ថត "Ninja Assassin” មួយរឿង Rain អន់ចង់រឿងថតភាពយន្តហូលីវូដទៀត

2015-03-19 13:00:06
ចំនួនមតិ 0 | ចំនួនចែករំលែក 0

ចន្លោះមិនឃើញ

"Ninja Assassin” ជាភាពយន្តហូលីវូដដំបូងដែល Rain ត្រូវបានជ្រើសរើសឲ្យចូលសម្ដែងជាតួឯក។ ឃើញតារាចម្រៀងកូរ៉េរូបនេះបានចូលប្រឡូកក្នុងវិស័យភាពយន្តល្បីហូលីវូដ ពិសេសគឺជាតួធំទៀតគឺមិនមែនជារឿងងាយឡើយ ហើយវាក៏ធ្វើឲ្យ Rain ចត់បាយចង់រត់ចោលជួរម្ដងៗដែរ។

ក្នុងបទសម្ភាសពីដំណើរការថតរឿងនេះ តួឯករឿង "បំណុលផ្ទះ ជំពាក់ស្នេហ៍" និយាយថា វាពិតជាពិបាកសម្រាប់គេ ស្របពេលដែលគេមានលុយចាយមិនអស់ ម៉េចមិនទៅសប្បាយរីករាយជាមួយស្រីក្មេងៗ និងធ្វើរឿងសប្បាយៗផ្សេងទៀតទៅចាំបាច់អីមកត្រូវហ្វឹកហាត់យ៉ាងលំបាកលំបិនរាប់ខែបែបនេះ? តែអ្វីដែលជំរុញចិត្តគេ គឺពេលនឹកដល់រូបភាពខ្លួនឯងបង្ហាញក្នុងភាពយន្តធំហូលីវូដ និងលើផ្ទាំងរូបភាពធំៗទើបតម្រូវឲ្យគេជម្នះគ្រប់យ៉ាងបាន។

ដើម្បីបានរូបរាងដូចតួដែលអ្នកដឹកនាំរឿងចង់បាន Rain ត្រូវហ្វឹកហាត់សាច់ដុំ និងក្បាច់គុនជាមួយគ្រូក្បាច់គុន និងគ្រូកាយសម្ព័ន្ធជាច្រើននាក់យ៉ាងលំបាករយៈពេលច្រើនខែទម្រាំបានសាច់ដុំកង់ៗសមជាតួឃាតកនិន ចា។ ក្រៅពីនេះ ការតមអាហារជារឿងដ៏លំបាកបំផុត ព្រោះស្ទើររាល់ថ្ងៃម្ចាស់បទ "La Song” ត្រូវញ៉ាំស៊ុត និងត្រីសាលម៉ុងដើម្បីឲ្យរាងកាយមិនខូចទ្រង់ទ្រាយ និងសាច់ដុំធំល្អ។

គេនិយាយលេងក្នុងបទសម្ភាសថា "ក្រោយថតរឿងនេះចប់ (Ninja Assassin) ខ្ញុំឈប់ទៅហាត់ប្រាណទៀតហើយគឺគិតតែពីញ៉ាំ ញ៉ាំ ញ៉ាំ តែម្ដង"។ ភាពអំណត់ ការខិតខំប្រឹងប្រែង និងឆន្ទៈរបស់ Rain ធ្វើឲ្យក្រុមការងារថតរឿង "Ninja Assassin” សរសើរគេមិនដាច់ពីមាត់។ ទាំងនេះហើយ ទើប Rain អាចមានឱកាសចូលសម្ដែងរឿងហូលីវូដជាតួឯក ខណៈដែលតារាល្បីផ្សេងទៀតទៅធ្វើតេស្តរាប់ភ្លេចនៅមិនជាប់។ ចង់ដឹងថាការហ្វឹកហាត់របស់គេលំបាកយ៉ាងណា សូមមើលវីដេអូ៖