មិន​ងាយ​មាន​និស្សិត​ខ្មែរ​ ណា​​អាច​ទទួល​បាន​អាហារូបករណ៍​ទៅ​សិក្សា​នៅ​បរទេស​ពីរ​ដង​ផ្ទួន​គ្នា​ទេ​ ប៉ុន្តែ​ មាស ថុង​ គឺ​ជា​ម្នាក់​ក្នុង​ចំណោម​និស្សិត​ដ៏​កម្រ​ទាំង​នោះ។ នៅ​ឆ្នាំ​២០០៨​កន្លង​ទៅ​ អតីត​និស្សិត​​សាកល​វិទ្យាល័យ​ភូមិន្ទ​កសិកម្ម​រូប​នេះ​ ទទួល​បាន​អាហារូបករណ៍​ទៅ​សិក្សា​បញ្ចប់​ថ្នាក់​បរិញ្ញាប័ត្រ​រយៈពេល​មួយ​ ឆ្នាំ​នៅ​ប្រទេស​អូស្រ្តាលី។

  ​មាន​ស្រុក​កំណើត​នៅ​ខេត្ត​សៀមរាប​រូប​នេះ​ និង​បាន​សិក្សា​ថ្នាក់​អនុបណ្ឌិត​រយៈ​ពេល​ពីរ​ឆ្នាំ​ ឯ​សាកល​វិទ្យាល័យ​ University of Kentucky ​សហរដ្ឋ​​អាមេរិក។ ថ្លៃ​ជួល​ផ្ទះ​ ថ្លៃ​សាលា​ ថ្លៃ​ម្ហូបអាហារ​ ថ្លៃ​​ប្រដាប់​ប្រដា​រៀន​សូត្រ​ ថ្លៃ​សំបុត្រ​យន្ត​ហោះ​​ទៅ​មក​ និង​ថ្លៃ​ចាយវាយ​ផ្សេង​ទៀត​ គឺ​អាហារូបករណ៍​នោះ​រ៉ាប​រង​ទាំង​អស់។

ចង់​ដឹង​ថា​ និស្សិត​ខ្មែរ​រូប​នេះ​មាន​បច្ចេក​ទេស​ស្វះ​ស្វែង​រក​អាហារូបករណ៍​យ៉ាង​ណា​ ថ្ងៃ​នេះ​ Sabay បាន​ធ្វើ​បទ​សម្ភាសន៍​ជា​មួយ​រូប​​លោក​​ដូច​តទៅ៖

Sabay៖ លោក​ មាស ថុង តើ​អាហារូបករណ៍​ដែល​លោក​កំពុង​សិក្សា​នេះ​ មាន​ឈ្មោះ​អ្វី​ដែរ​ ហើយ​លោក​​ដឹង​ព័ត៌មាន​អំពី​វា​​ដោយ​របៀប​ណា?

