យុវជនឆ្នើមជាង ១០០០ នាក់ ចូលរួមដណ្ដើមពាន ពីក្រសួងវប្បធម៌

2015-02-23 19:21:40
ចំនួនមតិ 0 | ចំនួនចែករំលែក 0

ចន្លោះមិនឃើញ

យុវជនឆ្នើមជាង ១០០០ នាក់ សុទ្ធសឹងតែជាសិស្ស និស្សិត មកពីវិទ្យាល័យ និង សាកលវិទ្យាល័យ ទាំង ២៥ ខេត្ត រាជធានី បានចូលរួមបើកមហោស្រពសិល្បៈយុវជនទូទាំងប្រទេស ដើម្បីប្រលងដណ្ដើមពានពីក្រសួងវប្បធម៌ និង វិចិត្រសិល្បៈ ដែលកម្មវិធីនេះ ធ្វើនៅសាលសន្និសីទចតុម្មុខ ព្រឹកមិញ។

រដ្ឋលេខាធិការក្រសួងវប្បធម៌ និង វិចិត្រសិល្បៈ ឯកឧត្ដម ឃឹម សារិទ្ធ បានឲ្យដឹងថា កម្មវិធីនេះ ធ្វើឡើងដើម្បីប្រមូលផ្ដុំយុវជនខ្មែរជាសិស្ស និង និស្សិតទូទាំងប្រទេសឲ្យទទួលបានការហ្វឹកហ្វឺន ពីការសម្ដែងសិល្បៈ និង យល់ដឹងពីតម្លៃនៃវប្បធម៌ជាតិ ហើយចូលរួម ថែរក្សា អភិវឌ្ឍ ឲ្យកាន់តែប្រសើរ។ ជាមួយគ្នានោះដែរ កម្មវិធីនេះ ធ្វើឡើងដើម្បីស្វាគមន៍ទិវាវប្បធម៌ជាតិ ៣ មីនា លើកទី ១៧ ឆ្នាំ ២០១៥ ខាងមុខនេះ។

រដ្ឋលេខាធិការបានឲ្យដឹងបន្ថែមទៀតថា មហោស្រពសិល្បៈយុវជនទូទាំងប្រទេសនេះ ចាប់ផ្ដើមពីថ្ងៃ ២៣ ខែ កុម្ភៈ រហូតដល់ ៣ មីនា ឆ្នាំ ២០១៥ ដោយនៅក្នុងនោះមានក្រុមសិស្ស-និស្សិត ឆ្នើម ដែលបានចម្រាញ់ចេញមកមកពីវិទ្យាល័យ និង សាកលវិទ្យាល័យ ទាំង ២៥ ខេត្ត រាជធានី ទូទាំងប្រទេសបានជាង ១០០០ នាក់ចូលរួម ហើយត្រូវបានចែកចេញជា ៣៧ ក្រុម។

ឯកឧត្ដមបានមានប្រសាសន៍ថា មានតែផ្នែកសិល្បៈរបាំ និង ឈុតល្ខោនអប់រំ ប៉ុណ្ណោះ ចូលរួមដោយបានបែងចែកជា ២ ដាច់ពីគ្នា គឺក្រុមយុវជនថ្នាក់មធ្យមសិក្សា និងក្រុមយុវជនថ្នាក់ឧបត្ថម្ភសិក្សា។ សម្រាប់ក្រុមយុវជនថ្នាក់មធ្យមសិក្សា ដែលអញ្ជើញមក វិទ្យាល័យ ២៥ ខេត្ត រាជធានី មាន ៥០ ស្នាដៃ និងក្រុមយុវជនថ្នាក់ឧបត្ថម្ភសិក្សា ដែលមកពី ១២ សាកលវិទ្យាល័យទូទាំងប្រទេស មាន ២២ ស្នាដៃ។ នៅមិនទាន់ដឹងថារង្វាន់ពីការប្រកួតកម្មវិធីខាងលើ អ្នកដែលទទួលបានជយលាភីទទួលបានអ្វីខ្លះឡើយ ។

លោកជំទាវ ភឿង សកុណា រដ្ឋមន្ត្រី ក្រសួងវប្បធម៌ និង វិចិត្រសិល្បៈ បានលើកឡើងថា កម្មវិធីនេះ មិនមែនសំខាន់សំដៅលើតែពានរង្វាន់នោះឡើយ បំណងធំរបស់ក្រសួងវប្បធម៌ និង វិចិត្រសិល្បៈ គឺចង់សាបព្រោះប្រពៃណីជាតិឲ្យបានជ្រាបចូលទូលំទូលាយទៅដល់ស្រទាប់យុវជនខ្មែរ ព្រោះថាភារកិច្ចយុវជន គឺជាអ្នកបន្តវេន និងទ្រទ្រង់កេរ្តិ៍តំណែល វប្បធម៌ជាតិ។

រដ្ឋមន្ត្រីសង្ឃឹមយ៉ាងមុតមាំថា កម្មវិធីនេះ និងដើរទៅយ៉ាងរលូន ក្រោមការយកចិត្តទុកដាក់ពីគណៈកម្មការរៀបចំ និងមានការផ្ដល់ពិន្ទុ យ៉ាងសុក្រឹតពីគណៈមេប្រយោគទាំងអស់។

មហោស្រពសិល្បៈយុវជនទូទាំងប្រទេស នឹងត្រូវបញ្ចប់ នៅថ្ងៃទី៣ មីនា ឆ្នាំ២០១៥ ខាងមុខនេះ ដោយថ្ងៃបិទបញ្ចប់នេះ គឺចំថ្ងៃ ទិវាវប្បធម៌ជាតិ ៣ មីនា លើកទី ១៧ តែម្ដង។ នាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាលកម្ពុជានឹងអញ្ជើញចូលរួមបិទកម្មវិធីនេះ៕

អានអត្ថបទ៖ តារាចម្រៀង វណ្ណា ស័ក្ត៖ ២ ឆ្នាំហើយ ឃើញខ្មោចបងនៅនឹងភ្នែករហូត អានអត្ថបទ៖ វិលចូលសិល្បៈវិញ វ៉ាង ស្រីណូ បើកជំនួញតាមអនឡាញ អានអត្ថបទ៖ មើលវីដេអូនេះហើយ ធានាថាសើចបិទមាត់មិនជិតហ្មង់

អត្ថបទ៖ ខុត សីហា