ភ្នំភ្លើងស្អាតដាច់គេទាំង៧នៅលើពិភពលោក

2014-09-15 21:48:56
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទុះភ្លើងភ្លើងជាបាតុភូតធម្មជាតិដ៏គួរឲ្យខ្លាច ប៉ុន្តែវាក៏បានបន្សល់ទុកនូវភាពស្រស់ស្អាតផងដែរ។ យោងតាមការចុះផ្សាយរបស់ CNN បានបញ្ជាក់ថាភ្នំភ្លើងដែលស្អាតជាងគេទាំង៧ក្នុងលោក មានដូចខាងក្រោម៖

១. ភ្នំភ្លើង Kilauea រដ្ឋហាវ៉ៃសហរដ្ឋអាមេរិក

ភ្នំភ្លើង Kilauea មានកម្ពស់ ១២៨០ម៉ែត្រ។ កំអែរបស់ភ្នំភ្លើងនេះបានឆ្លុះចេញជាពណ៌ស្រស់ស្អាត និងបង្កើតជាពន្លឺដ៏អស្ចារ្យនៅពេលយប់។ ភ្នំភ្លើងនេះបានផ្ទុះលើកចុងក្រោយកាលពីឆ្នាំ១៩៨៣។

២. ភ្នំភ្លើង Kawah Ijen ភាគខាងកើតកោះ Java ប្រទេសឥណ្ឌូណេស៊ី

ភ្នំ Kawah Ijen ព័ទ្ធជុំវិញទៅដោយបឹងដែលមានពណ៌បៃតង ដែលប្រែពណ៌ដោយសារជាតិអាស៊ីដស៊ុលហ្វួរិច។ ភ្នំនេះល្បីល្បាញដោយសារ "ភ្លើងពណ៌ខៀវនៅពេលរាត្រី" ដែលកើតចេញពីចំហេះឧស្ម័នស្ពាន់ធ័រ។ វាបានផ្ទុះលើកចុងក្រោយ នៅឆ្នាំ១៨១៧។

៣. ភ្នំភ្លើង Villarrica ប្រទេសឈីលី

ភ្នំភ្លើងនេះមានកម្ពស់ ២៨៣៤ម៉ែត្រ។ ទិដ្ឋភាពដ៏ស្រស់បំព្រងដែលឃើញពីលើកំពូលភ្នំនេះ បានទាក់ទាញភ្ញៀវទេសចរជាច្រើន។ ភ្នំនេះបានផ្ទុះលើកចុងក្រោយ កាលពីឆ្នាំ២០០៨។

៤. ភ្នំភ្លើង Fuji ប្រទេសជប៉ុន

Fuji គឺជាភ្នំរបស់ជប៉ុនដ៏ល្បីល្បាញជាង ២០០០ឆ្នាំមកហើយ។ ភ្នំដែលមានកម្ពស់ ៣៧៤៩ម៉ែត្រមួយនេះ បានជាប់ចំណាត់ថ្នាក់លេខមួយក្នុងការទាក់ទាញភ្ញៀវទេសចរឲ្យមកទស្សនាប្រទេសជប៉ុន។ វាបានផ្ទុះលើកចុងក្រោយនៅឆ្នាំ១៧០៧។

៥. ភ្នំភ្លើង Virunga Mountains នៅតំបន់អាហ្រ្វិកខាងកើត

ដុំពពកជាច្រើនគ្របដណ្ដប់ពីលើភ្នំនេះ ដែលគេឲ្យឈ្មោះថា "Cloud Caps” បានបង្កើតជាទស្សនីយភាពដ៏ទាក់ទាញមួយ (ដូចរូបខាងលើ)។ វាស្ថិតនៅតាមបណ្ដោយព្រំប្រទល់ប្រទេស៣គឺ រ្វ៉ាន់ដា, អ៊ូហ្គាន់ដា និងកុងហ្គោ។ ភ្នំនេះបានផ្ទុះលើកចុងក្រោយ កាលពីឆ្នាំ២០១១។

៦. ភ្នំភ្លើង Licancabur ប្រទេសបូលីវី

ស្ថិតនៅក្នុងប្រទេសបូលីវី ជាប់ព្រំប្រទល់ប្រទេសស៊ីលី ភ្នំភ្លើង Licancabur គឺជាជង្រុកនៃអំបិលដ៏ធំបំផុតមួយប្រចាំទ្វីបអាមេរិកខាងត្បូង។ វាជាភ្នំភ្លើងដ៏ចំណាស់មួយ ពោលគឺការផ្ទុះលើកចុងក្រោយរបស់វា គឺតាំងពីជាង១ម៉ឺនឆ្នាំមុនម្ល៉េះ។

៧. ភ្នំភ្លើង Mount Etna ប្រទេសអ៊ីតាលី

កាលពីឆ្នាំ២០១៣ កន្លងទៅភ្នំភ្លើង Mount Etna បានបញ្ចូលក្នុងបញ្ជីបេតិកភណ្ឌពិភពលោករបស់អង្គការយូណេស្កូ។ វាជាគឺជាភ្នំភ្លើងដែលផ្ទុះញឹកជាងគេបំផុតទីពីរក្នុងពិភពលោក និងជាភ្នំភ្លើងខ្ពស់បំផុតនៅអឺរ៉ុប។ លើកចុងក្រោយដែលវាផ្ទុះ គឺកាលពីឆ្នាំ២០១១។

ប្រិយមិត្តគិតថាភ្នំណាមួយស្អាតជាងគេ?

ប្រែសម្រួល៖ ទ្រី រ៉ាវី ប្រភព៖ CNN