អ្នកគាំទ្រហែក្បួនកក្រើកក្រុងភ្នំពេញទាំងយប់ ក្រោយកម្ពុជាឈ្នះម៉ាកាវ
- 2015-03-13 16:38:39
- ចំនួនមតិ 0 | ចំនួនចែករំលែក 0
អ្នកគាំទ្រហែក្បួនកក្រើកក្រុងភ្នំពេញទាំងយប់ ក្រោយកម្ពុជាឈ្នះម៉ាកាវ
ចន្លោះមិនឃើញ
អ្នកគាំទ្របាល់ទាត់ក្រុម Arsenal នៅកម្ពុជា និងអ្នកគាំទ្រកីឡាបាល់ទាត់ទូទៅបានរៀបចំពិធីដង្ហែក្បួនអបអរជ័យជម្នះរបស់ក្រុមបាល់ទាត់ជម្រើសជាតិកម្ពុជាដូចបំណងមែនកាលពីយប់មិញ បន្ទាប់ពីក្រុមជម្រើសជាតិរបស់ខ្លួនទទួលបានជោគជ័យលើក្រុមកោះម៉ាកាវ ៣-០ ក្នុងយុទ្ធនាការវគ្គជម្រុះបឋមប្រចាំទ្វីបអាស៊ីជើងទី១ នៃពានរង្វាន់២០១៨ World Cup Russia កាលពីរសៀលថ្ងៃព្រហស្បតិ៍ម្សិលមិញនៅទីលានស្តាតចាស់។
លោក តុង សុប្រាជ្ញ អ្នកវិភាគសង្គមប្រចាំកាសែតភ្នំពេញប៉ុស្តិ៍ និងជាមេក្រុមអ្នកគាំទ្រ Arsenal នៅកម្ពុជាបានឲ្យដឹងថា កាលពីយប់មិញក្បួនដង្ហែបានចាប់ផ្តើមវេលាម៉ោង៦:៣០នាទីយប់ និងបញ្ចប់នៅវេលាម៉ោង៧:៤៥នាទីយប់។ ដោយសារបាន Sabay ជួយផ្សព្វផ្សាយកាលពីព្រឹកម្សិលមិញបណ្តាលឲ្យអ្នកគាំទ្រដឹងបានច្រើនពីគម្រោងហែ ហើយទីបំផុតអ្នកគាំទ្រប្រហែល២០០នាក់បានចូលរួមកាលពីយប់មិញ។
លោកបាននិយាយថា នេះជាសកម្មភាពមួយជួយបំផុសសកម្មភាពអ្នកគាំទ្រកីឡានៅស្រុកខ្មែរឲ្យមានសកម្មភាពរស់រវើក និងជាចលនាជួយដល់វិស័យកីឡាខ្មែរកាន់តែមានកេរ្តិ៍ឈ្មោះបោះសំឡេងទូទាំងប្រទេស និងលើឆាកអន្តរជាតិផងដែរ។
លោកបានបញ្ជាក់ថា ៖«បន្ទាប់ពីបានរៀបចំហែកាលពីយប់មិញ យើងឃើញថា យុវវ័យចាប់អារម្មណ៍ច្រើន អីចឹងយើងងាយស្រួលរៀបចំក្រោយៗទៀត។ យប់មិញយើងហែរយៈពេលជាងមួយម៉ោងដោយសារហត់នឿយពេលទៅគាំទ្រនៅស្តាតម្តងហើយ»។
ក្បួនដង្ហែកាលពីយប់មិញចាប់ផ្ដើមចេញពីមុខស្ថានទូតបារាំងតាមមហាវិថីព្រះនរោត្ដមឆ្ពោះទៅកាន់វិមានឯករាជ្យ និងបន្តដំណើរទៅកោះពេជ្រ។ បន្ទាប់ពីដល់កោះពេជ្រ ក្បួនដង្ហែដោយម៉ូតូក៏បានវិលត្រឡប់មកវិមានឯករាជ្យដើម្បីថតរូបជុំគ្នាទុកជាអនុស្សាវរីយ៍៕
អត្ថបទ៖ ស្រី សុវណ្ណដារ៉ា