ដួង ហ្សូរីដា រវល់រហូតគ្មានពេលសម្រកទម្ងន់
- 2014-09-16 13:00:33
- ចំនួនមតិ 0 | ចំនួនចែករំលែក 0
ដួង ហ្សូរីដា រវល់រហូតគ្មានពេលសម្រកទម្ងន់
ចន្លោះមិនឃើញ
ដោយសារការមមាញឹកក្នុងអាជីពសិល្បៈ និង មុខជំនួញផ្ទាល់ខ្លួនក្នុងបច្ចុប្បន្ននេះ ធ្វើឲ្យពិធីការិនី ដួង ហ្សូរីដា មិនអាចរកពេលវេលាបាន សូម្បីរត់ហាត់ប្រាណឲ្យទៀងទាត់ ដើម្បីសម្រកទម្ងន់ ដែលកំពុងឡើងដល់ ៥៥ គីឡូក្រាម។ នេះជាការលើកឡើងរបស់ កញ្ញា ដួង ហ្សូរីដា ប្រាប់ Sabay កាលពីថ្ងៃទី ១៥ កញ្ញា ម្សិលមិញ។
សូមចុចអាន៖ បិណ្ឌ៦ ម្សិលមិញតារាខ្មែរសម្រុកទៅវត្តដល់ក!
ហ្សូរីដា បានប្រាប់ Sabayថា ក្រៅពីការគ្រប់គ្រងក្រុមបង្ហាញម៉ូដ Cambodia Supper Model នាងក៏នៅមានហាងកាត់សំលៀកបំពាក់ផ្ទាល់ខ្លួន កំពុងមានអតិថិជនចូលមករកសេវាកម្មជាមិនលុះពេលវេលា។ ក្រៅពីនេះ ប្រធានក្រុមបង្ហាញម៉ូដខាងលើ ក៏បានចុះកុងត្រាថតកម្មវិធីចាក់ផ្សាយជាប្រចាំឲ្យទូរទស្សន៍ប៉ុស្តិ៍លេខ៥ ធ្វើឲ្យនាងកាន់តែមមាញឹកមិនអាចដកឃ្លាបាន។
“ កុំថាឡើយរត់ហាត់ប្រាណសម្រករាងរៅ សូម្បីតែរកពេលម៉ាស្សាមុខ ឬលាបឡេឲ្យស្បែកសស្អាតដូចគេ ក៏ខ្ញុំរកពេលមិនបានដែរ"។ ដួង ហ្សូរីដា បញ្ជាក់។
ទោះបីជាយ៉ាងណា ប្រធានក្រុមបង្ហាញម៉ូដខាងលើ បានបង្ហើបថា កំពុងមានគម្រោងទៅសម្រកទម្ងន់ឲ្យបាន៣ ទៅ៥គីឡូក្រាមបន្ថែមទៀត ដើម្បីឲ្យមានរាងសមសួនដូចពីមុន និង ចាប់ផ្ដើមថែរក្សាសម្បុរស្បែកឡើងវិញ ព្រោះចាប់ផ្ដើមមិនពេញចិត្តចំពោះខ្លួនឯងបណ្ដើរៗហើយ។ ម្យ៉ាងទៀត រាល់សេវាកម្មទាំងអស់ មិនមានការចំណាយលុយនោះទេ ក្នុងនាមជាឯកអគ្គរដ្ឋទូត នៃមជ្ឈមណ្ឌលថែរក្សាសម្ផស្ស មេហ្គាប៊ែល។
សូមចុចអាន៖ បទ “កុំអាណិតបង” របស់ Jimmy Kiss ជារឿងពិតបុរស ៣ នាក់
ដួង ហ្សូរីដា សព្វថ្ងៃកំពុងសប្បាយចិត្តចំពោះឯករាជ្យភាព ក្នុងការងារជាអ្នកគ្រប់គ្រងហាងកាត់សំលៀកបំពាក់ ដែលជាញើសឈាមបង្កើតឡើងដោយខ្លួនឯងផ្ទាល់។ ប៉ុន្តែពិធីការិនីមានឥទ្ធិពលរូបនេះ គ្មានគម្រោងបោះបង់ចោលអាជីពសិល្បៈនោះទេ ព្រោះយល់ថា ការងារសិល្បៈជាការផ្សព្វផ្សាយពីកេរ្តិ៍ឈ្មោះហាងរបស់ខ្លួនដោយមិនអស់លុយ។
ពិធីការិនីរូបនេះបន្តថា៖ “តាមរយៈការងារសិល្បៈនេះហើយ ដែលធ្វើឲ្យហាងរបស់ខ្ញុំហ្នឹង កាន់តែមានការគាំទ្រច្រើនឡើង រហូតមកដល់សព្វថ្ងៃនេះ សូម្បីរដូវភ្លៀងអញ្ចឹង ក៏នៅតែមានភ្ញៀវមិនដាច់ដែរ"។
ទោះបីជានិន្នាការផលិតភាពយន្តខ្នាតធំ មានការកើនឡើងយ៉ាងណាក៏ដោយ ប៉ុន្តែអតីតតួឯកស្រគត់ស្រគំរូបនេះប្រាប់ថា គ្មានគម្រោងត្រឡប់ទៅសម្ដែងវិញនោះទេ ព្រោះបានប្រកាសផ្អាកតាំងពី ៤ ឆ្នាំ មុនមកម្ល៉េះ។ ផ្ទុយទៅវិញ បើមានលទ្ធភាព ដួង ហ្សូរីដា នឹងពង្រីកមុខរបរផ្ទាល់ខ្លួនបន្ថែមទៀតក្នុងឆ្នាំ ២០១៥ ខាងមុខនេះ ដោយបង្កើតជាសាលាបណ្ដុះបណ្ដាលអាជីពកាត់ដេរ និង បង្កើតកន្លែងបង្រៀនដើរបង្ហាញម៉ូដដល់ក្មេងជំនាន់ក្រោយ៕
អត្ថបទ៖ សំ ជំនាញ