បើទ័ល បញ្ចាំរបស់ និងខ្ចីលុយគេមួយណាជាជម្រើសល្អជាង?

2015-02-26 17:11:54
ចំនួនមតិ 0 | ចំនួនចែករំលែក 0

ចន្លោះមិនឃើញ

មានឈ្មោះថា ខ្ចីគេដូចគ្នា តែមួយហាមាត់ខ្ចីលុយគេផ្ទាល់ ឯមួយទៀតយករបស់របរ (ម៉ូតូ ទូរសព្ទ កុំព្យូទ័រ ឬគ្រឿងអលង្ការជាដើម) ទៅដាក់បញ្ចាំ មួយណាជាជម្រើសល្អជាង? អ្នកខ្លះថា ទោះជាដាច់លុយយ៉ាងម៉េចក៏ដោយ ដាច់ខាតមិនខ្ចីលុយមិត្តភ័ក្ដិ ឬក្រុមគ្រួសារទេ សុខចិត្តយករបស់ទៅបញ្ចាំល្អជាង។ តើការលើកឡើងនេះ មួយណាល្អជាង?

រូបតំណាង

ការយករបស់របរជាប់ខ្លួនដូចជា ទូរសព្ទ កុំព្យូទ័រ កាតគ្រីម៉ូតូ គ្រឿងអលង្ការ និងរបស់មានតម្លៃផ្សេងៗទៀតជាដើម អាចជារឿងដែលអ្នកខ្លះមើលឃើញថា ជារឿងធម្មតា ផ្ទុយទៅវិញ មានការយល់ឃើញថា មិនគួរទម្លាប់យករបស់ទៅដាក់បញ្ចាំឡើយ ព្រោះជារឿងមិនល្អ។

យល់ឃើញស្រដៀងគ្នានេះដែរ យុវជន ចំណាន អាយុ ២៤ ឆ្នាំ ជានិស្សិតមួយរូប មានស្រុកកំណើតនៅខេត្ត កំពង់ឆ្នាំង និយាយថា ៖ "ខ្ញុំក៏ធ្លាប់យករបស់ទៅបញ្ចាំញឹកញាប់ដែរ ជាពិសេសគឺពេលដាច់លុយចាយហ្នឹងតែម្ដង"។ យុវជនដដែលនេះបានបន្តទៀតថា ៖ " ខ្ញុំមានទម្លាប់មួយ គឺសុខចិត្តដាក់របស់បញ្ចាំ តែមិនចង់ហាមាត់ខ្ចីមិត្តភ័ក្ដិដាច់ខាត"។

ចំណែកឯ យុវជន មករា និស្សិតឆ្នាំទី៤ នៃសកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចបានបញ្ចេញទស្សនៈផ្ទាល់ខ្លួនថា ៖ " ខ្ញុំគិតថា ការយករបស់ទៅដាក់បញ្ចាំមិនមែនជារឿងអាក្រក់ទេ ប្រសិនបើវាតម្រូវការចាំបាច់ ហើយយើងប្រើប្រាស់វាក្នុងផ្លូវល្អ តែបើដើម្បីយកលុយទៅចាយវាយ សប្បាយហ៊ឺហា ជាមួយមិត្តភ័ក្ដិ អាហ្នឹងទើបជារឿងមិនល្អទេ ដែលត្រូវជៀសវាងឲ្យបាន"។

ស្រដៀងនិងយុវជន មករាដែរ វិសាល ជានិស្សិតនៃសកលវិទ្យាល័យជាតិគ្រប់គ្រង បានថ្លែងថា៖ "បើសិនជាយករបស់ទៅបញ្ចាំដើម្បីបានលុយធ្វើជាដើមទុនរកស៊ីអ្វីមួយនោះវាមិនអីទេ តែខ្ញុំឃើញអ្នកខ្លះយកខ្ចីរបស់របរមិត្តភ័ក្ដិ និងទ្រព្យសម្បត្តិអ្នកផ្ទះទៅដាក់បញ្ចាំទៀតក៏មានដែរ។ លើសពីនេះ អ្នកខ្លះយករបស់ទៅដាក់បញ្ចាំ តែដល់ពេលដល់ថ្ងៃយកផុតកំណត់ អត់មានលុយបង់ឲ្យគេ ក៏ដាច់ទៅ"។

"បើគិតឲ្យមែនទែនទៅ គឺដូចខ្ចីលុយគេដូចតែគ្នាហ្នឹង។ គ្រាន់តែថា មួយខ្ចីមិត្តភ័ក្ដមិនចាំបាច់អស់លុយថ្លៃការឲ្យគេ តែបើយករបស់ទៅដាក់បញ្ចាំវិញ ត្រូវបង់ខាតចុងការបន្តិចបន្តួចនោះជារឿងធម្មតាទេ។ តែសម្រាប់ខ្ញុំវិញ បើខ្វះខាតលុយខ្លាំង សុខចិត្តយករបស់ទៅដាក់បញ្ចាំវិញ ជៀសវាងខ្ចីលុយមិត្តភ័ក្ដិ នាំតែមានពាក្យជំពាក់គុណគេថ្ងៃក្រោយ"។ នេះជាការ ថ្លែងឲ្យដឹង របស់យុវជន សែម ចិត្រា អាយុ២៦ឆ្នាំ ជានិស្សិតនៅសាកលវិទ្យាល័យមួយនៅភ្នំពេញ ដែលមានស្រុកកំណើតនៅខេត្ត កណ្ដាល។

បន្ថែមពីលើហេតុផលខាងលើ លោក ស្រីន ឡង់ឌី ដែលជាម្ចាស់ហាងបញ្ចាំឈ្មោះ សំណាងនិមល២ នៅម្តុំផ្សារកណ្ដាលបាននិយាយថា ៖ " ភាគច្រើនអ្នកដែលយករបស់មកបញ្ចាំនៅកន្លែងគាត់ សុទ្ធសឹងតែជាអ្នកខ្វះខាតលុយកាក់សម្រាប់ធ្វើអ្វីមួយ ទើបគាត់យករបស់មកដាក់ មានដូចជា ទូរសព្ទ កាមេរ៉ា គ្រឿងអលង្ការ ម៉ូតូ និងគ្រឿងអេឡិចត្រូនិកដទៃទៀតជាដើម"។

លោក ឡង់ឌី បានបន្ថែមឲ្យដឹងទៀតថា " ទោះបីជាយ៉ាងណា ខ្ញុំមិនហ៊ានថា មួយណាល្អនោះទេ ព្រោះនេះជាជម្រើសរបស់ពួកគាត់ តែសំខាន់ហាងរបស់ខ្ញុំ ទទួលរបស់បញ្ចាំត្រឹមត្រូវ មិនទទួលបញ្ចាំរបស់ណាដែលគ្មានឯកសារទេ ព្រោះវាខុសច្បាប់ ម្យ៉ាងវិញទៀតមុននិងបើកហាងទទួលបញ្ចាំនេះ លោកទទួលអាជ្ញាប័ណ្ណពីក្រសួងត្រឹមត្រូវ មិនមែនចេះតែបើកនោះទេ"៕

តើការដែលយករបស់ទៅដាក់បញ្ចាំ និងខ្ចីលុយគេមួយណាជាជម្រើសល្អជាង ឬក៏ជាចំណុចដែលគួរតែជៀសវាងទាំងអស់?

អត្ថបទ៖ យិន សំបូរ