កញ្ញា វិចិត្រ ពិសី និស្សិតខ្មែររៀននៅចិន នឹងយកចំណេះដឹងដើម្បីបម្រើសង្គមឲ្យរីកចម្រើន

2014-10-07 17:41:31
ចំនួនមតិ 0 | ចំនួនចែករំលែក 0

ចន្លោះមិនឃើញ

មានវ័យ ២១ ឆ្នាំ កញ្ញា វិចិត្រ ពិសី គឺជាអតីតសិស្ស ពូកែគណិតវិទ្យានៅវិទ្យាល័យបាក់ទូក កាលពីឆ្នាំ២០១០។ បច្ចុប្បន្នកញ្ញាកំពុងបន្តការសិក្សាថ្នាក់អាហារូបករណ៍នៅសាធារណៈរដ្ឋប្រជាមានិតចិនលើមុខជំនាញទំនាក់ទំនង និងសេដ្ឋកិច្ចអន្តរជាតិនៅសាកលវិទ្យាល័យក្វាងស៊ី ខេត្តក្វាងស៊ី ប្រទេសទេសចិន។ ការជ្រើសរើសមុខជំនាញខាងលើគឺជាចំណូលចិត្តរបស់កញ្ញា ម្យ៉ាងប្រទេសចិនក៏ជាមហាអំណាចសេដ្ឋកិច្ចទី២ លើពិភពលោកផងដែរ។ អាហារូបករណ៍ ដែលកញ្ញាទទួលបានគឺតាមរយៈប្រលងប្រជែងយ៉ាងស្វិតស្វាញ ពីរដ្ឋាភិបាលចិនផ្តល់ដល់និស្សិតកម្ពុជា។

កញ្ញា បានចាកចេញពីប្រទេសទៅសិក្សានៅប្រទេសចិនកាលពីឆ្នាំ២០១១។ យុវតី ដែលជាកូនទោលនៅ ក្នុងគ្រួសារមួយ ដែលម្តាយជាអ្នកកាត់ដេរ និងកំព្រាឪពុកតាំងពីកុមារភាព បានប្រលងជាប់បាក់ឌុបកាលពីឆ្នាំ២០១០ ដោយទទួលបាននិទ្ទេស B។ ក្រោយប្រលងជាប់បាក់ឌុបបាននិទ្ទេសល្អហើយ កញ្ញា បានជាប់អាហារូបករណ៍នៅសាកលវិទ្យាល័យបួន ក្នុងនោះមានសាកលវិទ្យាល័យភូមិន្ទភ្នំពេញជំនាញព័ត៌មានវិទ្យា សាកលវិទ្យាល័យខេមរៈ សាកលវិទ្យាល័យមេគង្គកម្ពុជា និងសាលកវិទ្យាល័យហ្សាម៉ាន់លើមុខជំនាញវិស្វកម្ម។

មុនបានអាហារូបករណ៍ កញ្ញាបានដាក់ពាក្យប្រកួតប្រជែងតាមរយៈសេចក្តីជូនដំណឹងរបស់ក្រសួងអប់រំយុវជន និងកីឡា ដោយតម្រូវឲ្យដាក់ពាក្យ សម្រាប់តែនិស្សិតជាប់និទ្ទេស A ដល់ និទ្ទេស C ប៉ុណ្ណោះ។ កញ្ញាបានឆ្លងកាត់ការប្រលងគណិតវិទ្យា និងតេស្តភាសាអង់គ្លេសកម្រិត TOFLE បានយ៉ាងជោគជ័យ។ "ខ្ញុំមានបំណងប្រលងយកអាហារូបករណ៍សិក្សានៅក្រៅប្រទេសតាំងពីបងប្អូនជីដូនមួយខ្ញុំគាត់ជាប់អាហារូបករណ៍សិក្សានៅប្រទេសប្រទេសវៀតណាម កូរ៉េ និងប្រទេសអេស្បាញ ក៏មានចិត្តចង់បានអាហារូបករណ៍ដូចគាត់ដែរ។”

បើតាមកញ្ញា ពិសី ការសិក្សានៅទីនោះឆ្នាំដំបូង ត្រូវសិក្សាភាសាចិនមួយឆ្នាំ និងបន្ទាប់មករៀនជំនាញបួនឆ្នាំ។សរុបទៅការសិក្សាមានពេលរយៈពេល ៥ ឆ្នាំទើបអាចបញ្ចប់បរិញ្ញាបត្រ។ "នៅឆមាសដំបូងខ្ញុំមានការលំបាកវេទនាមែនទែន ទាក់ទងនឹងបញ្ហាភាសា ព្រោះក្នុងថ្នាក់រៀនគ្រូប្រើភាសាចិន។ ខ្ញុំខំស្តាប់ និងថតសម្លេងគ្រូពន្យល់ ក្នុងថ្នាក់ទុក ហើយចំណាយពេលស្តាប់ពី១០ ទៅ ១៥ នាទី។ ចំណុចណាមិនច្បាស់សួរមិត្តភ័ក្កិជនជាតិចិនបន្ថែម។ ខ្ញុំបានព្យាយាមរហូតមកដល់ បច្ចុប្បន្ន អាចតាមទាន់ និងទទួលបានចំណាត់ថ្នាក់ល្អ”។

