ផ្កាយរណបអាមេរិកផ្ទុះ ខ្ទាតបំណែកតូចៗចំនួន៤៣ ក្នុងគន្លងផែនដី

2015-03-04 17:27:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្កាយរណបរបស់សហរដ្ឋអាមេរិកដែលមានអាយុកាល ២០ឆ្នាំ បានផ្ទុះ និងបានខ្ទាតបំណែកតូចៗ ក្នុងគន្លងផែនដី កាលពីថ្ងៃទី ៣ ខែកុម្ភៈកន្លងទៅ។

បើតាមអង្គការ NASA របស់អាមេរិក និងភ្នាក់ងារអវកាស ESA របស់អឺរ៉ុប បានឱ្យដឹងថាផ្កាយរណបផ្ទុះនៅលើអាកាសនេះឈ្មោះ Defense Meteorological Satellite Program Flight 13 (DMSP-F13) ហើយបានខ្ទាតបំណែកតូចៗចំនួន ៤៣ នៅក្នុងលំហ ដែលនៅរយៈចម្ងាយប្រមាណ ៨០០គីឡូម៉េត្រពីផែនដី។ ចំពោះមូលហេតុនៅពីក្រោយការផ្ទុះនេះ គឺបណ្ដាលមកពីបញ្ហាសីតុណ្ហភាពនៅលើអាកាស។

NASA និង ESA បានបន្ថែមទៀតថាផ្កាយរណប DMSP-F13 បានចាប់ដំណើរការតាំងពីឆ្នាំ ១៩៩៥ មកទល់ពេលបច្ចុប្បន្ន ដែលក្លាយជាផ្កាយរណបដំណើរការបានយូរជាងគេ ហើយការផ្ទុះនេះ មិនប៉ះពាល់ដល់ដំណើរការរបស់ផ្កាយរណបផ្សេងទៀតនោះឡើយ។ ផ្កាយរណបប្រភេទ DMSP នេះត្រូវបានប្រើប្រាស់ដើម្បីសិក្សាពីបរិយាកាស និងមហាសមុទ្រ។ បច្ចុប្បន្ន ផ្កាយរណបប្រភេទ DMSP នេះចំនួន ៦កំពុងស្ថិតក្នុងគន្លងផែនដី រីឯ ៧ផ្សេងទៀតនឹងចាប់ដំណើរការនៅឆ្នាំ ២០១៦ខាងមុខ។

អ្នកជំនាញមួយរូបរបស់អង្គការ NASA លោក Eugene Stansbery និយាយថា បំណែកផ្ទុះចេញពីផ្កាយរណបនេះ នៅមានទំហំតូចជាងបំណែក ដែលផ្ទុះចេញពីផ្កាយរណប ASAT របស់ចិនក្នុងឆ្នាំ ២០០៧ និង Iridium (របស់អាមេរិក) និង Cosmos (របស់រុស្ស៊ី) នៅឆ្នាំ ២០០៩ នៅឡើយទេ។ ផ្កាយរណបទាំងបីនេះ បានផ្ទុះចេញបំណែកតូចៗរាប់រយចូលក្នុងគន្លងផែនដី៕

អាន៖ មិនគួរឲ្យជឿ! អវកាសយានិកថត Selfie ពីស្ថានីយអវកាសអន្តរជាតិ

ប្រែសម្រួល៖ ប៉ែត ផាន់និត

ប្រភព៖ dailymail