មាស ថុង៖ អាហារូបករណ៍​ដែល​ខ្ញុំ​ទទួលបាន​នេះ​មាន​ឈ្មោះ​ថា​ Cambodia HARVEST Scholarship Program, ជា​កម្មវិធី​ដែល​រៀប​ចំ​ដោយ កម្មវិធីអភិវឌ្ឍន៍​កសិកម្ម​មួយ​នៅ​ប្រទេស​កម្ពុជា​យើង​​ឈ្មោះថា Cambodia HARVEST Program ​ក្រោម​ជំនួយ​របស់​ទីភ្នាក់ងារ​អភិវឌ្ឍន៍​អន្តរជាតិ នៃ​សហរដ្ឋអាមេរិក​​(USAID)។ ក្រៅ​ពី​កម្មវិធី​បែប​នេះ​ ក៏​មាន​កម្មវិធី​ដ៏​ទៃ​ទៀត​ដែល​ឧបត្ថម្ភ​និស្សិត​មក​សិក្សា​នៅ​សហរដ្ឋ​ អាមេរិក​ ដូចជា​កម្មវិធី​ Fulbright ​ជាដើម​ ដែលជា​អាហារូករណ៍​ដ៏​ល្បី​មួយ​របស់​អាមេរិក។ ព័ត៌មាន​ទាក់​ទង​នឹង​អាហារូបករណ៍ Fulbright ​​នេះ​ យើងអាច ស្វែងរកបានតាម​រយៈ​វិបសាយ​របស់​ស្ថានទូត​អាមេរិក​ប្រចាំ​រាជ​ធានី​ភ្នំពេញ​ និង​គេហទំព័រ​បរទេស​ផ្សេង​ទៀត។ មិន​មាន​អ្វី​ជា​លាក់​កំបាំង​ទេ​ ពេល​ណា​រដូវ​បើក​ប្រកាស​ប្រគល់​អាហារូបករណ៍​មក​ដល់​ ស្ថានទូត​អាមេរិក​នឹង​ជូន​ដំណឹង​ដល់​និស្សិត​ខ្មែរ​ ទាំង​នៅ​ភ្នំពេញ​ និង​តាម​បណ្ដា​ខេត្ត​បាន​ដឹង​មិន​ខាន​ឡើយ។ តាម​ពិត​ទៅ​ ​ ខ្ញុំក៏ធ្លាប់ប៉ង​អាហារូបករណ៍ Fulbright នេះ​ដែរ​ ​ ហើយខ្ញុំ​ក៏ធ្លាប់បាន​ដាក់​ពាក្យ​សុំ​អាហារូបករណ៍​កម្មវិធីផ្សេង​ទៀត​ជា​ ច្រើនដែរ​កន្លង​មក​ ​ តែ​​ខ្ញុំ​បែរ​ជាមានសំណាង​មក​ជាប់​អាហារូបករណ៍​ទៅ​សិក្សា​នៅ​សហរដ្ឋ​អាមេរិក ​ តាម​រយៈ​កម្មវិធី​ USAID Cambodia HARVEST Program ​ទៅវិញ កាល​ពី​ឆ្នាំ​ទៅ​មិញ។ កម្មវិធីនេះ ក៏​មាន​លក្ខណៈ​ស្រដៀង​នឹង​កម្មវិធី ​Fulbright ដែរ។ ចំណែក​ឯដំណឹងទាក់ទងនឹងកម្មវិធីនេះ ខ្ញុំទទួលបាន​តាមរយៈ​សារ email ការ​ផ្សាយ​តាម​ទំព័រ​កាសែត និង​ការធ្វើបទបង្ហាញ​ដោយ​អ្នករៀបចំកម្មវិធីផងដែរ។

Sabay៖ អាច​ប្រាប់​ព័ត៌មាន​ជុំ​វិញ​​អាហារូបករណ៍​របស់​អ្នក​បន្តិច​​បាន​ទេ?

មាស ថុង៖ កម្មវិធី​អាហារូបករណ៍​ដែល​ខ្ញុំ​កំពុង​តែ​រៀន​នេះ​ គឺ​ផ្ដល់​សម្រាប់​និស្សិត​ខ្មែរ​ ដែល​ចង់​ស្វែង​រក​ការ​សិក្សា​ថ្នាក់​អនុបណ្ដិត​នៅ​សហរដ្ឋ​អាមេរិក​ ផ្នែក​ជំនាញដែលពាក់ព័ន្ធនឹងកសិកម្ម។ ហើយ​ឥឡូវ​ ខ្ញុំ​កំពុង​សិក្សា​យក​អនុបណ្ឌិត​ ផ្នែក​សេដ្ឋកិច្ច​កសិកម្ម​ រយៈ​ពេល​ពីរ​ឆ្នាំ​នៅ​សាកល​វិទ្យាល័យ​ University of Kentucky ឯ​សហរដ្ឋ​អាមេរិក។

Sabay៖ តើ​ធ្វើ​ម៉េច​ដើម្បី​ទទួល​បាន​អាហារូបករណ៍​នេះ?

