យុវជនឆ្នើមជាង ១០០០ នាក់ ចូលរួមដណ្ដើមពានពីក្រសួងវប្បធម៌ ចេញលទ្ធផលហើយ

2015-03-03 21:47:33
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនឆ្នើមៗជាង ១០០០ នាក់ សុទ្ធសឹងតែជាសិស្ស និស្សិត មកពីវិទ្យាល័យ និង សាកលវិទ្យាល័យ ទាំង ២៥ ខេត្ត រាជធានី ដែលបានចូលរួមប្រលង ដណ្ដើមពានពីក្រសួងវប្បធម៌ និង វិចិត្រសិល្បៈ តាំងតែពីថ្ងៃ ២៣ ខែ កុម្ភៈ ឆ្នាំ ២០១៥ រហូតដល់ថ្ងៃទី ៣ មីនា ព្រឹកមិញនេះ បានចេញលទ្ធផលហើយ។

លោកជំទាវ ភឿង សកុណា រដ្ឋមន្ត្រី ក្រសួងវប្បធម៌ និង វិចិត្រសិល្បៈ បានឲ្យដឹងថា ឆ្លងតាមការសម្រេចយ៉ាងយកចិត្តទុកដាក់ ពីគណៈមេប្រយោគ ក្រុមសិល្បៈ ទាំង ៣៧ ក្រុម ដែលមានបេក្ខជនជាង ១០០០ នាក់នោះ ពានរង្វាន់នៃកម្មវិធី ត្រូវបានបែងចែកជា ២ ធំៗ មានពានរង្វាន់ស្នាដៃ សិស្សថ្នាក់មធ្យមសិក្សា និង ពានរង្វាន់ស្នាដៃសិស្សថ្នាក់ឧត្ដមសិក្សា ដែលក្នុងនោះបានបែងចែកផ្នែកបន្តទៀត គឺ ផ្នែក របាំ និង ផ្នែកឈុតល្ខោនអប់រំ។

‌ ១/សម្រាប់ពានរង្វាន់ស្នាដៃ សិស្សថ្នាក់មធ្យមសិក្សា ក,ផ្នែករបាំ

លេខ ១ បានទៅលើសិស្សមធ្យមសិក្សាមកពីខេត្ត ស្ទឹងត្រែង។ លេខ ២ បានទៅលើសិស្សមធ្យមសិក្សាមកពីខេត្ត ព្រះសីហនុ ។ លេខ ៣ បានទៅលើសិស្សមធ្យមសិក្សាមកពីខេត្ត តាកែវ។ ខ,ផ្នែកឈុតល្ខោនអប់រំ

លេខ ១ បានទៅលើសិស្សមធ្យមសិក្សាមកពីខេត្ត សៀមរាប លេខ ២ បានទៅលើសិស្សមធ្យមសិក្សាមកពី រាជធានីភ្នំពេញ លេខ ២ បានទៅលើសិស្សមធ្យមសិក្សាមកពីខេត្ត ក្រចេះ ២/សម្រាប់ពានរង្វាន់ស្នាដៃ សិស្សថ្នាក់ឧត្ដមសិក្សា ក,ផ្នែករបាំ

លេខ ១ បានទៅលើក្រុមសិល្បៈ និស្សិតមកពីសាកលវិទ្យាល័យ កម្ពុជា លេខ ២ បានទៅលើក្រុមសិល្បៈ និស្សិតមកពីសាកលវិទ្យាល័យ សាកលវិទ្យាល័យ មេគង្គ កម្ពុជា លេខ ៣ បានទៅលើក្រុមសិល្បៈ និស្សិតមកពីសាកលវិទ្យាល័យ អាស៊ីអឺរ៉ុប ខ, ផ្នែកឈុតល្ខោនអប់រំ

លេខ ១ បានទៅលើក្រុមសិល្បៈ និស្សិតមកពីសាកលវិទ្យាល័យ បញ្ញាសាស្ត្រកម្ពុជា លេខ ២ បានទៅលើក្រុមសិល្បៈ និស្សិតមកពីសាកលវិទ្យាល័យ មេគង្គ កម្ពុជា លេខ ៣ បានទៅលើក្រុមសិល្បៈ និស្សិតមកពីសាកលវិទ្យាល័យ កម្ពុជា។

ចំពោះប្រាក់រង្វាន់ នៃអ្នកដែលជាប់ជយលាភី មិនត្រូវបានប្រកាសឲ្យដឹងឡើយ។ លោកជំទាវ ភឿង សកុណា រដ្ឋមន្ត្រី ក្រសួងវប្បធម៌និង វិចិត្រសិល្បៈ បានលើកឡើងថា មហោស្រពសិល្បៈយុវជនទូទាំងប្រទេស មិនមែនសំខាន់សំដៅលើតែពានរង្វាន់នោះឡើយ បំណងធំរបស់ក្រសួងវប្បធម៌ គឺចង់សាបព្រោះប្រពៃណីជាតិឲ្យបានទូលំទូលាយទៅដល់ស្រទាប់យុវជនខ្មែរ ព្រោះថា ភារកិច្ចយុវជនគឺជា អ្នកបន្តវេន និង ទ្រទ្រង់កេរដំណែល វប្បធម៌ជាតិ។

នាយករដ្ឋមន្រ្ដី ហ៊ុន សែន ដែលបានអញ្ចើញចូលរួមពិធីបិទកម្មវិធីខាងលើនេះ បានគាំទ្រ និង លើទឹកចិត្ត ឲ្យក្រសួងវប្បធម៌ និងវិចិត្រសិល្បៈ ក្នុងការរៀបចំកម្មវិធី ដើម្បីលើកស្ទួយសិល្បៈបន្ថែមទៀត។

ទន្ទឹមនឹងគ្នានេះ ប្រមុខរាជរដ្ឋាភិបាលកម្ពុជា បានស្នើឲ្យក្រសួងវប្បធម៌ និង វិចិត្រសិល្បៈ រៀបចំការជួបជុំ រវាងសិល្បករជើងចាស់ និង អ្នកសិល្បៈជំនាន់ក្រោយ ផ្លាស់ប្ដូរយោបល់គ្នា ដើម្បីធ្វើយ៉ាងណាឲ្យ វិស័យសិល្បៈខ្មែរកាន់តែរីកចម្រើនថែមទៀត៕