សិស្សនៅភ្នំពេញល្បីរឿងប្រើ ស្មាតហ្វូន ចុះសិស្សនៅវិទ្យាល័យ អង្គរវិញ?

2015-02-27 18:49:13
ចំនួនមតិ 0 | ចំនួនចែករំលែក 0

ចន្លោះមិនឃើញ

សម័យទំនើបបច្ចុប្បន្នឃើញមាន សិស្ស ឬ និស្សិតសាលាកំពុងពេញនិយមរឿងប្រើប្រាស់ស្មាតហ្វូនដែលភ្ជាប់ អ៊ីនធឺណិត ដើម្បីទំនាក់ទំនង ឬ ធ្វើកិច្ចការនានា ជាពិសេសនៅក្រុងភ្នំពេញ។ ចុះនៅវិទ្យាល័យអង្គរ នៃទឹកដីខេត្តសៀមរាប វិញយ៉ាងណាដែរ? សូមស្ដាប់បទសម្ភាសន៍រវាង Sabay និង លោក រិន ឡូត នាយកស្ដីទីនៃវិទ្យាល័យអង្គរ ដូចខាងក្រោម។

Sabay៖ ជម្រាបសួរ លោកនាយក! រិន ឡូត៖ បាទជម្រាបសួរ! Sabay៖ លោកនាយកថា បច្ចុប្បន្ន ក្មេងៗមានទូរសព្ទប្រើទំនើបៗ ជាពិសេសសិស្សវិទ្យាល័យនៅភ្នំពេញ ចុះតើការប្រើ ស្មាតហ្វូន ឬ អ៊ីនធឺណិត នៅវិទ្យាល័យ អង្គរយ៉ាងម៉េចដែរ? រិន ឡូត៖ បាទ សូមអរគុណ! ខ្ញុំយល់ឃើញថា សម័យនេះការប្រើអ៊ីនធឺណិត គឺសំខាន់ណាស់ក្នុងការងារ ក៏ដូចការសិក្សា។ បើនិយាយពីការផ្សព្វផ្សាយគឺលឿន ពោលផ្សាយភ្លាមដល់ភ្លែត។ បើទាក់ទងវិស័យអប់រំវិញក៏ល្អដែរ គឺយើងអាចប្រើវាដើម្បីស្រាវជ្រាវ ឬ ធ្វើកិច្ចការបានរហ័ស។ ជាក់ស្ដែង នៅវិទ្យាល័យអង្គរ ខ្ញុំប៉ាន់ស្មានបានថា សិស្សប្រើ អ៊ីនធឺណិត លើ ស្មាតហ្វូនចន្លោះពី ៥៥% ទៅ ៦០% ក្នុងចំណោមសិស្សសរុប ៤៨៧៥ នាក់(សិស្សស្រី ២៤៨១)។ ការប្រើ ស្មាតហ្វូនបែបនេះ វាដូចជា E-Library អីចឹងដែរ។ យើងត្រូវការមេរៀន ឬ ឯកសារយោងផ្សេងៗ យើងបានភ្លាមតែម្ដង។

សិស្សនៅវិទ្យាល័យអង្គរ

Sabay៖ វាមានគុណសម្បត្តិ ចុះបើនិយាយពីគុណវិបត្តិវិញយ៉ាងដូចម្ដេចដែរ? រិន ឡូត៖ ការពិតណាស់ អ៊ីនធឺណិត ជាអាវុធមុខពីរ។ ចំណុចតូចមួយក្នុងចំណោមចំណុចធំៗ អ្នកខ្លះអាងតែ ស្មាតហ្វូន អាចធ្វើឲ្យមនុស្សភ្លេចរាល់លេខដកគុណចែក ឬ រូបមន្តខ្លះៗ ដោយពឹងលើទូរសព្ទទំនើបៗ។ ឧទាហរណ៍ថា រូបមន្តគណិតវិទ្យាខ្លះ Cos, ឬ Tan អីចឹងទៅ មិនខ្ចីចាំដោយចាំតែទូរសព្ទទំនើបគណនាឲ្យ។ ចំណុចធំមួយទៀតបើសិន សិស្សានុសិស្សរបស់យើងប្រើខុសគោលដៅគឺជាគ្រោះថ្នាក់មួយដែរ ដូចជាលេង អ៊ីនធឺណិតអត់គិតរៀនសូត្រ ឬ បើកមើលរឿងហាមឃាត់ដែលមិនគួរបើក ។ មួយទៀត អាចនិយាយបានថា ការប្រើអ៊ីនធឺណិតដោយយកគំរូអាក្រក់ៗ ឬ គេចសាលាតាមសម្ភារអូសទាញជាដើម។ ជួនពេលខ្លះ ការប្រើ ស្មាតហ្វូន ក៏អាចរំខានដល់ការសិក្សាមួយចំណែកដែរ ព្រោះមានការផ្ញើសារ ឬ ទាក់ទងគ្នាផ្ដេសផ្ដាសក្នុងម៉ោងដែលគ្រូកំពុងបង្រៀន។

Sabay៖ ចុះបើមិនផ្ដោតលើ ស្មាតហ្វូន តើការប្រើ អ៊ីនធឺណិត សម្រាប់វិទ្យាល័យអង្គរវិញមានលក្ខណៈបែបណាទៅ? រិន ឡូត៖ យើងមាន កុំព្យូទ័រ ចំនួន ៣២ ដែលភ្ជាប់ អ៊ីនធឺណិត ដែលជាការចង្អុលបង្ហាញរបស់ក្រសួងអប់រំ យុវជន និងកីឡា។ អ៊ីនធឺណិត មានបង្រៀនសម្រាប់សិស្សថ្នាក់ទី ១០ និង ១១។ ចំណែកថ្នាក់ទី ១២ យើងអត់បង្រៀនទៀតទេ ព្រោះរៀនកាលនៅទី ១០ និង ១១ រួចទៅហើយ។ ក្រៅពីបង្ហាត់បង្ហាញ អ៊ីនធឺណិត និង អ៊ីមែល យើងមានបង្រៀនវគ្គ Open Office ដែលជាកម្មវិធីរបស់ខ្មែរ។ Sabay៖ សូមអរគុណលោកនាយកដែលបានឆ្លើយសំណួរយ៉ាងក្បោះក្បាយ។ ខ្ញុំសង្ឃឹមថានឹងទទួលបានព័ត៌មានថ្មីៗជាច្រើនទៀតពីវិទ្យាល័យអង្គរ។ រិន ឡូត៖ បាទ លោកគ្រូសូមស្វាគមន៍ចំពោះ Sabay និង សហការជានិច្ចរាល់ព័ត៌មានពីវិទ្យាល័យអង្គរ។ វិទ្យាល័យអង្គរ ស្ថិតនៅ ភូមិ វត្តបូព៌ សង្កាត់ សាលាកំរើក ស្រុកសៀមរាបខេត្តសៀមរាប។ ឆ្នាំសិក្សា ២០១៤-២០១៥ មានសិស្សសរុប ៤៨៧៥ នាក់ដែលក្នុងនោះសិស្សស្រី ២៤៨១៕