សេះបង្កង់ Juventus យកឈ្នះក្រុមជើងឯករងមកពីអាល្លឺម៉ង់ BVB

2015-02-25 15:13:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ជើងឯកលីកកំពូលអ៊ីតាលី ក្រុមសេះបង្កង់ Juventus បានយកឈ្នះក្រុមជើងឯករងលីកកំពូលអាល្លឺម៉ង់ Borussia Dortmund ដោយលទ្ធផល ២-១ ក្នុងការប្រកួតក្របខ័ណ្ឌកំពូលទ្វីបអឺរ៉ុប UEFA Champions League វគ្គ ១៦ក្រុមចុងក្រោយ ជើងទីមួយ។

គ្រាប់ដំបូងក្នុងការប្រកួត រកបានខ្សែប្រយុទ្ធចាស់វស្សាសញ្ជាតិអាហ្សង់ទីន Carlos Tevez នៅនាទីទី១៣ ធ្វើឲ្យក្រុមម្ចាស់ផ្ទះដែលកំពុងឈរលើគេក្នុងតារាងលីកកំពូលអ៊ីតាលី បើកការនាំមុខមុន។ រំលងបាន ៥នាទី ក្រុមភ្ញៀវ Borussia Dortmund បានវាយបកតាមស្មើវិញនៅនាទីទី១៨ ដោយកីឡាករ Marco Reus។ ជិតចប់តង់ទីមួយ ខ្សែប្រយុទ្ធសញ្ជាតិអេស្ប៉ាញ Alvaro Morata ស៊ុតបញ្ចូលទីបន្ថែមបានមួយគ្រាប់វិញ ឲ្យក្រុមសេះបង្កង់ Juventus នៅនាទីទី៤២។

ចូលដល់តង់ទីពីរ ក្រុមទាំងពីរសម្រុកគ្នាដែរ តែមិនអាចរកគ្រាប់បាល់បន្ថែម ធ្វើឲ្យការប្រកួតបញ្ចប់ទៅដោយលទ្ធផល ២-១។ ក្រុមភ្ញៀវ Borussia Dortmund កំពុងធ្លាក់ជើងនៅក្នុងលីកកំពូលអាល្លឺម៉ង់រដូវកាលនេះ ប៉ុន្តែពេលមកប៉ះក្រុមខ្លាំង Juventus ពួកគេបានបង្ហាញទម្រង់លេងយ៉ាងល្អ ដោយមិនឲ្យក្រុមម្ចាស់ផ្ទះ យកឈ្នះដោយងាយស្រួលឡើយ។