ញឹម ចំរើន ចេញអាល់ប៊ុមថ្មីហើយ ក្រោយស្ងាត់ទីផ្សារជិត ៣ ឆ្នាំ

2015-02-19 16:58:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ញឹម ចំរើន ចេញអាល់ប៊ុមថ្មីហើយក្នុងផលិតកម្ម Legend Tiger ក្រោយស្ងាត់ទីផ្សារចម្រៀងជិត ៣ឆ្នាំ បន្ទាប់ពីផលិតកម្ម Rock ផ្អាកដំណើរការទីផ្សារចម្រៀង។

តារាចម្រៀងសំឡេងស្រាល លោក ញឹម ចំរើន ប្រាប់ថា៖ "ចម្រៀងរបស់ខ្ញុំវិលវិញហើយបងប្អូនក្នុងផលិតកម្មថ្មីមិនចម្លងពីបរទេសដូចមុនអីចឹង។ ខ្ញុំសង្ឃឹមថា ពុកម៉ែបងប្អូននឹងគាំទ្រខ្ញុំឡើងវិញ ក្រោយបីឆ្នាំហើយមិនលឺចម្រៀងខ្ញុំទាល់តែសោះលើទីផ្សារ"។

http://youtu.be/CHhDZaeR1os

លោកបានបន្តថា ក្រៅតែពីបទ "ភាសាដួងចិត្ត" ដែលបានចេញជា MV នៅមានបទចម្រៀងជាច្រើនទៀតត្រៀមចេញកំដរអារម្មណ៍ប្រិយមិត្ត និង មិត្តៗយុវវ័យ ក្នុងពេលឆាប់ៗខាងមុខក្នុងផលិតកម្ម Legend Tiger។

អតីតតារាចម្រៀងរបស់ផលិតកម្ម Rock មានជំនឿជាក់ថា ទីផ្សារចម្រៀងរបស់ខ្លួននឹងខ្ពស់ត្រដែតឡើងវិញនាពេលដ៏ខ្លីខាងមុខ។ ក្ដីរំពឹងដោយលោកសំអាងទៅលើផលិតកម្មថ្មី មានគំនិតច្នៃប្រឌិតខ្ពស់ក្នុងការផលិតបទចម្រៀងដោយមិនចម្លងពីគេ ហើយជាផលិតកម្មល្បីខាងផលិត ស្ប៉តនានា។

តារាចម្រៀងវ័យ ២៩ ឆ្នាំខាងលើបានប្រាប់ពីមូលហេតុនាំឱ្យលោកក្រចេញបទចម្រៀងក្នុងផលិតកម្មថ្មី ដែលលោកទើបចូលជិតមួយឆ្នាំថា ដោយសារផលិតកម្មយកចិត្តទុកដាក់ផលិតចម្រៀងមានគុណភាពខ្ពស់ និង មិនចម្លងស្នាដៃពីនរណាម្នាក់ឡើយ។

ម្ចាស់បទ "មិនប្រកាសសង្គ្រាមទេអូន" នៅតែតាំងចិត្តមិនច្រៀង ចម្រៀងទាំងឡាយណាចម្លងពីគេ គឺច្រៀងតែចម្រៀងបង្កើតឡើងដោយស្នាដៃកូនខ្មែរពិត។ កត្តាដូច្នេះហើយទើបទីផ្សារចម្រៀងស្ងប់ស្ងាត់ជិត ៣ឆ្នាំ ព្រោះតែដើររកទ្រនំផលិតកម្ម ធ្វើចម្រៀងជាស្នាដៃកូនខ្មែរមិនបាន។

ញឹម ចំរើន ក្នុងបទចម្រៀង "ភាសាដួងចិត្ត" របស់ផលិតកម្ម Legend Tiger

“ដូចដែលខ្ញុំធ្លាប់និយាយរួចហើយ គឺខ្ញុំមិនច្រៀងទេបទចម្រៀងចម្លងពីបរទេស ទោះជាចម្រៀងនោះអាចឱ្យខ្ញុំល្បីដល់កំពូលក៏ដោយ។ ខ្ញុំចង់ច្រៀងតែចម្រៀងណាធ្វើដោយស្នាដៃកូនខ្មែរពិតៗ។ នេះគឺជាអ្វីខ្ញុំតាំងចិត្ត តាំងពីនៅផលិតកម្ម Rock មកម្ល៉េះ"។ ញឹម ចំរើន បន្ថែម ដូច្នេះ។

ញឹម ចំរើន ចូលច្រៀងនៅក្នុងផលិតកម្ម Rock នៅខែ កក្កដា ឆ្នាំ ២០០៧ បន្ទាប់ពីលោកបានប្រឡងជាប់ចំណាត់ថ្នាក់លេខ ៣ ក្នុងកម្មវិធី Rock star របស់ផលិតកម្ម Rock ។ បទចម្រៀងរបស់លោកដែលធ្វើឲ្យទស្សនិកជនស្គាល់នោះគឺបទ “មិនធ្វើសង្គ្រាមទេអូន” និង បទ “លួចស្នេហ៍”។ លោកទើបតែបោះជំហានចូលផលិតកម្ម Legend Tiger កាលពីឆ្នាំ ២០១៤ ហើយទើបនឹងចេញអាល់ប៊ុមដំបូងក្នុងផលិតកម្មនេះ៕

អានអត្ថបទបន្ត៖ សូរ្យ អេណា សង្វេគខ្លាំង ពេលឃើញស្ថានភាពគ្រួសារពូម៉ៅ

អានអត្ថបទបន្ត៖ អុញ…ចូលឆ្នាំចិនអ្នកនាង កាតុ ស្រាប់ចង់តតាំងជាមួយ

អានអត្ថបទបន្ត៖ ទិនហ្វី ចាប់ដៃជាមួយផលិតករវៀតណាមថតរឿងថ្មីក្នុងឆ្នាំនេះ

អត្ថបទ៖ អ៊ីង សុឡា