តារា​សម្ដែង​កូរ៉េ​ខាង​ត្បូង Lee Min Ho ​នឹង​ត្រលប់​មក​សម្ដែង​ក្នុង​រឿង​ភាគ​ថ្មី​មួយ​ទៀត​នៅ​ឆ្នាំ​នេះ។ នេះ​បើ​តាម​សម្ដី​របស់​គេ​ផ្ទាល់។

ក្នុង​នាម​ជា​តារា​ម៉ូដែល​សម្រាប់​ក្រុមហ៊ុន​កាបូប Samsonite Red តារា​វ័យ២៧ឆ្នាំ Lee Min Ho បាន​ចូលរួម​កម្មវិធី​ប្រគំ​តន្ត្រី​មួយ​របស់​ក្រុមហ៊ុន​មាន​ឈ្មោះ​ថា "RED Say with Lee Min Ho” កាល​ពី​ថ្ងៃ​ទី​២៦ ខែ​កុម្ភៈ។

អំឡុង​ពេល​ប្រគំ​តន្ត្រី​នេះ តួ​ឯក F4 កូរ៉េ​រូប​នេះ​បាន​និយាយ​ពី​​គម្រោង​ថ្មី​ៗ​របស់​ខ្លួន​​នៅ​ឆ្នាំ​២០១៥​នេះ​ថា "ខ្ញុំ​ចង់​ចូល​សម្ដែង​ភាពយន្ត ប៉ុន្តែ​​មិន​ទាន់​ទទួល​បាន​រឿង​ដែល​ខ្ញុំ​ពេញ​ចិត្ត​នឹង​សម្ដែង​នៅ​ឡើយ​ទេ​មក​ដល់​ពេល​នេះ។ តែ​បើ​និយាយ​ពី​រឿង​ភាគ​វិញ​គឺ​សង្ឃឹម​ច្រើន។ ឆ្នាំ​នេះ​ខ្ញុំ​សង្ឃឹម​ថា​អាច​ទាក់ទាញ​ការ​គាំទ្រ​ឡើង​វិញ​តាម​រយៈ​រឿង​ភាគ​ល្អ​មួយ"។​

ថ្មី​ៗ​នេះ ស្នាដៃ​ចុង​ក្រោយ​របស់ Lee Min Ho គឺ​ខ្សែ​ភាពយន្ត "Gangnam Blues” បាន​ក្លាយ​ជា​ភាពយន្ត​​ទី​មួយ​ដែល​អាច​ទាក់ទាញ​អ្នក​ចូល​ទស្សនា​ ២លាន​នាក់​នៅ​កូរ៉េ​ក្នុង​ឆ្នាំ​២០១៥​នេះ និង​អាច​រក​ចំណូល​សរុប​បាន ៧,៥លាន​ដុល្លារ​ហើយ។ រឿង​ភាគ​ចុង​ក្រោយ​របស់ Lee​ គឺ​រឿង "The Heirs” ដែល​គេ​សម្ដែង​ជាមួយ Park Shin Hye កាល​ពី​ឆ្នាំ២០១៣ ៕​

ចុច​អាន៖Lee Minho បដិសេធ​​ចូល​សម្ដែង​រឿង​ថ្មីជាមួយ Brad Pitt និង Fan Bingbing