មាស ថុង៖ រឿង ​សុំ​អាហារូបករណ៍​ គឺ​ត្រូវ​ឆ្លង​កាត់​ការ​ប្រកួត​ប្រជែង​ខ្លាំង​ណាស់​ និង​តម្រូវ​ឲ្យ​សរសេរពាក្យស្នើសុំ​ និងលក្ខខណ្ឌមួយចំនួន ដូចជា​ឲ្យ​មាន​បទ​ពិសោធន៍​បម្រើការងារមួយ​ចំនួន​ទៀត​ផង។ តម្រូវ​ការ​ទី​មួយ​ក្នុង​ការ​ទៅ​សិក្សា​នៅ​សហរដ្ឋ​អាមេរិក​ គឺ​កម្រិត​ភាសា​អង់គ្លេង។ ដើម្បី​ឲ្យ​ពាក្យ​សុំ​អាហារូបករណ៍​របស់​យើង​ត្រូវ​បាន​គណៈ​មេ​ប្រយោគ​ ពិចារណា​ អ្នក​ត្រូវ​តែ​មាន​ពិន្ទុ​ TOEFL iBT ៨០​​ ឬ​ IELTS ៦.៥ តែ​បើ​បាន​ TOEFL iBT ​៨៨ ឬ ​IELTS​ ៧.០​ គឺ​កាន់តែប្រសើរ ជាពិសេស​សម្រាប់​អាហារូបករណ៍​ Fulbright។ ដូច្នេះ​បើ​សិន​អ្នក​មាន​បំណង​ចង់​សុំ​អាហារូបករណ៍​ ពិន្ទុ​ភាសា​អង់​គ្លេស​ខ្ពស់​នឹង​ជួយ​ឲ្យ​ពាក្យ​ស្នើ​សុំ​របស់​អ្នក​កាន់​តែ ​មាន​អាទិភាព​ខ្ពស់។ ប៉ុន្តែ​ទន្ទឹម​នឹង​នោះ​ដែរ​ សម្រាប់​និស្សិត​ដែល​ប្រាថ្នា​ចង់​ទៅ​សិក្សា​នៅ​សហរដ្ឋ​អាមេរិក​ គួរ​តែ​ត្រៀម​សម្រាប់​ការ​ធ្វើ​តេស្ត​កំរិត​អន្តរជាតិ​ផ្សង​ទៀត​ ដូច​ជា​ GRE និង​GMAT ​ឲ្យ​ហើយ​ទៅ។

លើស​ពី​នេះ​ អាហារូបករណ៍ទូទៅ នឹង​ទាម​ទា​ កម្រិត​ពិន្ទុមធ្យម​ ឬ​ហៅ​កាត់​ថា​ GPA​ ខ្ពស់, មាន​បទ​ពិសោធន៍​ការងារ​ និង​ធ្លាប់​បម្រើ​​ការងារ​ក្នុង​វិស័យ​ណា​មួយ​កន្លង​មក។ កម្រិត​GPA​ទាប​បំផុត​ក៏​ ៣.០​ដែរ។ សម្រាប់​បទ​ពិសោធន៍​ការងារ​វិញ​ កម្មវិធី​អាហារូបករណ៍​ខ្លះ​នឹង​កំណត់​ថា​ បេក្ខជន​ត្រូវ​ធ្លាប់​ធ្វើការ​រយៈពេល​ណា​មួយ​ ហើយ​ការងារ​នោះ​ទាក់​ទង​នឹង​អាហារូបករណ៍​ដែល​កំពុង​ស្នើ​សុំ។

Sabay៖ ជា​ធម្មតា​ ក្នុង​ពាក្យ​សុំ​អាហារូបករណ៍​ គេ​នឹង​តម្រូវ​ឲ្យ​សរសេរ​អត្ថបទ​មួយ​ (Essay)។ តើ​ក្នុង​អត្ថបទ​នោះ​គួរ​សរសេរ​បែប​ណា?

