿងភាគបន្ត តែត្រូវផ្អាកវិញដោយសារលោកមិនពេញចិត្ត Script។

ប៉ុន្តែក្រោយដឹងថា លោក Tsui Hark ចាប់អារម្មណ៍ផលិតរឿងនេះ ទិនហ្វី ក៏បានទាក់ទងសហការតែម្ដង។ ទោះបីស្ទីលរបស់អ្នកទាំងពីរខុសគ្នាដាច់ តែមានគេបញ្ជាក់ថា ទិនហ្វី ពេញចិត្តនឹងសហការជាមួយ Tsui Hark ហើយអ្នកដឹកនាំរឿងវ័យ៥២ឆ្នាំរូបនេះ មិនលូកដៃជ្រៀតជ្រែកក្នុងការដឹកនាំរបស់Tsui Hark ទេ។

រឿងភាគបន្តរបស់តារាពូកែកំប្លែងទិនហ្វី Shu Qi, Wen Zhang និងHuang Bo នឹងត្រឡប់មកសម្ដែងជាថ្មី ខណៈទិនហ្វីធ្វើជាផលិតករ រីឯ Tsui Hark នឹងក្លាយជាអ្នកដឹកនាំរឿង។

រឿង" Journey to the West 2” វិនិយោគដោយផលិតកម្ម Alibaba Pictures ក្រុមហ៊ុនស្ថិតក្រោមក្រុមហ៊ុនអេឡិចត្រូនិកចិន Alibaba ដែលត្រូវចំណាយទឹកប្រាក់អស់ ៤០០លានយ័នប្រហែលជាង៦៣លានដុល្លារអាមេរិក។ ភាពយន្តនេះគ្រោងចាក់បញ្ចាំងនៅចិនដីគោក ក្នុងបុណ្យចូលឆ្នាំចិន ឆ្នាំ២០១៧៕