មេរៀនជីវិត ៥យ៉ាង Lee Min-ho ចែករំលែកដល់អ្នកនៅវ័យខ្ទង់២០

2015-03-12 13:05:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងឱកាសជួបផ្ទាល់ជាមួយអ្នកគាំទ្រក្នុងកម្មវិធី "RED Say with Lee Min Ho" ដែលជាកម្មវិធីសម្ពោធផលិតផលកាបូប Samonite កាលពីពេលថ្មីៗនេះ តារាសម្ដែងកូរ៉េខាងត្បូង Lee Min-ho បានចែករំលែកមេរៀនជីវិត ៥យ៉ាងសម្រាប់អ្នកគាំទ្ររបស់ខ្លួនដែលមានវ័យខ្ទង់២០ឆ្នាំ ដោយផ្អែកលើបទពិសោធន៍ផ្ទាល់ដែលខ្លួនបានរៀនសូត្រក្នុងវ័យនេះ។ ចង់ដឹងតួឯករឿង "Boys over Flowers” និង "Heirs" រូបនេះមានដំបូន្មានអ្វីខ្លះ សូមតាមដានខាងក្រោមនេះ៖

១. ស្វែងរកអ្វីដែលអ្នកចូលចិត្តធ្វើ

Lee Min-ho ជឿថាវ័យខ្ទង់២០ឆ្នាំ គឺជាវ័យដែលត្រូវត្រួសត្រាយផ្លូវជីវិត និងជួបប្រទះបញ្ហាច្រើន ដូច្នេះអំឡុងពេលនេះអ្នកត្រូវស្វែងរកឲ្យឃើញថាអ្នកចូលចិត្តធ្វើអ្វី។ តារារូបនេះនិយាយថា "ខ្ញុំបានជួបបទពិសោធន៍ថ្មីៗ និងបញ្ហាជាច្រើននៅក្នុងវ័យនេះ។ វ័យ២០ឆ្នាំ យើងមិនទាន់ដឹងថាយើងចូលចិត្តធ្វើអ្វីឲ្យប្រាកដនោះទេ។ អ្វីៗអាចប្រែប្រួលទៅតាមអារម្មណ៍ បរិយាកាសសង្គម និងធនធានហិរញ្ញវត្ថុ"។

២. ការគេងអាចបំបាត់ស្ត្រេសសក្ដិសិទ្ធិបំផុត

Lee Min-ho គិតថាការគេងគឺជាវិធីតែមួយគត់ដែលអាចកម្ចាត់ភាពស្មុគស្មាញក្នុងអារម្មណ៍បាន។ តារារូបនេះនិយាយថា រាល់ពេលស្ត្រេសគេអាចគេង ពី៨ម៉ោង ទៅ១២ម៉ោងក្នុងមួយថ្ងៃ។

៣. ការជ្រើសរើសគូស្រករមិនទាន់ច្បាស់លាស់

ចំណុចនេះ Lee Min-ho ចង់ប្រាប់ថា មនុស្សគ្រប់គ្នានៅវ័យនេះមិនគួរប្រញាប់រើសគូស្រករឡើយ ព្រោះលក្ខខណ្ឌសម្រាប់មនុស្សដែលយើងស្រឡាញ់អាចប្រែប្រួលជានិច្ច។ តារាវ័យ២៧ឆ្នាំរូបនេះ បានប្រាប់បទពិសោធន៍ផ្ទាល់ខ្លួនថា កាលពីមុនរូបសម្រស់គឺជាចំណុចមួយសំខាន់សម្រាប់គេ តែឥលូវមនុស្សស្រីដែលគេស្រឡាញ់មិនចាំបាច់មានសម្រស់ស្រស់ស្អាតទេ ប៉ុន្តែគឺជាមនុស្សស្រីដែលមានចរិយាសម្បត្តិត្រឹមត្រូវគួរឲ្យស្រឡាញ់។

៤. ប្រគល់ក្ដីស្រឡាញ់ដល់អ្នកជុំវិញខ្លួនឲ្យច្រើនៗ

"ត្បិតតែជីវិតជាតារាមើលទៅស៊ីវិល័យ ហ៊ឺហា ប៉ុន្តែពេលខ្លះខ្ញុំមានអារម្មណ៍ឯការកស្មានមិនត្រូវ"។ Lee Min-ho និយាយ។ ភាពខុសគ្នារវាងពេលវេលាដែលរូបគេត្រូវមនុស្សចោមរោមក្នុងជីវិតសិល្បៈ និងពេលដែលគេមានទុក្ខលំបាកក្នុងជីវិតឯកជន ធ្វើឲ្យគេដឹងថានៅពេលទទួលបានក្ដីស្រឡាញ់ច្រើនពីអ្នកដទៃ យើងក៏ត្រូវតបស្នងក្ដីស្រឡាញ់ឲ្យគេវិញច្រើនដែរ។

Lee Min Ho និយាយថា “ខ្ញុំមានអារម្មណ៍សប្បាយចិត្តនៅពេលទទួលបានក្ដីស្រលាញ់ ហើយនៅពេលប្រគល់ក្ដីស្រឡាញ់ឲ្យអ្នកដទៃក៏ដូច្នោះដែរ"។

៥. គិតអ្វីឲ្យធំៗ

“សៀវភៅល្អៗតែងតែមានអ្នកអានច្រើន ហើយសៀវភៅខ្លះអាចមានអ្នកអានតៗគ្នារាប់សិបឆ្នាំ។ ដូច្នេះខ្ញុំត្រូវអភិវឌ្ឍខ្លួនឯងដើម្បីទទួលបានការគាំទ្របានយូរដូចសៀវភៅទាំងនោះដែរ"។ នេះជាសម្ដីរបស់ Lee Min Ho ដែលបង្ហាញពីមហិច្ឆតាធំមួយរបស់គេ។ ការគិតអ្វីមួយឲ្យធំ នឹងធ្វើឲ្យអ្នកមានគំនិតតស៊ូកាន់តែខ្លាំង ហើយសមិទ្ធផលដែលអ្នកសម្រេចបានក៏នឹងធំតាមនោះដែរ ៕

ចុចអាន៖Lee Min Ho ត្រៀមចេញរឿងថ្មីឲ្យល្បីម្ដងទៀត