ខាត់ សុឃីម និយាយអ្វីខ្លះពីការស្លៀកពាក់បែបសិចស៊ីក្នុង MV ក្រៅប្រទេស?

2015-02-20 18:53:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ខាត់ សុឃីម បាននិយាយថា រាល់ការថត MV ឱ្យផលិតកម្មក្រៅស្រុក ទាល់តែស្លៀកពាក់មានលក្ខណៈប្លែកបន្តិចទើបបាន ព្រោះមិនងាយបានបង្ហាញមុខនោះទេ ខណៈផលិតកម្មមួយចំនួនបានបិទទ្វារទៅវិញ។

គណៈកម្មការ The Cambodia's Got Talent រូបនេះបានប្រាប់ Sabay ថា ម្យ៉ាងទៀតការស្លៀកពាក់ដូច្នេះក៏ជាចំណង់ចំណូលចិត្តផ្ទាល់ខ្លួនផងដែរ។ ប៉ុន្តែទោះបីជាយ៉ាងណា តារាចម្រៀងខាងលើបានអះអាងថា មិនអាចជ្រុលហួសហេតុពេកទេ ព្រោះមានប្ដី និងមានកូនរួចហើយ ស្របពេលដែលវ័យក៏កាន់តែជ្រេ និងវិវត្តន៍ទៅមុខ។

ខាត់ សុឃីម និយាយថា៖" ជួនកាលបងប្អូនខ្មែរយើង នៅក្រៅប្រទេសហ្នឹង ក៏ពូកគាត់ចង់ឃើញយើងដែរ អញ្ចឹងក៏មានអ្វីប្លែកខ្លះទៅ ប៉ុន្តែក៏មិនជ្រុលពេកទេ"។ ខាត់ សុឃីម បន្តទៀតថា យ៉ាងណាក៏ត្រូវស្វែងយល់ពីភាពជាក់ស្ដែង ឬការនិយមស្លៀកពាក់របស់ប្រជាពលរដ្ឋខ្មែរនៅទីនោះដែរ ទើបការស្លៀកពាក់មិនឆ្គងពីគេ។

សិល្បការិនីរូបនេះ បានបន្ថែមទៀតថា ប្រសិនបើមានវ័យកាន់តែចាស់ ទាល់តែចេះតុបតែងខ្លួនខ្លះទើបបាន ហើយអ្នកសិល្បៈគួរតែដឹងពីបញ្ហានេះ ប៉ុន្តែក្នុងក្របខ័ណ្ឌសិល្បៈប៉ុណ្ណោះ។ ធម្មតាអាជីពសិល្បៈ រស់បានដោយសារប្រជាប្រិយភាពនៃការគាំទ្រ ពីទស្សនិកជនទូទៅទាំងក្នុង និងក្រៅប្រទេស។

ជាមួយគ្នានោះ សិល្បការិនីស្ទើរគ្រប់ទម្រង់ដដែលបានបញ្ជាក់ឱ្យដឹងថា បច្ចុប្បន្នផលិតកម្មក្រៅស្រុកមួយចំនួនត្រូវបានបិទទ្វាទៅវិញ ដោយសារតែក្ស័យទុន ព្រោះមិនអាចរកប្រាក់ចំណេញបានពីការផលិត MV ហើយនាំចេញទៅលក់នៅបណ្ដាប្រទេសទាំងនោះ។ នេះក៏ជាមូលហេតុ ដែលធ្វើឱ្យតារាខ្មែរបាត់បង់ឱកាស និងប្រាក់ចំណូលផងដែរ។

ខាត់ សុឃីម បញ្ជាក់ថា៖ " ជួនកាលបណ្ដាលមកពីខ្វះការបង្កើតថ្មី ព្រោះភាគច្រើនផលិតកម្មបានយកបទចម្រៀងពីដើមមកថតឡើងវិញប៉ុណ្ណោះ ដែលយើងដឹងហើយ ភាពដដែលជាសត្រូវរបស់ទស្សនិកជន"៕