ថ្ងៃនេះ ២ឆ្នាំមុន បាត់ខ្លួន MH370 រញ្ជួយពេញពិភពលោក

2016-03-08 15:30:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្ងៃទី០៨ ខែមិនា ឆ្នាំ២០១៤ គឺជាសោកនាដកម្មដ៏ធំមួយដក់ជាប់ក្នុងការចងចាំរបស់ប្រជាជនទូទាំងពិភពលោក និងជាទុក្ខសោកមិនអាចបំភ្លេចបានសម្រាប់សាច់ញាតិជនរងគ្រោះលើជើងហោះហើរ MH370 ដែលគិតមកដល់ត្រឹមថ្ងៃនេះមានរយៈពេលពីរឆ្នាំគត់ ហើយនៅតែជាអាថ៌កំបាំងស្រាយមិនទាន់រួចនៅឡើយ។ ជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ី ព្រមទាំងជីវិតមនុស្ស ២៣៩នាក់ មិនទាន់ដឹងជោគវាសនាយ៉ាងណា បើទោះមានការរុករកឥតស្រាកស្រាន្តពីបណ្ដាប្រទេសនានារួចមកហើយក្ដី។

លោក Johnny Begue ដែលប្រទះឃើញបំណែកមួយនៃស្លាបយន្តហោះកាលពីខែកក្កដាឆ្នាំមុន បានប្រទះឃើញបំណែកគួរឲ្យសង្ស័យមួយទៀតនៅលើកោះ Reunion របស់បារាំង និងបញ្ជូនទៅឲ្យមន្ត្រីប៉ូលិសភ្លាមៗកាលពីថ្ងៃព្រហស្បតិ៍សប្ដាហ៍មុន។ ក្រៅពីនេះ នៅមានការប្រទះឃើញបំណែកគួរឲ្យសង្ស័យជាច្រើនទៀត ប៉ុន្តែមិនទាន់អាចឈានទៅដល់ការរកឃើញជើងហោះហើរ MH370 របស់ក្រុមហ៊ុនអាកាសចរណ៍ម៉ាឡេស៊ីនៅឡើយ។

កាលពីថ្ងៃទី២៩ ខែមករាឆ្នាំ២០១៥ មន្ត្រីរដ្ឋាភិបាលម៉ាឡេស៊ីបានអះអាងជាផ្លូវការថា យន្តហោះដែលដឹកមនុស្សសរុប ២៣៩នាក់នោះ បានជួបឧបទ្ទវហេតុឆក់យកជីវិតមនុស្សទាំងអស់ ខណៈការរុករកពុំទទួលបានតឹកតាងអ្វីបន្តិចនៅឡើយ។ ការប្រកាសដោយគ្មានអ្វីជាសំអាងនេះ ធ្វើឲ្យក្រុមគ្រួសារជនរងគ្រោះមិនអស់មន្ទិលក្នុងចិត្ត និងទាមទារឲ្យមានការបកស្រាយច្បាស់លាស់ ឬមានភស្តុតាងបញ្ជាក់ការពិត។

សាច់ញាតិជនរងគ្រោះលើ MH370

ការបាត់ខ្លួនយ៉ាងអាថ៌កំបាំងបំផុត នៃយន្តហោះរបស់ក្រុមហ៊ុនអាកាសចរណ៍ម៉ាឡេស៊ីមួយនេះ បាននាំឲ្យមានការសន្និដ្ឋានផ្សេងៗគ្នា ទាំងអ្នកជំនាញ ទាំងអតីតប្រធានក្រុមហ៊ុនអាកាសចរណ៍ ព្រមទាំងអ្នកវិភាគមួយចំនួន។ ការលើកឡើងខុសៗគ្នា បានបង្ហាញថា យន្តហោះអាចត្រូវបាញ់ទម្លាក់នៅមហាសមុទ្រឥណ្ឌា ឯមួយចំនួនដាក់ការសង្ស័យថាត្រូវគេប្លន់ ខណៈសាធារណៈមតិផ្សេងៗទៀត គិតថាយន្តហោះជួបអាកាសធាតុមិនល្អធ្លាក់ចូលទៅបាតសមុទ្រ គ្រាន់តែរកមិនទាន់ឃើញប៉ុណ្ណោះ។

យ៉ាងណាមិញ លោក Jeff Wise ជាអ្នកនិពន្ធផ្នែកវិទ្យាសាស្ត្រ ដែលមានការងារស្នូលទាក់ទងនឹងប្រភេទយន្តហោះ Boeing 777-200E នៅសារព័ត៌មាន CNN បានបញ្ចេញទ្រឹស្ដីប្លែកពីគេមួយថា ជើងហោះហើរ MH370 បានបន្តហោះហើរអស់រយៈពេល ៧ម៉ោងទៀត ក្រោយពេលបាត់ការទាក់ទង។ លោកហ៊ានអះអាងបែបនេះ ដោយយោងតាមកំណត់ត្រារបស់ក្រុមហ៊ុនទូរគមនាគមន៍អង់គ្លេស Inmarsat។ លោកថែមទាំងបញ្ជាក់ទៀតថា លោក Vladimir Putin ប្រធានាធិបតីរុស្ស៊ី ជាអ្នកបញ្ជាឲ្យគេលួចយន្តហោះនេះ រួចយកទៅលាក់ទុកនៅតំបន់ Baikonur Cosmodrome ក្នុងប្រទេសកាហ្សាក់ស្ថាន។

ប្រតិបត្តិការរុករកជើងហោះហើរ MH370

ការរុករកជើងហោះហើរ MH370 គឺជាប្រតិបត្តិការធំបំផុតក្នុងប្រវត្តិសាស្ត្រ ដែលចំណាយប្រាក់អស់រាប់រយលានដុល្លារ និងមានការចូលរួមពីក្រុមការងារចម្រុះជាតិសាសន៍ជាច្រើនប្រទេស។ ក្រុមការងាររុករករបស់ប្រទេសអូស្ត្រាលី សង្ឃឹមថានឹងអាចរកឃើញយន្តហោះដែលបាត់ខ្លួនយ៉ាងអាថ៌កំបាំងនេះ នៅពេលឈានដល់តំបន់រុករកចុងក្រោយនាខែឧសភាឆ្នាំ២០១៥ កន្លងទៅ ប៉ុន្តែនៅតែគ្មានលទ្ធផលជាដុំកំភួនអ្វីឡើយ៕

ចុចអាន៖ អ្នកជំនាញ៖ MH370 ត្រូវរុស្ស៊ីប្លន់យកទៅលាក់ទុកនៅប្រទេសកាហ្សាក់ស្ថាន

ដោយ៖ គង់ វិសាល ប្រភព៖ telegraph