មាស ថុង៖ ដើម្បី ​អាច​សរសេរ​Essay​បាន​ល្អ​ គឺ​អ្នក​ត្រូវ​តែ​បង្ហាញ​ថា​ អ្នក​ពិត​​ជា​បេក្ខជន​ដ៏​ស័ក្ត​សម​បំផុត​សម្រាប់​អាហារូបករណ៍​នេះ។ សម្រាប់​ Development Scholarship ​នៅ​ក្នុង​ពាក្យ​ស្នើ​សុំ​ ត្រូវ​តែ​ពិពណ៌នា​អំពី​គុណ​សម្បត្តិ​ផ្ទាល់​ខ្លួន​របស់​អ្នក,​ ការ​រួម​ចំណែក​របស់​អ្នក​ជួយ​សង្គម​នា​ពេល​កន្លង​មក,​ ការ​ប្តេជ្ញា​ចិត្ត​របស់​​អ្នក​ដើម្បី​ជួយ​អភិវឌ្ឍ​សង្គម,​ តើ​អ្នក​នឹង​ធ្វើ​ឲ្យ​គម្រោងរបស់​អ្នក​​ចេញ​ជា​ផ្លែ​ផ្កា​ដោយ​របៀប​ណា, ​ហើយ​អ្វី​ដែល​សំខាន់​បំផុត​នោះ​ តើ​អាហារូបករណ៍​នេះ​នឹង​ជួយ​ឲ្យ​អ្នក​សម្រេច​បំណង​ប្រាថ្នា​របស់​ខ្លួន​បាន​ ដោយ​របៀប​​ណា។ ទាំង​នេះ​ គឺ​ជា​អ្វី​ដែល​ខ្ញុំ​បាន​សរសេរ​ចូល​ក្នុង​ពាក្យ​សុំ​អាហារូបករណ៍​របស់​ ខ្ញុំ​ ហើយ​វា​ពិត​ជា​មាន​ប្រសិទ្ធិ​ភាព​មែន។

Sabay៖ តើ​ការ​សុំ​​អាហារូបករណ៍​មួយ ​តម្រូវ​ឲ្យ​មាន​ការ​ត្រៀម​ខ្លួន​អ្វី​ខ្លះ?

មាស ថុង៖ ការ ​ត្រៀម​ខ្លួន​សម្រាប់​សុំ​អាហារូបករណ៍​​គឺ​សាមញ្ញ​ទេ។ ដំបូង​ ខ្ញុំ​គ្រាន់​តែ​ដុះ​​ខាត់​ភាសា​អង់​គ្លេស​របស់​ខ្ញុំ​ឲ្យ​កាន់​តែ​ប្រសើរ​ ឡើង។ ភាសា​អង់​គ្លេស​មិន​មែន​ត្រឹម​តែ​សម្រាប់​ប្រជែង​យក​អាហារូបករណ៍​ប៉ុណ្ណោះ​ ទេ​ ប៉ុន្តែ​ជំនាញ​នេះ​​សំខាន់​ណាស់​សម្រាប់​ពេល​បាន​អាហារូបករណ៍​ហើយ ចូល​ទៅ​សិក្សា​នៅ​ប្រទេស​គេ​ និង​សំខាន់​សម្រាប់​ការ​ងារ​នា​ថ្ងៃ​អនាគត​របស់​យើង​ដែរ។ ទន្ទឹម​គ្នា ​នោះ​ដែរ​ ខ្ញុំ​តែង​តែ​ស្រាវជ្រាវ​ដំណឹង​ផ្សេង​ៗ​ទាក់​ទង​នឹង​អាហារូបករណ៍​ដែល​ធ្លាប់ ​​ផ្ដល់​ឲ្យ​និស្សិត​ខ្មែរ​​នា​ពេល​កន្លង​មក​ និង​កាល​បរិច្ឆេទ​បិទ​ការ​ស្នើ​សុំ​​អាហារូបករណ៍​នោះ។ នៅ​ពេល​អាហារូបករណ៍​ណា​មួយ​​ធ្លាក់​មក​ដល់​ ខ្ញុំ​គ្រាន់​តែ​ដាក់​ពាក្យ​សុំ​បន្តការសិក្សាតែ​ជំនាញ​ណា​ដែល​ទាក់​ទង​នឹង​ ​ការ​សិក្សា​មុនៗ និង​ការងារ​របស់​ខ្ញុំ​តែ​ប៉ុណ្ណោះ។

Sabay៖ ក្រោយ​ពេល​​ដាក់​ពាក្យ​រួច​ អ្នក​ត្រូវ​បាន​គេ​ទូរសព្ទ​ហៅ​ឲ្យ​មក​សម្ភាសន៍​ តើ​ត្រូវ​ត្រៀម​ខ្លួន​យ៉ាង​ណា​ដែរ?

