អ្នកគាំទ្របោះសម្ដីធ្ងន់ៗពេល Jessica ថាចង់ចូលសិល្បៈវិញ

2015-03-04 21:47:14
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងអ៊ីនធឺណិតជាច្រើនបានឆ្លើយតបយ៉ាងអវិជ្ជមាន ចំពោះសម្ដីរបស់តារាចម្រៀងកូរ៉េ Jessica ដែលនិយាយថានឹងចូលសិល្បៈវិញ នៅក្នុងការសម្ភាសជាមួយទស្សនាវដ្ដី Women Sense ដែលចេញផ្សាយកាលពីថ្ងៃទី៣ ខែមីនា។

នៅក្នុងការសម្ភាសនោះ អតីតសមាជិកក្រុម Girls' Generation Jessica បានបង្ហាញពីអារម្មណ៍រំភើបរីករាយរបស់នាងដែលបានចែករំលែកម៉ូដសំលៀកបំពាក់ជាមួយអ្នកដទៃ តាមរយៈក្រុមហ៊ុនសំលៀកបំពាក់ខ្លួនដែលមានយីហោ BLANC & ECLARE។ តារាវ័យ ២៥ឆ្នាំរូបនេះ ក៏បានបង្ហើបដែរថា នាងមានក្ដីនឹករឭកដល់អ្នកគាំទ្រខ្លាំងណាស់ និងមានគម្រោងឡើងសម្ដែងលើឆាកវិញក្នុងពេលឆាប់ៗនេះ។

ទោះយ៉ាងណា អ្នកគាំទ្រជាច្រើនមិនបានសម្ដែងក្ដីរំភើបអ្វីឡើយចំពោះព័ត៌មាននេះ។ ផ្ទុយទៅវិញពួកគេភាគច្រើនបានបញ្ចេញប្រតិកម្មយ៉ាងអវិជ្ជមាន ពាក់ព័ន្ធនឹងការចាកចេញរបស់នាងពីក្រុម Girls' Generation ដូចជា "ឈប់និយាយពី SNSD ទៅ Jessica” និង “ខ្ញុំតែងតែគាំទ្រអ្នករហូតមក តែយូរទៅសម្ដីរបស់អ្នកតែងកុហកជានិច្ច។ តើសមទេដែលសមាជិក Girls' Generation ដទៃលះបង់គ្រប់យ៉ាងដើម្បីក្រុម ហើយអ្នកវិញមានតែការងារផ្ទាល់ខ្លួន និងមុខជំនួញក្នុងចិត្ត? តើអ្នកជាខ្ញុំបម្រើរបស់មិត្តប្រុសមែនទេ?”។

ចំណែកអ្នកគាំទ្រខ្លះទៀតនិយាយថា នាងឡើងឆាកគឺដើម្បីតែផ្សព្វផ្សាយពីមុខជំនួញរបស់ខ្លួនប៉ុណ្ណោះ … នាងអាត្មានិយម គ្មានអ្វីគួរឲ្យឆ្ងល់ទេដែលផលិតកម្ម និងសមាជិកដទៃមិនអាចទ្រាំទ្រជាមួយនាងបាន។

បន្ទាប់ពីដកខ្លួនពីក្រុម Girls' Generation កាលពីខែកញ្ញា ឆ្នាំ២០១៤ Jessica បានផ្ដោតសំខាន់លើការងារផ្សព្វផ្សាយក្រុមហ៊ុន Fashion របស់ខ្លួនរួមទាំងសកម្មភាពសិល្បៈផ្សេងៗទៀតនៅប្រទេសចិន និងហុងកុង។ ពាក្យចចាមអារ៉ាមផ្សេងៗទៀតនិយាយថា នាងកំពុងសម្ងំរស់នៅជាមួយមិត្តប្រុស Tyler Kwon ដោយលួចលាក់នៅទីក្រុងហុងកុង ប៉ុន្តែ Jessica បានបដិសេធចំពោះរឿងនេះ ៕