តួជំទាវ ហេង ស្រីពេជ្រ ទីផ្សារសិល្បៈកើនឡើងដើម ២០១៥

2015-02-21 17:08:15
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង ហេង ស្រីពេជ្រ កំពុងកាក់កបខ្លាំងក្នុងអាជីពសម្ដែង ដោយយ៉ាងហោចណាស់មានផលិតកម្មចម្រៀងចំនួន ៦ ហើយ ដែលបានទាក់ទងឱ្យទៅចូលរួមសម្ដែងក្នុង MV សម្រាប់អាល់ប៊ុមចូលឆ្នាំរបស់ពួកគេនៅក្នុងខែនេះ។

តារាសម្ដែងត្រូវប៉ាន់ជាតួជំទាវ និង តួម្ដាយ បានរៀបរាប់ថា ផលិតកម្មដែលបានហៅឱ្យទៅចូលរួមថត MV រួមមាន ដូចជា ផលិតកម្មសាន់ដេ, ថោន, ហង្សមាស, Diamond, HD និង ផលិតកម្មស្ទឹងសែន ជាដើម។ ស្រីពេជ្រ បានបញ្ជាក់ថា គិតពីស្អែកតទៅត្រូវចាប់ចេញពីផ្ទះ ដើម្បីថតឲ្យផលិតកម្មនីមួយៗតាមការកំណត់។

ក្រៅពីការងារថត MV ចម្រៀងហើយនោះ ស្រីពេជ្រ បានបន្តថា កំពុងថតកុនរឿង "កំលោះក្ដាមប្រៃ ក្រមុំស្ពៃជ្រក់" របស់ស្ថានីយទូរទស្សន៍ ETV និង រឿង "កំពូលអ្នកលេង" របស់ស្ថានីយទូរទស្សន៍ប៉ុស្តិ៍លេខ ៩ ក្នុងនាមជាតួម្ដាយដូចគ្នា។ ដោយឡែកកុនថ្មីរបស់CTN ក៏នឹងចាប់ផ្ដើមថត នៅពាក់កណ្ដាលខែក្រោយនេះផងដែរ។

តារាស្រីសម្បុរសរូបនេះ បានបន្ថែមទៀតថា ទីផ្សារសិល្បៈហាក់កាន់តែមានការមមាញឹកនៅដើមឆ្នាំ ២០១៥ នេះ។ តារាស្រីមានប្រភពមកពីខេត្តកំពង់ឆ្នាំងរូបនេះអះអាងថា ការងារសម្ដែងមានជាប់គ្នារហូតមិនដែលខាន ស្របពេលដែលការថតពាណិជ្ជកម្មនានា មានជាហូរហែផងដែរ៕