មាស ថុង៖ ប្រសិន​បើ​អ្នក​ត្រូវ​បាន​គេ​ណាត់​ឲ្យ​មក​សម្ភាស​ន៍​ នេះ​មាន​ន័យ​ថា​ អ្នក​ត្រូវ​តាម​អ្វី​ដែល​អាហារូបករណ៍​នោះ​ចង់​បាន។ ជា​ធម្មតា​ ការ​សម្ភាស​គឺ​គ្រាន់​តែ​ជា​ការ​ផ្ទៀង​ផ្ទាត់​អ្នក​ ជាមួយ​​នឹង​ពាក្យ​សុំ​អាហារូបករណ៍​របស់​អ្នក​តែ​ប៉ុណ្ណោះ​ ប៉ុន្តែ​វា​នឹង​ផ្តល់​ឱកាស​មួយ​ដល់​អ្នក​ក្នុង​ការ​ប្រាប់​ដល់​គណៈ​មេ​ ប្រយោគ​ លម្អិត​បន្ថែម​ទៀត​អំពី​ខ្លួន​អ្នក។

ក្នុង​ការ​ត្រៀម​ខ្លួន​ សម្រាប់​​សម្ភាសន៍​ ខ្ញុំ​ត្រូវ​មើល​ពាក្យ​ស្នើ​សុំ​របស់​ខ្ញុំ​ឡើង​វិញ​ ពិនិត្យ​មើល​អ្វី​ដែល​គួរ​តែ​ប្រាប់​ដល់​គណៈ​មេ​ប្រយោគ​បន្ថែម​ទៀត​ ដូច្នេះ​ធ្វើ​ឲ្យ​ដំណើរ​ការ​នៃ​ការ​ស្នើ​សុំ​អាហារូបករណ៍​របស់​ខ្ញុំ​កាន់​ តែ​មាន​ទម្ងន់​ ប៉ុន្តែ​ទន្ទឹម​នឹង​នោះ​ដែរ ខ្ញុំ​ត្រូវ​ព្យាយាម​បញ្ចុះ​បញ្ចូល​គណៈ​មេ​ប្រយោគ​ ថា​ខ្ញុំមានទំនុក​ចិត្តពេញលេញលើខ្លួនឯង​ និង​មានការ​ត្រៀម​ខ្លួន​ជា​​ស្រេច​ក្នុងការបំពេញការសិក្សាបន្តនេះ។

Sabay៖ តើ​អ្នក​មាន​ជា​យោបល់​អ្វី​ផ្ដល់​ដល់​និស្សិត​ខ្មែរ​ ដែល​ចង់​សុំ​អាហារូបករណ៍​ដូច​អ្នក​ដែរ​ ឬ​ទេ?

មាស ថុង៖ ខ្ញុំ​យល់​ថា​ និស្សិត​ដែល​ចង់​ដាក់​ពាក្យ​សុំ​អាហារូបករណ៍​ ដំបូង​ត្រូវ​ត្រៀម​ភាសា​អង់គ្លេស​ (ដើម្បីធ្វើតេស្ត TOEFL/IELTS), ​លួច​​សាក​ល្បង​ធ្វើ​តេស្ត​កំរិត​អន្តរជាតិ​ផ្សេង​ៗ​ទៀត​ដូច​ជា​ GRE ឬ GMAT, គួរ​ចូល​បម្រើ​ការងារ​នៅ​ស្ថាបន​ណា​មួយ​ដើម្បី​ទទួល​បាន​បទ​ពិសោធន៍​ខ្លះ, រៀន​សរសេរ​ពាក្យ​សុំ​អាហារូបករណ៍ រៀបរាប់​អំពី​បទ​ពិសោធន៍​ផ្ទាល់​ខ្លួន​ និង​គោលដៅ​នៅ​ថ្ងៃ​​អនាគត, ប៉ុន្តែ​ក្នុង​ពាក្យ​សុំ​អាហារូបករណ៍​អ្នក​ក៏​ត្រូវ​បន្ថែម​អំពី​គម្រោង​នៃ​ ការ​សិក្សា​របស់​អ្នក​ផង​ដែរ៕ អត្ថបទ៖ មាស រ័ត្ន