កូនស្រីសង្សារចាស់ ឈិន ឡុង ចង់សម្លាប់ខ្លួនព្រោះម្តាយ

2015-03-18 18:49:01
ចំនួនមតិ 0 | ចំនួនចែករំលែក 0

ចន្លោះមិនឃើញ

Elaine Ng ដែលអះអាងថាខ្លួនជាអតីតសង្សាររបស់ ឈិន ឡុង បានក្លាយជាប្រធានបទក្ដៅគគុក លើបណ្ដាញសារព័ត៌មាន ក្រោយតារាស្រីរូបនេះ ត្រូវប៉ូលិសចាប់ខ្លួនពីបទប្រើអំពើហិង្សាលើកូនស្រី បូករួមករណីផ្សេងទៀត។ បើផ្អែកតាមគេហទំព័រ Asianpopnews ម្សិលមិញបានឱ្យដឹងថា កូនស្រីរបស់ Elaine ឈ្មោះ Etta Ng ធ្លាប់គិតចង់សម្លាប់ខ្លួន។

ប្រភពទុកចិត្តដដែលបញ្ជាក់ថា ក្រោយ Etta Ng រាយការណ៍រឿងរ៉ាវដែលម្ដាយផឹកគ្រឿងស្រវឹង ជក់បារី និងធ្វើបាបរាងកាយខ្លួនដល់គ្រូបង្រៀន រហូតឈានដល់ការចាប់ខ្លួន (ចាប់ម្ដាយ) ធ្វើឱ្យក្មេងស្រីវ័យ១៥ឆ្នាំគិតថា បានធ្វើខុសចំពោះម្ដាយ។

ក្មេងស្រីស្ថិតក្នុងវ័យសិក្សារូបនេះ បញ្ជាក់ប្រាប់គ្រូរបស់នាងទៀតថា ពេលទៅរៀននាងមិនត្រូវបានមិត្តភ័ក្ដិនិយាយរាប់រកទេ។ ដោយសារមិនអាចដោះស្រាយ បញ្ហាស្មុគស្មាញទាំងនេះ Etta Ng ធ្លាប់គិតចង់សម្លាប់ខ្លួនម្ដងដែរ។

ក្មេងស្រីដែល ឈិន ឡុង មិនទទួលស្គាល់ជាកូនបង្កើតនេះ សង្ឃឹមថាប៉ូលិសនឹងអាចកែប្រែ និងជួយព្យាបាលជំងឺញៀនស្រា របស់ម្ដាយបាន។

ចំណែកអ្នកស្រី Elaine ក៏បានសុំទោសចំពោះកូនស្រីដែរ។ ក្នុងបទសម្ភាសន៍មួយ តារាសម្ដែងជើងចាស់បានសារភាពថា អ្នកស្រីផឹកស្រា ដើម្បីជួយឱ្យគេងលក់ ហើយសន្យាជាមួយកូនថា អ្នកស្រីនឹងថែរក្សាសុខភាពខ្លួនឯង។

មកដល់ពេលនេះ នាងមិនអាចទាក់ទងកូនស្រីបាននៅឡើយទេ "នាងមិនលើកទូរសព្ទ ហើយក៏មិនតបសារ Whatsapp របស់ខ្ញុំដែរ។ ខ្ញុំពិតជាខុសដែលមិនផ្ដល់សុវត្ថិភាពដល់នាង។ នាងបារម្ភពីសុខភាពខ្ញុំ។ ខ្ញុំធុញថប់ណាស់នៅកន្លែងធ្វើការ។ នាងដឹងថាខ្ញុំស្រលាញ់នាង"។

Etta Ng ប្រាប់ថា ម្ដាយនាងផឹកស្រា ជក់បារី ស្ទើររាល់យប់ ហើយពេលស្រវឹងម្ដាយតែងឃុំខ្លួនឯងក្នុងបន្ទប់ទឹក និងស្រែកយំ។ មិនតែប៉ុណ្ណោះ ក៏មានការវាយធ្វើបាបរាងកាយនាងដែរ ពេលឈ្លោះប្រកែកគ្នា។

ទោះបីជាយ៉ាងណាក្នុងបទសម្ភាសន៍ ស្ត្រីជាម្ដាយបានបដិសេធ និងវាយដៃអ្នកសម្ភាសន៍ស្រាលៗរួចនិយាយថា "តើការវាយអ៊ីចឹងឬ ថាជាការធ្វើបាប? តើវាអាចទៅរួចដែរឬទេ?”។

ប្រភពបានឱ្យដឹងថា Elaine មានកូនជាមួយ ឈិន ឡុង ក្នុងឆ្នាំ១៩៩៩ ប៉ុន្តែតួឯករឿង "Dragon Blade " មិនសប្បាយចិត្ត និងមិនទទួលស្គាល់ទេ។ ក្រោយមកមានការលេចឮមកថា ទោះបីតារាជំនាញហក់លោតមិនពេញចិត្ត តែលោកបានផ្ដល់ប្រាក់ ៣០លានដុល្លារហុងកុង (ប្រហែល ៣,៨ លានដុល្លារ) ពេលបែកគ្នា និងផ្ដល់ប្រាក់ចំណាយក្នុងការរស់នៅ ១០០ ០០០ ដុល្លារហុងកុង (ប្រហែល ១,២ ម៉ឺនដុល្លារ) ក្នុងមួយខែផងដែរ។

នេះជាលក្ខខណ្ឌមួយ ដែល Elaine ត្រូវនាំកូនស្រីទៅរស់នៅក្នុងទីក្រុងសៀងហៃឲ្យឆ្ងាយពីឈិន ឡុង។ តែក្នុងឆ្នាំ២០១១ មានចចាមអារ៉ាមថា នាងបាននាំកូនត្រឡប់ទៅទីក្រុងហុងកុង ដែលធ្វើឱ្យ ឈិន ឡុង មានការខឹង និងផ្ដាច់ប្រាក់ឧបត្ថម្ភខាងលើ៕