ទាក់ទងការស្នាក់នៅប្រទេសចិន ពិសី ពេញចិត្តនឹងបរិយាកាសរស់ និងសិក្សានៅទីនោះជាខ្លាំង។ សព្វថ្ងៃ កញ្ញាស្នាក់នៅក្នុងអន្ទេវា សិកដ្ឋាន ជាមួយនិស្សិតខ្មែរបីនាក់ផេ្សងទៀត។ អ្នកទាំងបីនាក់ប្រៀបបាននឹងបងប្អូនបង្កើតនឹងគ្នា ខណៈកញ្ញាមិនដែលមានបងប្អូនរស់នៅជាមួយគ្នាពីមុនមកទេ។

ទោះបី កញ្ញា ពិសី កំពុងសិក្សាឆមាសទី១ ឆ្នាំទី៣ ក៏ពិតមែន តែកញ្ញាមានមហិច្ឆតាចង់បានអាហារូបរកណ៍ថ្នាក់អនុបណ្ឌិត ក៏ដូចជាបណ្ឌិត ដើម្បីយកចំណេះដឹងដែលមានមកអភិវឌ្ឍន៍សង្គមជាតិ ពិសេស ក្នុងវិស័យសេដ្ឋកិច្ចជាតិតែម្តង។ "ខ្ញុំគិតថាចិនជាប្រទេសមហាអំណាចសេដ្ឋកិច្ចទី២ ជិតតាមទាន់សហរដ្ឋអាមេរិកហើយ ដូច្នេះគេប្រហែលគេមានយុទ្ធសាស្រ្តអីពិសេស ដើម្បីធ្វើឲ្យសេដ្ឋកិច្ចរបស់គេមានការរីកចម្រើន។ ទៅថ្ងៃអនាគត ខ្ញុំសង្ឃឹមថានឹងយកចំណេះដឹង និងបទពិសោធន៍ ចែកចាយដល់អ្នកជំនាន់ក្រោយ ហើយបើសិនជាអាច ចូលរួមលើកស្ទួយសេដ្ឋកិច្ច ក្នុងប្រទេសយើង។ ម្យ៉ាងការចង់បានជំនាញភាសាចិនក៏ជាបំណងប្រាថ្នារបស់ខ្ញុំផងដែរ ព្រោះកម្ពុជាបច្ចុប្បន្ន មានតម្រូវការភាសាចិនច្រើន”។

ពិសី បានផ្តាំផ្ញើទៅយុវជនជំនាន់ក្រោយប្រសិនចង់បានអាហារូបករណ៍សិក្សានៅក្រៅប្រទេស ត្រូវប្រឹងគណិតវិទ្យា និងភាសាអង់គ្លេស ព្រោះភាគច្រើនអាហារូបករណ៍នៅបរទេសយកតែពីរមុខវិជ្ជានេះទេ។ យុវជនត្រូវហ៊ានសាកល្បង និងមានជំនឿចិត្តលើខ្លួនឯង សូមកុំនិយាយថា "ខ្ញុំធ្វើអត់កើត គួរនិយាយថា ខ្ញុំមិនទាន់ធ្វើកើត ហើយខិតខំប្រឹងប្រែងថែមទៀត”។ កុំអស់សង្ឃឹមពេលទទួលបាននិទ្ទេស D C E ព្រោះនិទ្ទេស មិនបញ្ជាក់ពីសមត្ថភាពនោះទេវាគ្រាន់ជាការប្រលងតែម្តង។ បរ៉ាជ័យលើកទី១ មិនមែនមានន័យថា យើងគ្មានសមត្ថភាពនោះទេ ត្រូវព្យាយាមសារជាថ្មី ។ ជាក់ស្តែងកញ្ញាផ្ទាល់ធ្លាប់បរ៉ាជ័យពីរលើកមកហើយ មុនទទួលបានអាហារូបករណ៍សិក្សានៅចិន ក្នុងនោះមានប្រទេស សឹង្ហបុរី និងប្រទេសចិន ប៉ុន្តែអាហារូបករណ៍ផេ្សងគ្នា។ ដូច្នេះការធ្លាក់ឬជាប់គឺជារឿងធម្មតា។ អ្នកត្រូវគិតថា ឱកាសល្អទៅវិញទេ ដែលមិនទាន់មកដល់ វានឹងមកដល់នៅថ្ងៃអនាគត។ ការសិក្សានៅក្នុងស្រុកក៏ល្អដែរប្រសិន បើយើងមានការព្យាយាម។ ផ្ទុយមកវិញអ្នកសិក្សានៅប្រទេសក៏មិនប្រាកដថា មានការងារល្អជាងអ្នកសិក្សាក្នុងស្រុកនោះទេ។ ម្យ៉ាងលក្ខណៈពិសេសមួយទៀតអ្នកសិក្សានៅក្នុងស្រុកមិនខាតឆ្នាំផង៕