នំអន្សមយក្សកម្ពុជាកំពុងត្រៀមខ្លួនបំបែកឯតទគ្គកម្មពិភពលោក

2015-03-05 15:44:32
ចំនួនមតិ 0 | ចំនួនចែករំលែក 0

ចន្លោះមិនឃើញ

នំអន្សមយក្សធំជាងគេបង្អស់លើពិភពលោក ដែលនឹងបង្ហាញខ្លួននៅលើទឹកដីអាណាចក្រអង្គរ ខេត្តសៀមរាប ក្នុងព្រឹត្តិការណ៍អង្គរសង្ក្រាន្ត ចាប់ពីថ្ងៃទី១៤ ដល់ថ្ងៃទី ១៦ ខែមេសា ឆ្នាំ២០១៥ខាងមុខ គ្រោងនឹងបំបែកឯតទគ្គកម្មពិភពលោក។ ស្ថាប័នចំនួនបួន រួមមាន ក្រសួងពាណិជ្ជកម្ម សមាគមចុងភៅកម្ពុជា សហព័ន្ធស្រូវអង្ករកម្ពុជា និងសហភាពសហព័ន្ធយុវជនកម្ពុជា បានស្ម័គ្រចិត្តរួមសហការគ្នាយ៉ាងដុតដៃដុតជើង ក្នុងការកែច្នៃគ្រឿងផ្សំជាវត្ថុធាតុដើមផ្សេងៗទៀត ឲ្យលេចចេញជារូបរាងនំអន្សមខ្មែរ ធំជាងគេបង្អស់លើពិភពលោក (The Largest Sticky Rice Cake- Num Ansorm) ដើម្បីដាក់ពាក្យចូលកំណត់ត្រាឯកត្តកម្មពិភពលោក (Guinness World Record)។ លោក សោម រតនា អ្នកនាំពាក្យព្រឹត្តិការណ៍អង្គរសង្ក្រាន្ត ថ្លែងថា៖ ក្រុមការងាររបស់លោកកំពុងតែខ្នះខ្នែង រៀបចំធ្វើនំអន្សមយក្សខ្មែរ ឲ្យមានការភ្ញាក់ផ្អើលទាំងក្នុងប្រទេស និងលើឆាកអន្តរជាតិ។ ទន្ទឹមនឹងនោះដែរ ភាគីពាក់ព័ន្ធរបស់លោកកំពុងតែ ត្រៀមខ្លួនយកនំអន្សមយក្សខ្មែរយើង ដាក់ពាក្យទៅក្នុងកម្មវិធី Guinness World Record នាពេលខាងមុខទៀងផង។ លោក បន្ថែមទៀតថា៖ "ព្រឹត្តិការណ៍អង្គរសង្ក្រាន្តនៅខេត្តសៀមរាបឆ្នាំនេះ យើងនឹងរៀបចំធ្វើឲ្យអធិកអធមទ្វេដង ហើយការដែលធ្វើនំអន្សមយក្សដែលធំជាងឆ្នាំមុនបែបនេះ គឺជាការបង្ហាញដល់ពិភពលោកពីសក្ដានុពលនៃស្រូវអង្ករខ្មែរយើងផង ក៏ដូចជាការឆ្លុះបញ្ចាំងពីឆន្ទៈនៃការគាំទ្រសកម្មភាពលើកតម្កើងវប្បធម៌ អរិយធម៌ដ៏ល្អផូរផង់ និងសម្បូរបែបរបស់ខ្មែរយើង តាំងពីបុរាណកាលមក"។

ទាក់ទងទៅនឹងបច្ចេកទេសចម្អិននំអន្សមយក្សនេះដែរ លោក ចាន់ សុភា ប្រធានសមាគមចុងភៅកម្ពុជា បញ្ជាក់ថា៖ "នំអន្សមយក្សយើងឆ្នាំនេះនឹងធ្វើឲ្យធំជាង និងល្អជាងឆ្នាំមុន។ គ្រាន់តែគ្រឿងផ្សំជាវត្ថុធាតុដើមយកមកធ្វើ មានទម្ងន់ ៣,២ តោន អង្កត់ផ្ចិតប្រវែង ១ ម៉ែត្រ និងបណ្ដោយរហូតដល់ ៥ ម៉ែត្រឯណោះ ក្នុងនោះនំអន្សមយក្សមួយ ត្រូវចម្អិនរយៈពេល២៤ម៉ោងទើបឆ្អិន"។ សមាជិកនៃសមាគមចុងភៅពិភពលោក ប្រចាំនៅកម្ពុជារូបនេះ បន្ថែមទៀតថា៖ "ក្រុមការងារទាំងមេចុងភៅ និងកូនកាំបិត របស់យើងដែលមានគ្នារហូតដល់១០០នាក់ ប្ដេជ្ញាថា នឹងខិតខំប្រឹងប្រែងឲ្យអស់ពីលទ្ធភាព ដើម្បីធ្វើយ៉ាងណាឲ្យរសជាតិ និងគុណភាពរបស់នំអន្សមយក្សនេះល្បីរន្ទឺពេញពិភពលោកតែម្ដង"។ គួរបញ្ជាក់ដែរថា ឆ្នាំមុនក្នុងព្រឹត្តិការណ៍អង្គរសង្ក្រាន្តខេត្តសៀមរាប ក៏មានធ្វើនំអន្សមយក្សដែរ តែសម្រាប់ឆ្នាំនេះ នំអន្សមយក្សដែលរំពឹងថា ធំជាងឆ្នាំមុននឹងត្រូវបានរៀបចំដាក់ពាក្យទៅក្នុងកម្មវិធីល្បីលំដាប់ពិភពលោក Guinness World Record។ ដោយឡែកសម្រាប់បងប្អូនប្រជាពលរដ្ឋខ្មែរ ដែលមានបំណងទៅទស្សនាក្នុងព្រឹត្តិការណ៍អង្គរសង្ក្រាន្តឆ្នាំនេះ ក៏អាចចូលរួមភ្លក់រសជាតិអន្សមយក្សនេះដោយសេរីបានទៀតផង៕