១០នាក់ PSG សងសឹកបានសម្រេច ទម្លាក់ Chelsea នៅម៉ោងបន្ថែម២ដង
- 2015-03-12 14:57:57
- ចំនួនមតិ 0 | ចំនួនចែករំលែក 0
១០នាក់ PSG សងសឹកបានសម្រេច ទម្លាក់ Chelsea នៅម៉ោងបន្ថែម២ដង
ចន្លោះមិនឃើញ
ក្រុម Paris St-Germain បានកក់កៅអីនៅវគ្គ៨ក្រុមចុងក្រោយ ពានរង្វាន់កំពូលទ្វីបអឺរ៉ុប UEFA Champions League ហើយ បន្ទាប់ពីពួកគេសងសឹកក្រុម Chelsea បានសម្រេច ក្រោយយកឈ្នះដោយគ្រាប់បាល់ក្រៅដី ២-២ នៅម៉ោងបន្ថែម១៥នាទី២ដង កាលពីយប់មិញ ខណៈដែល Zlatan Ibrahimovic ទទួលកាតក្រហម តាំងពីនាទី៣២។
នៅរដូវកាលមុន ក្រុមតោខៀវរបស់អង់គ្លេស បានទម្លាក់ក្រុមខ្លាំងបារាំងមួយនេះ ដោយគ្រាប់បាល់ក្រៅដី (away goal) ដូចគ្នាដែរ នៅវគ្គ៨ក្រុមចុងក្រោយ។ ដូច្នេះនេះអាចជាការសងសឹក ដ៏ពេញចិត្តមួយសម្រាប់ក្រុមអ្នកមាន PSG។
ងាកទៅការប្រកួតនៅសមរភូមិកីឡដ្ឋាន Stamford Bridge វិញកាលពីយប់មិញ ពិតជាក្ដៅគគុកពិតមែន ព្រោះក្រុមខ្លាំងទាំង២ សុទ្ធតែចង់ឡើង និងជឿជាក់ដូចគ្នាថាខ្លួននឹងអាចឡើងទៅកាន់វគ្គជាបន្តបាន ដែលក្នុងប្រកួតនោះធ្វើឲ្យមានកាត់លឿងជាច្រើន និងមានទាំងកាតក្រហមផងដែរ។
Zlatan Ibrahimovic ខ្សែប្រយុទ្ធឆ្នើមដ៏មុតស្រួចរបស់ PSG ត្រូវពិន័យកាតក្រហម តាំងតែពីនាទី៣២ បន្ទាប់ពីប៉ះទង្គិចគ្នាជាមួយនឹងខ្សែបម្រើ Oscar។ ទោះសល់គ្នា ត្រឹមតែ១០នាក់ ក៏ក្រុមអង់គ្លេសមិនអាចធ្វើអ្វីក្រុម PSG បានដែរនៅតង់ទី១។ ចូលតង់ទី២ ខ្សែការពារ Gary Cahill មានឱកាសស៊ុតឲ្យក្រុមម្ចាស់ផ្ទះនាំមុខមុន នៅនាទី៨១ ប៉ុន្តែនៅនាទី៨៦ David Luiz បានតែតឲ្យ PSG តាមស្មើបានវិញ។
ក្រោយចប់ម៉ោង៩០នាទីស្មើគ្នា ១-១ ក្រុមទាំង២នេះ ត្រូវកាត់ក្ដីគ្នា ដោយបន្ថែមម៉ោង១៥នាទី២ដងទៀត។ Eden Hazard បានស៊ុតបាល់ប៉េណាល់ទី ស្រាលៗបញ្ចូលទីយ៉ាងស្រួលនៅនាទី៩៦ ក្រោយ Thiago Silva យកដៃប៉ះបាល់នៅតំបន់គ្រោះថ្នាក់ ប៉ុន្តែយ៉ាងណាក្ដីប្រធានក្រុម PSG (Silva) រូបនេះ បានតែតសងសឹកមកវិញ នៅនាទី១១៤ ដែលជាគ្រាប់ជ័យជម្នះតែម្ដង៕
ដោយ៖ វិន ជីវ័ន្ត ប្រភព៖ BBC