មុខរបរថតរូបយ៉ាងណាហើយ ខណៈមនុស្សម្នាមានទូរសព្ទទំនើបស្ទើរគ្រប់គ្នា?
- 2015-03-11 15:01:24
- ចំនួនមតិ 0 | ចំនួនចែករំលែក 0
មុខរបរថតរូបយ៉ាងណាហើយ ខណៈមនុស្សម្នាមានទូរសព្ទទំនើបស្ទើរគ្រប់គ្នា?
ចន្លោះមិនឃើញ
ទូរសព្ទស៊េរីទំនើបឥលូវសឹងតែមនុស្សគ្រប់គ្នាមានប្រើ មិនថា យុវវ័យឬមនុស្សវ័យកណ្ដាលទេ ហើយទូរសព្ទទាំងនោះ ថែមទាំងបំពាក់កាមេរ៉ាមកជាមួយទៀតផង ។ នៅពេលគេចង់ថតរូបលេងកម្សាន្ត គេទាញតែទូរសព្ទមកថត រហូតដល់អ្នកខ្លះងាកទៅទិញកាម៉េរា Digital ថែមទៀត ដែលគេអាចថតរូបបានដោយខ្លួនឯងយ៉ាងងាយស្រួល មិនចាំបាច់រកជាងថតដូចមុនឡើយ។
តែបើក្រឡេកទៅមើលនៅម្ដុំមុខវាំងវិញ អាជីពថតរូបនៅតែមាន។ ចុះការរកស៊ីរបស់គាត់វិញយ៉ាងណាដែរ ខណៈមនុស្សថតរូបប្រើតែកាមេរ៉ាទូរសព្ទ?
លោក អ៊ុក សំណាង អ្នកថតរូបប្រចាំការនៅមុខវាំងជាង ១០ ឆ្នាំ ប្រាប់ Sabay ថា របរថតរូបលោកពិតជាមានការប៉ះពាល់មែន ស្របពេលបច្ចេកវិទ្យាកាន់តែទំនើបដោយសារសព្វថ្ងៃពេលគេទិញទូរសព្ទមានកាមេរ៉ាមកជាមួយស្រាប់។
បុរសមកពីព្រៃវែងបន្តថា ភ្ញៀវមកពីតាមខេត្តទើបគេហៅថត បើគេនៅភ្នំពេញ មិនសូវថតទេ ព្រោះពួកគេមានកាមេរ៉ាទំនើបៗស្រាប់ហើយ ម្ល៉ោះហើយក្នុងមួយថ្ងៃរកបានប្រហែល ៣ ម៉ឺនរៀល។ មុខរបរជាងថតនៅមុខវាំងនេះ មិនទៀងឡើយ មួយថ្ងៃកាត់មួយថ្ងៃកោរ ដូច្នេះលោកឆ្លៀតរកក្រៅបន្ថែមទៀតដូចជាទៅថតរូបនៅពេលមានរវល់តាមបុណ្យការ។ ដោយឡែកសម្រាប់ថ្ងៃបុណ្យទានដូចជាអុំទូក ពេញមួយថ្ងៃលោកអាចរកបានដល់ទៅជាង ២០ ម៉ឺនរៀលដែរ ហើយមួយសន្លឹក តម្លៃ ៤០០០ រៀល ចំពោះរូបថតទំហំ ១៣ x ១៨។
ស្រដៀងគ្នានេះដែរ លោក ហេង ឡេង និយាយថា លោកមកឈរមុខវាំងដើម្បីថតរូបចាប់តាំងពី ម៉ោង ៨ ដល់ ១១ ថ្ងៃត្រង់ និងពីម៉ោង ៣ ដល់ ៨ យប់ តែចំណូលទទួលបានត្រឹមតែ ៤ ទៅ ៥ ម៉ឺនរៀល ដោយសារតែលោកមានឧបករណ៍គ្រប់គ្រាន់ដូចជា ម៉ាស៊ីនព្រីន និង ម៉ាស៊ីនថតខ្លួនឯងផង បើគ្មានទេចំណូលដែលបានមកត្រូវកាត់ខាតទៅតាមនោះ។
ប្រកបរបរនេះជិត ២០ ឆ្នាំ បុរសមកពីខេត្តកណ្ដាល បន្តថា មុខរបរនេះមិនថេរទេជួនកាលទៅផ្ទះវិញទទេក៏មាន។ លោក និយាយថា សព្វថ្ងៃបានគុណបុណ្យសត្វព្រាបនៅមុខវាំងទេ ទើបមានគេមកថត ព្រោះគេនាំកូនមកបាចចំណីឲ្យសត្វដល់គេឃើញស្អាតទៅ គេហៅឲ្យថត ពីរ-បី ប៉ុស្ត៏។ បើថាក្មេងៗនៅភ្នំពេញវិញ គឺគេមិនថតឡើយ។ ចំណែករូបថតមួយសន្លឹក លោក ឡេង យកតម្លៃ ៣០០០ រៀល និង ១០០០០ រៀល ហើយថតប្រហែល ៣ នាទី គឺបានហើយ។
រូបតំណាង
ចំពោះនិស្សិតផ្នែកគណនេយ្យនៅសាកលវិទ្យាល័យមេគង្គកម្ពុជា សា កក្កដា បញ្ចេញយោបល់ថា ឥលូវនៅពេលចង់ថតរូប ប្រើតែទូរសព្ទថត មិនដែលទៅរកជាងឬហាងថតរូបឡើយ លុះត្រាតែថតកាតសិស្ស ឬថតតែងទើបរកជាងនៅតាមហាងធំៗតែម្ដង។
កក្កដា លើកឡើងថា សព្វថ្ងៃឃើញមនុស្សភាគច្រើនចូលចិត្តថតរូបលេង ហើយបង្ហោះតាមបណ្ដាញសង្គម ក៏ពួកគេភាគច្រើនប្រើតែកាមេរ៉ាទូរសព្ទដែរ ព្រោះវាងាយស្រួលហើយមិនចំណាយលុយ ពេលថតស្អាតក៏ទុកមើលដល់មិនស្អាតក៏លុបចោល ខុសពីថតនៅជាងទាំងស្អាត និង មិនស្អាតគេគិតលុយទាំងអស់ ហើយថ្លៃទៀត៕
សូមអាន ៖ តាំង ឈិនសុធី ទោះត្រូវគេវ៉ៃ គេដេញយ៉ាងណា ក៏មិនបោះបង់អាជីពអ្នកថតរូបនេះដែរ
អត្ថបទ៖ លឹម សុនា
© រក្សាសិទ្ធិគ្រប់យ៉ាងដោយ Sabay ឆ្នាំ២០២៤
គោលការណ៍ភាពឯកជន | Privacy Policy
អាសយដ្ឋាន
អគារលេខ ៣០៨ មហាវិថីព្រះមុន្នីវង្ស
សង្កាត់បឹងរាំង ខណ្ឌដូនពេញ
Sabay Digital Corporation ជាក្រុមហ៊ុនព័ត៌មានឌីជីថល និងកម្សាន្តឈានមុខគេនៅកម្ពុជា។ ព័ត៌មានបន្ថែម
ផលិតផល និង សេវាកម្ម របស់ Sabay
