ប្ដីប្រពន្ធ ស៊ុក សុភា ផ្ញើលុយជួយសន្តិសុខ ហោ ម៉ៅ និងសិល្បករជើងចាស់២រូប

2015-02-28 13:01:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្ដីប្រពន្ធអតីតតារាសម្ដែង ស៊ុក សុភា បានផ្ញើថវិកាមួយចំនួនពីប្រទេសអូស្ត្រាលី ដើម្បីជួយសម្រួលដល់ការលំបាករបស់សន្តិសុខស្ម័គ្រចិត្ត ហោ ម៉ៅ ក៏ដូចជាសិល្បករជើងចាស់លោកតា ផ្លុង មឿក និងតារាចម្រៀងលោក នូ ស៊ឹប ខណៈពួកគាត់កំពុងមានជំងឺប្រចាំកាយផងនោះ។

ភរិយារបស់ ស៊ុក សុភា អ្នកនាង សារីនណា បានប្រាប់មកកាន់ Sabay ថា ថវិកាសរុបមានចំនួន២.៥០០ដុល្លារ ជាការចូលរួមពីសប្បុរសជន ដែលបានស្គាល់គ្នា រស់នៅសហរដ្ឋអាមេរិក កាណាដា និងប្រទេសអង់គ្លេស ជាដើម។ ភរិយាអតីតតារាសម្ដែងរូបនេះបញ្ជាក់ថា សិល្បករជើងចាស់ទាំងពីររូបខាងលើទទួលបានថវិកាក្នុងម្នាក់ ៥០០ ដុល្លារអាមេរិក ។ ដោយឡែកសន្តិសុខស្ម័គ្រចិត្ត ហោ ម៉ៅ ទទួលបានថវិកា ១.៥០០ ដុល្លារអូស្ត្រាលី។ ថវិកាទាំងអស់មកដល់ដៃពូកគាត់នៅថ្ងៃនេះ។

សារីនណា និយាយថា៖ "ទោះបីជាលំបាកយ៉ាងណាក៏ដោយ ក៏ពួកយើងនៅតែព្យាយាម ខំប្រឹងប្រែងឱ្យបានសម្រេចនូវបំណងដែលចង់ជួយពួកគាត់"។ អាណិកជនខ្មែរអូស្ត្រាលីរូបនេះ បានបន្តទៀតថា ពួកគេមិនបានគិតការនឿយហត់នោះទេក្នុងបុព្វហេតុនេះ ទោះបីជាមានកូនតូច៥នាក់ក្នុងបន្ទុក ត្រូវមើលការខុសត្រូវថែទាំយ៉ាងណាក្ដី។

ភរិយារូបនេះអះអាងថា ទោះបីជាយ៉ាងណា អ្នកទាំងពីរ នឹងបន្តស្វែងរកមូលនិធិបន្ថែម ដើម្បីមានលទ្ធភាពគ្រប់គ្រាន់ អាចជួយដល់ប្រជាពលរដ្ឋកំពុងជួបការលំបាកផ្សេងទៀតនៅកម្ពុជា។ ជាមួយគ្នានោះ តាងនាមឲ្យស្វាមី សារីនណា បង្ហាញជំនឿថា សប្បុរសជនទាំងអស់ នៅតែបន្តជួយគាំទ្រសកម្មភាពរបស់ពួកគេតទៅទៀត និងអរគុណចំពោះការទុកចិត្តផងដែរ៕